O Ninive epunda-umbo likala ko Silia. Ovanthu ankho vakala-mo valinga ovivi. Jeova atumu omuuli Jona aye ko Ninive opo akalondole ovanthu velivele monondyila mbavo. Mahi, Jona akahateka no kotyilongo otyikuavo. Avelama mowato ukahi nokuenda no ko Társis epunda-umbo likala kokule no Ninive.

Puetyi owato ukahi nokuenda, akuya omphepo imwe onene, ovatahi vowato avatili unene owoma. Avehimbika okulikuambela ko vihuku viavo avapulu okuti: ‘Omokonda yatyi kueila omphepo?’ Konyima, Jona apopi okuti: ‘Ame napengesa. Ndyikahi nokukahateka mokonda hahandele okulinga etyi Jeova anthuma. Inkha mundyumba melunga, omphepo maitulu.’ Ovatahi vowato avaanye, mahi Jona evekuluminya vetyilinge. Etyi vemuyumba melunga omphepo aitalama.

Jona ehimbika okuenda kohi yomaande. Etyi aimbuka okuti ukahi nokuenda unene kohi, ehimbika okulikuambela ku Jeova. Jeova atumu ombisi imwe onene, aimunyini-po mahi ahankhi. Etyi ekahi meimo liombisi, Jona elikuambela okuti: ‘Okuhimbikila hono mandyikutavela apeho.’ Jeova akalesa Jona mokati kombisi ononthiki ononthatu, konyima aihandyela Jona koluhimba.

Etyi Jeova ayovola Jona, okuti otyo tyilekesa okuti kapondola vali okuenda ko Ninive? Au. Jeova atumu vali Jona ende ko Ninive.  Pahe Jona etavela. Etyi ehika-ko avasi ovanthu valinga ovivi evepopila okuti: ‘Mo nonthiki 40, o Ninive maihanyua-po.’ Konyima akumoneka otyipuka tyimwe tyihuvisa, ovanthu vo mo Ninive avemutavela iya avayekepo okulinga ovivi. Ohamba yo mo Ninive aipopila ovanthu okuti: ‘Tuitei ku Huku etuevele. Hamwe ketuhanye-ko.’ Etyi Jeova amona okuti ovanthu velivela, ahahanye-ko ovanthu vo mo Ninive.

Jona anumana unene mokonda epunda-umbo kaliahanyenue-po. Nkhele soka: Jeova ankho walekesa okuti wapua-elundo nokuna okankhenda na Jona, mahi Jona ankho utupu okankhenda novanthu vo mo Ninive. Nokuanumana Jona atundu mepunda-umbo akapumphama mombuelo yolunthanga. Konyima olunthanga alukukuta, Jona anumana unene. Pahe Jeova emupopila okuti: ‘Ove wakala vali nokankhenda nolunthanga tyipona okukala nokankhenda novanthu vo mo Ninive. Ame ndyina okankhenda navo iya himevehanye-ko.’ Oityi ankho ekahi nokumulongesa? Ovanthu vo mo Ninive vakolela vali tyipona olunthanga.