Josia wakala ohamba yo Judaa etyi ena omanima 8. Po nonthiki opo, ovanthu ankho velipaka momangwa nokufenda ovilolo. Etyi Josia akala nomanima 16, elilongesa okufenda Jeova monkhalelo yaviuka. Etyi atuukisa omanima 20, ahimbika okuhanyauna ovilolo nomitala vio vilikutila motyilongo atyiho. Etyi atuukisa omanima 26, apindula-po ondyuo ya Jeova.

Etyi vekahi nokupindula-po ondyuo ya Huku, omunakwa utiwa Hilkia, avasi-mo ombuingwa muna ovitumino via Jeova, tyafuile ombuingwa muahonekwa ovitumino viapelwe Moisesi. Safa omuhoneki wohamba atuala ombuingwa oyo ku Josia iya ehimbika okutangela Ovitumino peulu. Etyi eiva etyi tyatangua, Josia anumana unene mokonda ovanthu ankho kavekahi nokutavela Jeova momanima omanyingi. Ohamba Josia aipopila Hilkia okuti, ‘Jeova wanumana unene nonthue. Enda kapopie nae. Jeova metupopila etyi tuna okulinga.’ Jeova akumbulula menyina liomuuli Hulda okuti: ‘Ovanthu vo ko Judaa vandyeka-po. Mandyivemonesa ononkhumbi mahi Ohamba Josia himemulingi ngotyo mokonda weliola omutima.’

Etyi Ohamba Josia eiva onondaka ombo, aende kondyuo ya Huku aihana ovanthu aveho vo Judaa. Konyima evetangela Ovitumino via Jeova. Josia novanthu aveho avapange okutavela Jeova nomutima wavo auho.

Elongo lio Judaa ankho kavalingi vali otyipito tyo Pasikwa mokueenda kuomanima omanyingi. Mahi etyi Josia atanga  Movitumino okuti otyipito tyo Pasikwa tyina okuhinangelwa omanima aeho, apopila elongo okuti: ‘Tulingilei Jeova otyipito tyo Pasikwa.’ Konyima Josia aeta ovinyama ovinyingi mondyuo ya Huku novanthu opo vaimbe. Etyi vamana okulinga otyipito tyo Pasikwa, pahe avalingi otyipito otyikuavo tyiihanwa okuti Otyipito tyo Nombolo mbehena Onkhiso, tyalingwa mononthiki epandu-vali. Otyikando tyahulilila ovanthu va Huku valinga otyipito tyo Pasikwa, opo nonthiki mba Samuele. Josia tyili-tyili ankho uhole Ovitumino via Huku. Okuti ove okulilongesa konthele ya Jeova utyihole?