ELONGESO 03
Etyi Ombimbiliya Ipopia, Okuti Upondola Okutyiyumba Umwe Onthumbi?
Ombimbiliya ipopia ovipuka vimwe oviwa matukamona komutwe wandyila. Mahi nkhele itupopila etyi tuesukisa okulinga pehepano tukale nomwenyo ukahi nawa. Hamwe wahanda umwe okuvinoñgonoka, mahi nkhele otyo wasa-mo kapii. Ombimbiliya omukanda umwe omukulu. Okuti ñgana upondola umwe okuiyumba onthumbi etyi ipopia? Etyi ipopia tyipondola okutukuatesako hono atukala umwe nawa? Iya etyi yapopia okuti komutwe wandyila ovivi mavikapwa-ko, tyiyumbwa umwe onthumbi? Ovanthu ovanyingi vetavela etyi Ombimbiliya ipopia. Pahe tutale ine no ove etyi ipopia upondola okutyitavela.
1. Okuti ovipuka viapopiwa mo Mbimbiliya vialingilwe umwe?
Wokuahoneka Ombimbiliya, vahoneka “onondaka mbuyumbwa onthumbi.” (Eclesiastes 12:10) Ovanthu vokuapopiwa mo Mbimbiliya, valiko umwe, novipuka vapopia-popia viaendele-ko umwe. (Tanga Luka 1:3; 3:1, 2.) Ovanongo ovanyingi vokuatanga unene, vaovolola nawa, avetyimono okuti ononthiki mbapopiwa mo Mbimbiliya, novanthu vatyo, novilongo viapopiwa-mo, tyili viali-ko umwe.
2. Omokonda yatyi tupopila okuti Ombimbiliya iyumbwa onthumbi, ngwe omukanda omukulu?
Ombimbiliya yapopia-le kohale ovipuka ovanthu vanoñgonoka vala mononthiki mbuno. Vimwe viapopiwa mo Mbimbiliya, viayemba kuetyi ovanthu hono valongeswa kosikola. Pomuvo viahonekwa, ovanyingi ankho kavevitavela. Mahi pahe vokuatanga vetyimona umwe nawa okuti etyi ipopia otyili. Etyi Ombimbiliya ipopia “tyiyumbwa onthumbi, tyilinge hono, tyilinge komutwe oku tuenda nako.” — Salmo 111:8.
3. Ovipuka Ombimbiliya yapopia okuti mavimoneka komutwe wandyila, okuti upondola umwe okuviyumba onthumbi?
Mo Mbimbiliya muna omaulo a apopia “ovipuka viehenemoneke,” mahi mavikamoneka komutwe wandyila. (Isaías 46:10) Ombimbiliya yapopia ovipuka ovinyingi viamoneka-moneka-le mouye. Netyi ouye ukahi ñgaa, Ombimbiliya yetyipopia-ale kohale. Elongeso eli, malikulekesa ovipuka vimwe Ombimbiliya yapopaile viamonaika-le.
KUHANDE OKUNOÑGONOKA VALI?
Monoñgonoka ovipuka vimwe viapopiwa mo Mbimbiliya vielikuata nawa netyi ovanongo vokuatanga vapopia. Tupu momono oñgeni omaulo amwe eli mo Mbimbiliya aendaile.
4. Etyi Ombimbiliya ipopia tyelikuata netyi ovanongo vokuatanga vapopia
Kohale ovanthu ankho vasoka okuti ohi ina oku yapumphama. Talei OVIDIU.
Tala vala etyi tyahonekwa momukanda wa Jó, mahi ngwe okuhimbikila apa tyahonekwa palamba-le omanima 3.500. Tangei Jó 26:7, amutomphola konthele yepulo eli:
-
Omunthu wokuahoneka onondaka ombo, ankho kalongesilwe ovipuka vokuatanga vei hono. Mahi pahe okusoka kuetyi apopia okuti “ohi kayapumphamene kotyipuka natyike” tyikukalesa ñgeni?
Omaande atunda pohi, aende peulu; pahe aatundu vali peulu, aeya na pano pohi. Otyipuka otyo apa ovanthu vetyinoñgonoka nawa, palamba vala omanima 200. Mahi apa Ombimbiliya yetyipopia, pena-le omanima omanyingi akatuuka 3.500. Tangei Jó 36:27, 28, amutomphola konthele yomapulo aa:
-
Oityi wahumba vali kuetyi Ombimbiliya yapopia konthele yomaande?
-
Okuti ono tesitu ombo tuatanga, mbekukuatesako okuyumba onthumbi mo Mbimbiliya?
5. Ombimbiliya yapopia-le ovipuka vimwe iya avimoneka umwe
Tangei Isaías 44:27–45:2, amutomphola konthele yepulo eli:
-
Etyi ankho kuakambela omanima 200 opo epunda-umbo lyo Mbambilonia lihanyue-po, ovipuka patyi Ombimbiliya yapopia umwe nawa-nawa?
Tyili menima 539 P.K.E, b Ohamba yoko Pelesia itiwa o Silu, ainyingila mepunda-umbo lyo Mbambilonia nomatolopa ayo, aveihanye-po. Omatolopa a Silu aaheye omikungu, aayapula omaande ondongi onene ankho yeliseta nepunda-umbo lyo Mbambilonia. Etyi vayauka, avavasi omapito atyo emumbululu. Mokonda omapito veevasa-le mumbululu, avahalu-ale vali, epunda-umbo avelihanye-po aliho. Tundee apa liahanyuapo atee hono, palamba-le omanima 2.500. Na hono, Ombambilonia ekongola vala kamukalwa vali. Mahi omokonda yatyi?
Tangei Isaías 13:19, 20, amutomphola konthele yepulo eli:
-
Oityi tyilekesa okuti etyi tyipopia otesitu oyo tyaendapo umwe?
Kotyilongo tyo Irake, oko kuna omatunthu Ombambilonia
6. Ovipuka tuli nokumona hono, Ombimbiliya yevipopia-le kohale
Ombimbiliya yapopia okuti tuli “kononthiki mbahulilila.” (2 Timotiu 3:1) Tala ovipuka vimwe Ombimbiliya yapopia okuti mavimoneka mononthiki mbetu.
Tangei Mateusi 24:6, 7, amutomphola konthele yepulo eli:
-
Ovipuka patyi Ombimbiliya yatile mavimoneka mononthiki mbahulilila?
Tangei 2 Timotiu 3:1-5, amutomphola konthele yomapulo aa:
-
Ovipuka patyi ovanthu valinga hono, Ombimbiliya yapopia-le kohale?
-
Okuti ovipuka ovio uhole okuvimona hono kovanthu?
OVANTHU VAMWE VATI: “Ovanthu vokuahoneka Ombimbiliya, velihinda vala; muene vapopia-mo vala evi vahanda.”
-
Mahi pahe, oityi utavelela okuti etyi Ombimbiliya ipopia otyili?
ETYI WELILONGESA
Welilongesa okuti upondola okuyumba onthumbi Ombimbiliya, mokonda etyi ipopia, netyi ovanthu vokuatanga vapopia, tyelifwa. Tupu wamona okuti atyiho Ombimbiliya yatile matyimoneka, tyili tyamoneka-po umwe.
Okupitulula
-
Okuti Ombimbiliya etyi ipopia otyili ine hatyili-ko?
-
Ovipuka patyi Ombimbiliya ipopia, vilii netyi ovanongo vokuatanga vapopia?
-
Ove utavela okuti Ombimbiliya ipopia etyi matyikamoneka komutwe wandyila? Oityi wakumbululila ngotyo?
KUHANDE OKUOVOLA VALI?
Okuti mo Mbimbiliya muna vimwe vitesa onkhango etyi ovanongo vapopia?
“Okuti Etyi Tyili mo Mbimbiliya Tyelikuata Netyi Vokuatanga Vapopia?” (Mo jw.org)
Oityi tyilekesa okuti tuli “kononthiki mbahulilila”?
Etyi Ombimbiliya yapopia konthele yovatumini votyilongo tyo Ngelesia, tyamonekele umwe. Ovidiu ei ityipopia nawa.
Tanga onthele ei, utale oñgeni omaulo Ombimbiliya akuatesako omunthu ankho usoka okuti kouye kutupu Huku.
“Kuame Ankho Kouye Kutupu Huku” (Omutala Womulavi, No. 5 2017)
