Ngetyi welilongesa mo mbrochula ei, Mombimbiliya muna onondonga ononyingi mambukuatesako ove nombunga yove. Jeova uhanda ove uhambukwe. Oe walaa okuti inkha mupaka komutwe efendelo liae, “ovipuka ovikuavo aviho mamuviyawiswa.” (Mateus 6:33) Tyotyili Jeova uhanda ove ukale epanga liae. Landula onomphitilo ambuho tuna opo ukale noupanga omuwa na Huku. Olio elao enene kese omunthu apondola okukala nalio.​—Mateus 22:37, 38.

ETYI OMBIMBILIYA IPOPIA: “‘Ame mandyikala tate pala onwe, iya onwe amukala ovana vovalume no vovakai pala ame,’ otyo tyapopia Jeova.” (2 Coríntios 6:18) Huku uhanda ove ukale epanga liae enene. Likuambela opo uvase onkhalelo yokutyilinga. Jeova utuita “tulikuambele apeho.” (1 Tessalonicenses 5:17) Jeova uhanda okutehelela omalusoke omutima wove nomasukalalo ove. (Filipenses 4:6) Tyina ulikuambela nombunga yove, mavatale inkha Huku omunthu wotyotyili imwe kuove.

Tupu tyina upopia na Huku, nove wesukisa okumutehelela. Otyo upondola okutyilinga, mokulilongesa Ondaka yae nomikanda viapolwa Mombimbiliya. (Salmo 1:1, 2) Sokolola muetyi welilongesa. (Salmo 77:11, 12) Okutehelela Huku tupu tyesukisa okuenda komaliongiyo Ovakristau.​—Salmo 122:1-4.

Okupopila vakuenyi konthele ya Jeova onkhalelo onkhuavo yakolela yokupameka oupanga wove nae. Tyina utyilinga apeho, molitehelela okuti wafuena vali kwe.​—Mateus 28:19, 20.

OITYI UNA OKULINGA:

• Taindya omuwo wokutanga Ombimbiliya ononthiki ambuho nokulikuambela

• Kumwe nombunga, pakei komutwe ovilinga via Huku tyipona ovitalukiso nokupululukwa

ETYI OMBIMBILIYA IPOPIA: “Fuenei ku Huku, nae opo afuene kuonwe.” (Tiago 4:⁠8) Wesukisa okuhoneka ehinangeleso liefendelo liombunga, nokuendelamo apeho. (Gênesis 18:19) Mahi kuna etyi tyesukisa vali. Una okufenda Huku ononthiki ambuho. Pameka oupanga wombunga yove na Huku, mokupopia navo konthele yae “tyina upumphi meumbo liove, tyina wendaenda metapalo, tyina ulangalapo, na tyina upindukapo.” (Deuteronômio 6:6, 7) Linga nga Josue, wati: “Anthi, ame novo meumbo liange, matuumbila Jeova.”​—Josué 24:15.

OITYI UNA OKULINGA:

• Longesa apeho ombunga yove mokuholovona etyi kese umwe mombunga yove esukisa