Ovalinepi vahimbika ombunga omphe. Namphila apeho una okukala nonthilo, nohole no venyi, mahi una muelinepa nae oe omunthu wakolela vali pala ove kombanda yohi. Otyo pamwe tyipuiya unene onombunga mbumwe okutyitavela. Mahi onondonga mbukahi Mombimbiliya mbupondola okukukuatesako okupola pokati, nokutualako nombembwa nombunga yove, nokulinga ononkhono mbokupameka oupanga wombunga yove omphe.

ETYI OMBIMBILIYA IPOPIA: “Humba ho na nyoko.” (Efésios 6:2) Namphila pahe wekula, mahi apeho wesukisa okuvepanda nokuvehumba. Tupu imbuka okuti una muelinepa nae, una okusuka nombunga yae. “Ohole itupu ounkhuelume,” ngotyo uhanumane tyina una muelinepa nae akala noupanga omuwa nombunga yae.​—1 Coríntios 13:4; Gálatas 5:26.

OITYI UNA OKULINGA:

• Lityilika okupopia okuti: “Ombunga yove yanthomba” ine “Nyoko kahande etyi ndyilinga”

• Ovola okutala ovipuka ngetyi una muelinepa nae evitala

ETYI OMBIMBILIYA IPOPIA: “Omulume masipo he na ina, eliwaneka nomukai wae, avakala vala olutu lwike.” (Gênesis 2:24) Tyina wanepa, ovotate yove vapondola okusoka okuti nkhele vekutumina, iya vapondola okulipaka unene motyinepo tyove.

Ove na una muelinepa muna okuholovona opi ovoho vesukisa okuhulila nokuvepopila tyo noluembia. Upondola okuvepopila atyiho mahi tyahanumana. (Provérbios 15:1) Okankhenda, nomutima weliola, noumphua-lundo mavikukuatesako okutunga oupanga omuwa nombunga yenyi nokutualako “okulikoleleya kese umwe na mukuavo nohole”​—Efésios 4:2.

OITYI UNA OKULINGA:

• Inkha watala okuti ombunga yauna mulinepa nae ikahi nokulipaka unene momuenyo wenyi, tompholei na una muelinepa nae tyina muatula omitima

• Lipakeleimo otyikati tyina mupopia konthele yotyo