Olukembe tyina lutyitwa lupondola okuhambukiswa ovalinepi, mahi tupu lupondola okuvenumanesa. Mokonda nkhele muvape, tyipondola okumupuiya okukala nomuvo, nononkhono mbokutekula olukembe. Okukala tyipahi omuvo omunyingi tyipondola okupuiya okutualako noupanga omuwa motyinepo. Ovalinepi amuho muna okulinga omapiluluko pala okutekula olukembe luenyi, nokutualako notyinepo tyenyi. Oñgeni omalondolo Ombimbiliya apondola okumukuatesako okulwa novitateka ovio?

ETYI OMBIMBILIYA IPOPIA: “Ohole yapwa elundo no kuna omutima omuwa.” Tupu “kayoovola okulinga omahando ayo muene, kainumana.” (1 Coríntios 13:4, 5) Mokonda pahe una omona, pamwe upondola okusuka vala nolukembe luove. Mahi, omulume wove upondola okulitehela okuti pahe kuesukile vali nae, uhalimbueko okuti nae una okusuka nae. Noumphwa elundo nomutima omuwa, upondola okumukuatesako okulitehela okuti wahumbua nokutekula kumwe nae omona.

“Onwe valume, tualeiko okukala novakai venyi menoñgonoko.” (1 Pedro 3:7) Noñgonoka okuti omukai wove mepuila nokutekula olukembe luenyi. Pahe una otyilinga otyipe, tyipondola okumupuilisa nokumusoyesa, ine alo umwe okumunumanesa. Alo pamwe upondola okukunumanena, mahi tualako tyatula omutima, mokonda “una uhanumana liwa wavilapo vali omulume wepondolo.” (Provérbios 16:32) Lekesa okuti utyivila okupunga ovipuka, nokumukuatesako muetyi esukisa.​—Provérbios 14:29.

OITYI UNA OKULINGA:

• Vohe: Kuateseiko ovakai venyi okulela olukembe, alo umwe kounthiki. Tepula komuvo umanena movilinga ovikuavo okala omuwo omunyingi nomukai wove nokusisa olukembe luenyi

• Voina: Tyina omulume wove ahanda okukukuatesako okulela olukembe, tavela. Inkha ketyivili okukuata nawa olukembe, uhemupopie, mahi nokankhenda mulekesa oñgeni tyikuatwa olukembe

ETYI OMBIMBILIYA IPOPIA: “Vakala vala olutu lwike.” (Gênesis 2:24) Namphila pahe muna omunthu omupe mombunga, hinangela okuti ove na una muelinepa nae “muhitu ike.” Linga atyiho opo oupanga wenyi utualeko tyapama.

Vakai, tyina ovalume venyi vemukuatesako pandulei. Onondaka mbenyi mbolupandu mbupondola “okuhakula.” (Provérbios 12:18) Mulume, tolela omukai wove okuti umuhole unene, nokulekesa okuti wakolela. Pandula onkhalelo atekula ombunga.​—Provérbios 31:10, 28.

“Kese umwe ahatualeko vala okuovola ouwa wae muene, mahi atualeko okuovola ouwa wamukuavo.” (1 Coríntios 10:24) Apeho linga etyi una muelinepa nae ahanda. Mokonda muvalinepi, kalei omuvo omunyingi kumwe, nokutomphola, nokulipandula, nokutehela etyi kese umwe apopia. Suka na mukuenyi tyina mulinga otyihola. Tala etyi mukuenyi esukisa. Ombimbiliya yati: “Muhelinuminei okulinga otyihola, nkhuali oputyina vala muelitavela pokati.” (1 Coríntios 7:3-5) Ngotyo, tompholei konthele yotyo tyiheliholeka. Oumphua-lundo nokulinoñgonoka matyipameka oupanga wenyi.

OITYI UNA OKULINGA:

• Uhalimbueko okutaindya omuvo pala una mulinepa nae

• Linga alo umwe ovipuka ovitutu opo una muelinepa nae elitehelele okuti uholwe, okumuhonekela mo telefone ine okumuetela okapuka kamwe okawa

ETYI OMBIMBILIYA IPOPIA: “Tunde pouna wanoñgonoka ovihonekwa vikola, vipondola okukukalesa nonondunge pala eyovo.” (2 Timóteo 3:15) Talei oityi mamulongesa olukembe luenyi. Lunale ounongo wokulongoka, alo umwe puetyi luhenetyitwe. Tyina olukembe nkhele lukahi meimo, lupondola okuimbuka ondaka yove, nokuhambukwa tyina ove wahambukwa nokunumana tyina wanumana. Mutangelei tyina nkhele omututu. Namphila nkhele ahanoñgonoka etyi watanga, otyo matyimukuatesako okuhambukilwa okutanga tyina amekulu.

Olukembe luenyi halututu pala okutehelela etyi mupopia konthele ya Huku. Kalei nalo tyina mulikuambela ku Jeova na lutyiive. (Deuteronômio 11:19) Alo umwe tyina mulikuambela amuho, popiei konthele yovipuka Huku atunga. (Salmo 78:3, 4) Tyina omona wenyi ekula, melitehelela okuti uholwe na Jeova nae elilongesa okukala nohole nae.

OITYI MUNA OKULINGA:

• Likuambelei okuita ounongo opo mutyivile okulongesa olukembe luenyi

• Wana-wana onondaka pokupopila olukembe opo lunoñgonoke liwa