Tyina muhimbika omuenyo wenyi wotyinepo, mapamoneka ovitateka ovinyingi. Ovitateka ovio, vipondola okutuka konkhalelo yelikalela kese umwe evisoka, nokulitehela no ñgeni atala omuenyo. Pamwe vipondola okutuka kondye no kovipuka tuhakevela vitumbuka vala.

Tyipondola okupuiya okulityilika ovitateka ovio, mahi Ombimbiliya itulondola okuti tuna okutetulula ovitateka vietu. (Mateus 5:23, 24) Motyivili okutetulula ovitateka viove tyina ulandula onondonga Mbombimbiliya.

ETYI OMBIMBILIYA IPOPIA: “Kuna omuvo . . . wokupopia.” (Eclesiastes 3:1, 7) Taindya omuvo wokutomphola konthele yotyitateka. Noukuatyili popila ou muelinepa nae oñgeni ulitehela, netyi usoka konthele yotyo. Apeho “popiei otyili” na una muelinepa nae. (Efésios 4:25) Alo umwe tyina pena tyimwe tyinumanesa, lityilika omaluei. Ekumbululo liapoleya liesukisa opo utyilike ovilwa.​—Provérbios 15:4; 26:20.

Na tyina muheliivite, tualako okukala nouwa-tima, uhalimbueko okulekesa ohole nonthilo na una muelinepa nae. (Colossenses 4:6) Tetulula liwa-liwa ovitateka nokuhayekepo okutomphola.​—Efésios 4:26.

OITYI UNA OKULINGA:

• Taindya omuvo waviuka wokutomphola konthele yotyitateka

• Tyina otyikando tyove tyokutehelela, lityilika okuteta mukuenyi. Ove mokala notyikando tyove mopopi

ETYI OMBIMBILIYA IPOPIA: “Kalei noluembia kese umwe namukuavo. Kalei ovatete kokukala nehumbilo kese umwe namukuavo.” (Romanos 12:10) Onkhalelo utehelela yakolela unene. Noñgonoka etyi una muelinepa nae asoka, “okulilingila okankhenda . . . nomutima weliola.” (1 Pedro 3:8; Tiago 1:19) Uhelikembese vala ngoti utehelela. Tyina tyitavela, pakela ponthele etyi ukahi nokulinga, otehelela nawa una muelinepa nae, ine mupula inkha tyitavela ha mupopie nawa. Inkha usoka okuti muna okulingila kumwe ovipuka na una muelinepa nae, ohemutale ngondyale yove “kumakanyauka okunumana.”​—Eclesiastes 7:9.

OITYI UNA OKULINGA:

• Tehelela nawa, no putyina etyi apopia katyikuhambukiswa

• Tehelela oityi onondaka mbae mbuhangununa. Tala kotyipala tyae tyina apopia, nokutehelela oñgeni ondaka yae ikahi

ETYI OMBIMBILIYA IPOPIA: “Kese vilinga viundapwa unene vieta ouwa, mahi una upopia vala weta oluhepo.” (Provérbios 14:23) Okutavela vala etokolo liaviuka katyituuka. Wesukisa okulandula etyi onwe vevali muatokola. Otyo tyakutikinya okuundapa unene nokulinga ononkhono, mahi matyieta olumono. (Provérbios 10:4) Inkha muundapela kumwe, mamukala “nondyambi ongwa” mokonda yokuundapa kuenyi unene.​—Eclesiastes 4:9.

OITYI UNA OKULINGA:

• Lipakeleimo oityi kese umwe ena okulinga opo mutetulule otyitateka tyenyi

• Tualako okutala etyi wevila okulinga