Namphila mulinga atyiho opo motyinepo no mombunga mukale ehambu, ovipuka viepuiya ankho muhakevela vipondola okumupola ehambu, mavimoneka. (Eclesiastes 9:11) Noluembia Huku waava ombatelo tyina pamoneka ovitateka. Inkha ulandula onondonga Mbovihonekwa, ove nombunga yove mamutyivili okufinda ovitateka, alo umwe vina vimoneka ngoti ovinene.

ETYI OMBIMBILIYA IPOPIA: “Pakulei omasukalalo enyi aeho ku Huku, mokonda oe wasuka nonwe.” (1 Pedro 5:7) Apeho hinangela okuti Huku haeko uvelwa onombei mokonda yovitateka viove. (Tiago 1:13) Tyina utualako okufuena vali kwe, mekukuatesako. (Isaías 41:10) “Omutima wenyi unengulilei kwe.”​—Salmo 62:8.

Movasi eungumaneso tyina utanga nokulilongesa Ombimbiliya ononthiki ambuho. Okulinga ngotyo, motale oñgeni Jeova “etuungumanesa mononkhumbi mbetu ambuho.” (2 Coríntios 1:3, 4; Romanos 15:4) Jeova walaa okukuavela “ombembwa ya Huku, ipona onondunge nomalusoke aeho.”​—Filipenses 4:6, 7, 13.

OITYI UNA OKULINGA:

• Likuambela ku Jeova opo ekukuateseko okukala tyahiliya nokusoka nawa

• Tala vali nawa etyi upondola okulinga nokuholovona etyi tyaviuka molandula

ETYI OMBIMBILIYA IPOPIA: “Omutima walongoka uvasa ekungunyiko, iya omakutwii ovanongo aovola enoñgonoko.” (Provérbios 18:15) Tala ovipuka aviho. Tala etyi kese umwe mombunga yove esukisa. Tomphola navo. Vetehelela.​—Provérbios 20:⁠5.

Oityi matulingi tyina umwe mombunga amankhi? Uhelityilike okulila. Hinangela okuti alo umwe Jesus “walilile.” (João 11:35; Eclesiastes 3:4) Okupululukwa nawa, nokulala tupu tyakolela unene. (Eclesiastes 4:6) Otyo matyikukuatesako okufinda otyitateka otyo.

OITYI UNA OKULINGA:

• Tyina otyitateka tyiheneye, kala notyituwa tyokutomphola nombunga yove. Tyina otyitateka tyameya, matyivepameka okutomphola nove

• Popia na vakuenyi vakalele notyitateka ngotyo

ETYI OMBIMBILIYA IPOPIA: “Epanga liotyotyili una ohole omuvo auho, omukuatate watyitua pala okuvatela pomuvo wononkhumbi.” (Provérbios 17:17) Omapanga pamwe ahanda okukuatesako, mahi kavetyii oñgeni mavalingi. Uhelikondole okuvepopila etyi ove wesukisa. (Provérbios 12:25) Tupu, ovola vana vanoñgonoka nawa Ombimbiliya opo vekukuateseko okupameka oupanga wove na Huku. Ehongolelo mavekuavela liatunda Mombimbiliya, malikukuatesako.​—Tiago 5:14.

Movasi ombatelo wesukisa inkha apeho uliongiya novanthu vena ekolelo liotyotyili mu Huku nokuyumba onthumbi momilao viae. Tupu mavasi epameko tyina ukuatesako vakuenyi muetyi vesukisa. Vepopila ekolelo liove mu Jeova no momilao viae. Tualako okulinga ononkhono mbokukuatesako vakuenyi, iya uheliyapule ku vana vekuhole nokuesuka nove.​—Provérbios 18:1; 1 Coríntios 15:58.

OITYI UNA OKULINGA:

• Tomphola nawa nomapanga nokuyeka vekukuateseko

• Popia umwe etyi uhanda, nokupopia otyili