OMALONGESO 5
Elivangelo Patyi Huku ena Noohi?
1. Omokonda Yatyi Huku Alingila Oohi?
Jeova waavela oohi komulume nomukai. Oohi eumbo lietu. Ngotyo, ovalinepi votete, Andau na Eva, ankho kavaligilwe opo veyulise keulu. Huku ankho walinga onoandyu opo mbukale keulu. (Jó 38:4, 7) Anthi, Huku wapakele omulume wotete momphangu ongwa yombembwa ankho itiwa otyikunino tyo Endene. (Gênesis 2:15-17) Jeova waavelele Andau novana vae ankho mavatyitwa, ekevelelo liokukala nomuenyo uhapu kombanda yoohi.—Tanga Salmos 37:29; 115:16.
Ponthyimbi omphangu yombembwa ankho otyikunino tyo Endene vala. Ovalinepi votete ankho vena okuyulisa ovana vavo kombanda yoohi. Mokueenda kuomuvo, ñgeno vaundapa oohi aiho aikala omphangu yombembwa. (Gênesis 1:28) Oohi kamaihanyuako nalumwe. Maikala apeho eumbo liovanthu.—Tanga Salmo 104:5.
Tala ovidiu yati Omokonda yatyi Huku atungila Ohi?
2. Omokonda yatyi oohi hono hamphangu yombembwa?
Andau na Eva kavetavelele ku Huku, moluotyo Jeova evetaata motyikunino. Omphangu yombembwa yavomba, iya petupu omunthu wetyivila okuipindulapo. Ombimbiliya yati: “Oohi yapakulwa pomaoko ondingavivi.”—Jó 9:24.—Tanga Gênesis 3:23, 24.
Okuti Jeova wayekapo elivangelo liae liotete ankho ahandela ovanthu? Au! Oe una Epondolo aliho. Kapondola okuponya. (Isaías 45:18) Jeova makondola ovanthu konkhalelo evehandelele.—Tanga Salmo 37:11, 34.
3. Oñgeni Omphangu Yombembwa maipinduluapo?
Omphangu Yombembwa maipinduluapo kombanda yoohi, tyina mokueenda kuovilinga Vioutumini wa Jesus. Movita vitiwa o Armagedon, Jesus makahongolela onoandyu mba Huku opo ahanyeko onondyale mba Huku ambuho. Konyima apake Satanasi mokaleya omanima 1.000. Ovanthu va Huku mavakahupa kehanyu olio, mokonda Jesus mevehongolela nokuveamena. Mavakakala nomuenyo uhapu Momphangu Yombembwa kombanda yoohi.—Tanga Revelação [Apocalipse] 20:1-3; 21:3, 4.
4. Onalupi ononkhumbi mambukapwa?
Onalupi Huku makamanako ovivi kombanda yoohi? Jesus waava “enyingilikilo” malilekesa okuti onthyulilo ikahi popepi. Onkhalelo youye hono ipaka ovanthu motyiponga, nokulekesa okuti pahe tukahi ‘konthyulilo youye.’—Tanga Mateus 24:3, 7-14, 21, 22.
Mokueenda kuomanima 1.000 Jesus keulu makatumina oohi, oe makanyimako ononkhumbi ambuho. (Isaías 9:6, 7; 11:9) Jesus makakala Ohamba no Munene-nakwa iya akanyimapo ononkhali mba vana vehole Huku. Ngotyo, menyina lia Jesus, Huku makamanako omauvela, nokukulupa, no nonkhia.—Tanga Isaías 25:8; 33:24.
5. Olie makakala Momphangu Yombembwa?
Mondyuo Yomaliongiyo, mokavasa ovanthu vehole Huku nokulilonga okumuhambukiswa
Ovanthu vana vetavela ku Huku, mavakakala Momphangu Yombembwa. (1 João 2:17) Jesus watuma ovalanduli vae opo vaovole ovanthu ovatendi, nokuvelongesa opo vakale ovanthu vapandwa na Huku. Hono, Jeova ukahi nokupongiya ovanthu ovanyingi, opo vakakale nomuenyo Momphangu Yombembwa kombanda yoohi. (Sofonias 2:3) Mondyuo Yomaliongiyo yo Nombangi mba Jeova, ovanthu valongeswa okukala ovalume no vohe ovawa, novakai no voina ovawa. Ovana no vohe, vafendela kumwe nokulongeswa oñgeni mavapolo ouwa konondaka onongwa.—Tanga Miquéias 4:1-4.
