Huku ukonga ovanthu vomalongo aeho opo vafuena kwe melikuambelo. (Salmo 65:2) Mahi, oe katehelela, ine ketavela omalikuambelo aeho. Mongeleka, katehelela omalikuambelo omulume utekula onya omukai wae. (1 Pedro 3:7) Tupu, tyina ankho ova Isilayeli vatualako okulinga ovivi, Huku ankho katehelela omalikuambelo avo. Tyimoneka okuti, elikuambelo elao limwe enene. Anthi, Huku utehelela omalikuambelo alo umwe a vana valinga ononkhali inkha velivela.​—Tanga Isaías 1:15; 55:7.

Tala ovidiu yati Okuti Huku Utehelela Omalikuambelo Aeho?

Elikuambelo onthele yefendelo lietu. Ngotyo tuesukisa okulikuambela vala ko Mupakeko wetu, Jeova. (Mateus 4:10; 6:9) Mokonda tuvakuankhali, tuesukisa okulikuambela menyina lia Jesus, mokonda oe wankhila ononkhali mbetu. (João 14:6) Jeova kahande tuwane-wane omalikuambelo tuapaka momutwe ine ahonekwa. Oe uhanda tulikuambele okupola momutima wetu.​—Tanga Mateus 6:7; Filipenses 4:6, 7.

Omupakeko wetu utehelela alo umwe omalikuambelo alingilwa momutima. (1 Samuel 1:12, 13) Oe utuita tulikuambele apeho, komuhuka, no komutenya, no kongulohi, na tyina tulia, no putyina tuna ovitateka.​—Tanga Salmo 55:22; Mateus 15:36.

Okufuena ku Huku katyapepukile, mokonda tukahi pokati kovanthu vehena ekolelo mu Huku, valinga omukuele omilao viae konthele yombembwa pano pohi. (2 Timóteo 3:1, 4; 2 Pedro 3:3, 13) Moluotyo, tuesukisa okuliongiya novakuatate vetu opo tulipameke, tupu navo vesuka nonthue.​—Tanga Hebreus 10:24, 25.

 Okuliwaneka novanthu vehole Huku tyitukuatesako okufuena ku Huku. Omaliongiyo Onombangi mba Jeova, etuavela onomphitilo mbokupamekwa nekolelo lia vakuetu.​—Tanga Romanos 1:11, 12.

Ove upondola okufuena ku Jeova mokusokolola nawa etyi ukahi nokulilongesa Mondaka yae. Soka nawa oityi upondola okulilongesila kovilinga viae, nehongolelo liae, nomilao viae. Okulikuambela, nokusokolola nawa, tyitukuatesako okupanda oluembia lwa Huku nounongo wae.​—Tanga Josué 1:8; Salmo 1:1-3.

Ove mofuene vala ku Huku inkha umuyumba onthumbi, nokukolela mwe. Mahi ekolelo likahi ngotyipuka tyina omuenyo tyesukisa okutekulwa. Ove una okutualako okutekula ekolelo liove, mokusokolola nawa etyi tyekutavelesa ovipuka ukahi nokulilongesa.​—Tanga Mateus 4:4; Hebreus 11:1, 6.

Jeova wasuka na vana vemuhole. Oe uveamena ku kese tyimwe tyipondola okunyona ekolelo liavo nekevelo liavo liomuenyo uhapu. (Salmo 91:1, 2, 7-10) Jeova utulondola konthele yonondyila mbupondola okunyona ekongoko lietu nehambu lietu. Jeova utulongesa onkhalelo ongwa yomuenyo.​—Tanga Salmo 73:27, 28; Tiago 4:4, 8.