Huku yotyotyili Omupakeko wovipuka aviho. Oe utupu onthyimbi nonthyulilo. (Salmo 90:2) Huku Ondyivindyivi yonondaka onongwa mbuvasiwa Mombimbiliya. (1 Timóteo 1:11) Mokonda Huku wetuavela omuenyo, oe vala tuna okufenda.​—Tanga Revelação [Apocalipse] 4:11.

Kutupu omunthu unemone Huku mokonda Huku Ospilitu, tyilekesa okuti omuenyo wae wavilapo vali tyipona ovipuka aviho vina omuenyo kombanda yoohi. (João 1:18; 4:24) Anthi, tupondola okupunga oñgeni Huku ekahi, okutalela kovipuka alinga. Mongeleka, tyina tutala evi atunga novinyango vielikalaila, no nonthemo, vitulekesa okuti Huku una oluembia nounongo. Ounene wouye, utulekesa epondolo lia Huku.​—Tanga Romanos 1:20.

Tupondola okunoñgonoka vali onkhalelo Huku atuwa tyina tutanga Ombimbiliya. Mongeleka, itupopila oityi Huku ehole netyi eyele, oñgeni atekula ovanthu, no ñgeni atetulula kese tyitateka.​—Tanga Salmo 103:7-10.

Jesus wati: “Tate yetu keulu, enyina liove lisukukiswe.” (Mateus 6:9) Namphila Huku ena omanyina omanyingi enkhimano, mahi oe una vala enyina like. Kese laka, ovanthu vatumbula enyina olio mononkhalelo mbelikalaila. Molunyaneka liihanwa okuti “Jeova.” Mahi, ovanthu vamwe veliihana okuti “Yahweh.”​—Tanga Salmo 83:18.

Mono Mbimbiliya ononyingi enyina lia Huku, ovanthu velipolamo avapingiyapo Tatekulu ine Huku. Mahi, etyi Ombimbiliya yahonekwa, ankho enyina lia Huku livasiwamo ovikando vihika po 7.000. Jesus  wanoñgonokesile enyina lia Huku, etyi alongesa ovanthu konthele ya Huku.​—Tanga João 17:26.

Tala ovidiu yati Huku Una Enyina?

Okuti ononkhumbi ononyingi ovanthu vamona mbulekesa okuti Jeova o Huku yokuhasukile nonthue? Ovanthu vamwe vapopia okuti Huku utumonesa ononkhumbi opo etulole. Mahi, otyo hatyiliko.​—Tanga Tiago 1:13.

Huku uhumba ovanthu mokuveavela epondolo liokuliholovonena. Okuti tupanda epondolo olio mokuholovona okuumbila Huku? (Josué 24:15) Anthi, ovanyingi vaholovona okulinga vakuavo ovipuka ovivi, moluotyo ovanthu ovanyingi vamona ononkhumbi. Tyina Jeova atala ovipuka ovio ovivi, tyimuihama unene.​—Tanga Gênesis 6:5, 6.

Jeova o Huku wokuesuka nonthue. Oe uhanda tukale nehambu momuenyo. Apa katutu makamanako ononkhumbi na vana vembuetako. Anthi, nkhele una ehunga ewa liokuyekelela ononkhumbi okamuvo kehehi. Melongeso 8, matukelilongesa ehunga patyi ena.​—Tanga 2 Pedro 2:9; 3:7, 13.

Jeova utukonga opo tufuene kwe, mokupopia nae melikuambelo. Oe wesuka na kese umwe puonthue. (Salmo 65:2; 145:18) Jeova uhanda okutuevela. Oe weete ononkhono tulinga opo tumuhambukiswe, namphila pamwe tulinga oviponyo. Ngotyo, namphila tuvakuankhali, tupondola okukala noupanga omuwa na Huku.​—Tanga Salmo 103:12-14; Tiago 4:8.

Mokonda Jeova wetuavela omuenyo, tuesukisa okukala vali nohole nae, tyipona ohole na kese munthu. (Marcos 12:30) Putyina ulekesa okuti uhole Huku, mokulilongesa vali konthele yae nokulinga etyi ahanda, ove mofuene vali kwe.​—Tanga 1 Timóteo 2:4; 1 João 5:3.