Tyelikalela na kese munthu wopahitu, Jesus wali oandyu keulu puetyi eheneye okutyitwa pano pohi. (João 8:23) Oe watetekela okutungwa na Huku, iya akuatesako Huku okulinga ovipuka aviho ovikuavo. Oe vala Jeova atunga aike muene, otyo aihanenwa okuti Omona “wongunga” wa Huku. (João 1:14) Jesus ankho omutumwa-ndaka wa Huku, otyo aihanenwa okuti “Ondaka.”​—Tanga Provérbios 8:22, 23, 30; Colossenses 1:15, 16.

Huku watumine Omona wae pano pohi, mokupola omuenyo wae keulu eupake meimo liomumphembela omu Judeu ankho utiwa o Maliya. Moluotyo, Jesus ankho utupu he pano pohi. (Lucas 1:30-35) Jesus weile pano pohi (1) opo alongese otyili konthele ya Huku, (2) opo etulekese oñgeni matulingi ehando lia Huku na tyina tutumbukilwa no nonkhumbi, iya (3) opo aave omuenyo wae uhena onkhali ‘ngofeto yeyovo.’​—Tanga Mateus 20:28.

Ofeto yeyovo, ofeto yaawa pala okuyovola omunthu kononkhia. (Êxodos 21:29, 30) Ononkhia nokukulupa ankho havioko Huku ahandelele ovanthu. Oñgeni tuetyinoñgonoka? Huku wapopilile omulume wotete Andau, okuti inkha alinga etyi Ombimbiliya iihana okuti “onkhali,” mankhi. Ngotyo, inkha Andau kalingile onkhali, ñgeno kankhile. (Gênesis 2:16, 17; 5:5) Ngetyi Ombimbiliya ipopia, ononkhia “mbanyingila” mouye mokonda ya Andau. Moluotyo, Andau watambulisa ovana vae aveho onkhali no nonkhia yaeta. Onthue tuasukisa ofeto yeyovo opo tuyovoke mononkhia tuapiñgana  ku Andau.—Tanga Romanos 5:12; 6:23.

Olie ankho una okuava ofeto yeyovo, opo tuyovoke mononkhia? Tyina onthue tunkhia, tufeta vala ononkhali mbetu muene. Nawike omunthu omukuankhali upondola okufeta ononkhali mbavakuavo.—Tanga Salmo 49:7-9.

Tyelikalela nonthue, Jesus wali omunthu uhena onkhali. Moluotyo, oe ankho kesukisa okunkhila ononkhali mbae, mokonda nalumwe alingile onkhali. Anthi, Jesus wankhila ononkhali mba vakuavo. Huku walekesa oluembia olunene ena novanthu, mokutuma Omona wae opo eye okunkhia mokonda yetu. Tupu Jesus walekesa ohole ena nonthue mokuetavela ku Tate yae, iya eya okuava omuenyo wae mokonda yononkhali mbetu.—Tanga João 3:16; Romanos 5:18, 19.

Tala ovidiu yati Omokonda Yatyi Jesus Ankhila?

Etyi ali pano pohi, Jesus wavelulile ovavei, nokututilisa wokuankhia, nokuyovola ovanthu movitateka ovinene. Ngotyo, oe walekesa etyi makalinga komutwe pala ovanthu aveho vokutavela. (Mateus 15:30, 31; João 5:28) Etyi Jesus ankhia, Huku emupindulapo nomuenyo wo keulu. (1 Pedro 3:18) Iya Jesus akevelela kokulio kwa Huku alo Jeova emuavela ounene wokukala Ohamba pala okutumina kombanda yoohi aiho. (Hebreus 10:12, 13) Pahe Jesus Ohamba keulu, iya ovalanduli vae vekahi nokuivisa onondaka onongwa ouye auho.—Tanga Daniel 7:13, 14; Mateus 24:14.

Apa katutu, Ohamba Jesus makaundapesa ounene wae opo amaneko ononkhumbi ambuho na vana vembueta. Aveho vayumba onthumbi mu Jesus mokutavela kwe, mavakapewa omuenyo momphangu yombembwa kombanda yoohi.—Tanga Salmo 37:9-11.