Onondaka onongwa mbutunda ku Jeova, Huku yehambu, una uhanda onombunga mbukale nehambu. (1 Timóteo 1:11) Oe waetako otyinepo. Otyinepo tyahonekwa nombonge tyakolela pala ehambu mombunga, mokonda tyieta oupanga wapama nonkhalelo ongwa pala okutekula ovana. Ovakristau vesukisa okuhumba ovitumino vio tyilongo, konthele yokuhonekesa otyinepo. — Tanga Lucas 2:1, 4, 5

Oñgeni Huku atala otyinepo? Oe uhanda omulume nomukai vokuelinepa, vatualeko okukala kumwe apeho. Jeova uhanda ovalume novakai vokuelinepa, vakale ovakuatyili kese umwe na mukuavo. (Hebreus 13:4) Okulihenga Jeova utyiyele. (Malaquias 2:16) Mahi, oe utavela vala Ovakristau velihenge iya avakanepa vali, inkha umwe puvo walinga oumbalehi.​—Tanga Mateus 19:3-6, 9.

Jeova walinga ovalume novakai opo velikuateseko kese umwe na mukuavo motyinepo. (Gênesis 2:18) Mokonda omulume onkhalamutwe yombunga, oe una otyilinga tyokutekula ombunga nokuvelongesa konthele ya Huku. Oe wesukisa okukala nohole unene nomukai wae. Ovalume novakai vavo vesukisa okukala nehumbilo noluembia kese umwe na mukuavo. Mokonda ovalume novakai vavo aveho ovakuankhali, vena okulilonga okuevela, tyetyi oyo osapi yehambu motyinepo.​—Tanga Efésios 4:31, 32; 5:22-25, 33; 1 Pedro 3:7.

Inkha muna ovitateka motyinepo tyenyi, muesukisa okulikuatesila opo mulitekule nohole. (1 Coríntios  13:4, 5) Ondaka ya Huku kaipopi okuti onkhalelo ongwa yokutetulula ovitateka vihole okumoneka motyinepo, okuliyapuka.​—Tanga 1 Coríntios 7:10-13.

Jeova uhanda onwe mukale nehambu. Oe umuavela onondonga onongwa mbulekesa oñgeni mamukala nomuenyo omuwa poukuendye. Uhanda mupole ouwa nounongo kongeleka ongwa yo voho. (Colossenses 3:20) Tupu, Jeova uhanda mukale nehambu liokulinga ovipuka pala Omupakeko wenyi Nomona wae.​—Tanga Eclesiastes 11:9–12:1; Mateus 19:13-15; 21:15, 16.

Onwe muesukisa okuundapa nononkhono opo mukale neumbo nokulandela ovana okulia, nomuvalo. (1 Timóteo 5:8) Mahi opo ovana venyi vavase ehambu, tupu muesukisa okuvelongesa okukala nohole na Huku, nokutavela okulongeswa nae. (Efésios 6:4) Ohole yenyi na Huku ipondola okuhindila omitima viovana venyi okumuhetekela. Tyina onondonga mbenyi mbutunda Mondaka ya Huku, matyikuatesako unene ovana venyi okusoka monkhalelo yaviuka.​—Tanga Deuteronômio 6:4-7; Provérbios 22:6.

Inkha mupandula ovana venyi nokuvepa ondundo, matyivekuatesako. Tupu vesukisa okulongwa nokuviyulwa. Okulinga ngotyo tyivekuatesako okulityilika ovituwa vipondola okuvepola ehambu. (Provérbios 22:15) Mahi katyisukisa okulonga ovana nonya.​—Tanga Colossenses 3:21.

Onombangi mba Jeova valinga omikanda ominyingi, pala okukuatesako ovohe novana. Omikanda ovio vipolwa mo Mbimbiliya.​—Tanga Salmo 19:7, 11.