Omupakeko wetu, omunongo tyipona onthue. Mokonda o Tate wokuna oluembia wasuka nonthue. Tupu, ketulingile opo tulitumine onthue muene. (Jeremias 10:23) Moluotyo, ngetyi omona omututu esukisa okuhongolelwa na he, nonthue tuesukisa okuhongolelwa na Huku. (Isaías 48:17, 18) Ovitumino vio Mbimbiliya otyawa tyitunda ku Huku.​—Tanga 2 Timóteo 3:16.

Ovitumino nonondonga mba Jeova, vitulongesa onkhalelo yaviuka yomuenyo pahetyino, nokutulekesa oñgeni tupondola okukamona ondyambi ihapu komuntwe. Mokonda Huku oe wetueta kouye, tyaviuka tutavele nolupandu ehongolelo liae.​—Tanga Salmos 19:7, 11; Revelação [Apocalipse] 4:11.

Onondonga mbo Mbimbiliya mbulekesa etyi Huku ahanda tulinge mononkhalelo ononyingi. Ovitumino ovikuavo vilekesa haunene otyipuka tyailikwa. (Deuteronômio 22:8) Onthue tuna okupunga nokunoñgonoka oñgeni onondonga mbo Mbimbiliya mbutupopila etyi tuna okulinga. (Provérbios 2:10-12) Mongeleka, Ombimbiliya ilongesa okuti omuenyo otyiawa tuapewa na Huku. Onondonga ombo, mbupondola okutuhongolela, meumbo, no kovilinga, no moungendi. Okunoñgonoka okuti omuenyo otyiawa, tyitukuatesako okuliyunga nawa.​—Tanga Atos 17:28.

Jesus wapopia ovitumino vivali via viakolela vali. Tyotete tyilekesa okuti ovanthu vapewa omuenyo opo vanoñgonoke Huku nokumuumbila nekolelo. Otyitumino otyo tyotete tyesukisa okutuhongolela pokulinga omatokolo etu aeho. (Provérbios 3:6) Vana vaendela motyitumino otyo  nomutima auho, vakala omapanga a Huku, nokukamona ehambu liotyotyili, omuenyo uhapu.​—Tanga Mateus 22:36-38.

Otyitumino tyavali, tyiava onondonga mbutukuatesako okukala noupanga nombembwa na vakuetu. (1 Coríntios 13:4-7) Okuendela motyitumino otyo tyavali, tyakutikinya okuhetekela onkhalelo Huku atekula ovanthu.​—Tanga Mateus 7:12; 22:39, 40.

Ovitumino vio Mbimbiliya vilongesa onombunga okulikuata okapandi nohole. (Colossenses 3:12-14) Ondaka ya Huku tupu iyakulila onombunga, mokuava onondonga ononkhuavo pala okutuhongolela, mbulekesa okuti vokuelinepa vesukisa okutualako.​—Tanga Gênesis 2:24.

Mokulandula ovitumino vio Mbimbiliya, matuyakulila omalumono etu nomalusoke. Mongeleka, ovahona vamwe vahanda vali ovaundapi ovakuatyili vaendela movitumino vio Mbimbiliya, nokuna ombili. (Provérbios 10:4, 26; Hebreus 13:18) Ondaka ya Huku itulongesa okuhambukilwa etyi tuna, nokupanda vali oupanga wetu na Huku tyipona omalumono.​—Tanga Mateus 6:24, 25, 33; 1 Timóteo 6:8-10.

Okuendela movitumino via Huku, tyipondola okuyakulila ekongoko lietu. (Provérbios 14:30; 22:24, 25) Mongeleka, okutavela ovitumino via Huku konthele younkholwa, tyituyakulila komauvela no koviponga. (Provérbios 23:20) Jeova uyeka ovanthu vanwe ovikunwa, mahi uhanda vanwe vala okueleka. (Salmo 104:15; 1 Coríntios 6:10) Ovitumino via Huku kavitukuatesako vala okuyunga nawa ovituwa vietu, mahi tupu nomalusoke etu. (Salmo 119:97-100) Ngotyo, Ovakristau votyotyili kavahumbile vala ovitumino via Huku mokonda viveetela ouwa. Anthi, vevihumba mokonda vena onthilo na Jeova.​—Tanga Mateus 5:14-16.