Ovivi viahimbika kombanda yoohi etyi Satanasi apopia ounkhembi wotete. Potete Satanasi ankho oandyu ihena onkhali, mahi “katualeleko okukala motyili.” (João 8:44) Oe ankho uhanda efendelo liatokala vala Huku. Satanasi wakemba Eva omukai wotete, emuhindila okutavela kwe, aanye ku Huku. Andau elipake kumwe na Eva okuanya ku Huku. Etyi tyalinga Andau tyaeta ononkhumbi nononkhia.—Tanga Gênesis 3:1-6, 19.

Etyi Satanasi ahongiliya Eva okuaanya ku Huku, wahimbika okutyitukilapo Ouhamba wa Huku, ine onkhalelo ya Huku yokutumina. Ovanthu ovanyingi velipaka kumwe na Satanasi okuanya Okutuminwa na Huku. Ngotyo Satanasi wakala “omutumini wouye.”—Tanga João 14:30; 1 João 5:19.

Ovilinga aviho via Huku viaviuka nawa. Ovanthu no noandyu Huku alinga, ankho vapondola okutavela nawa-nawa ovitumino via Huku. (Deuteronômio 32:4, 5) Huku wetutunga nepondolo liokuholovona okulinga etyi tyaviuka netyi tyapenga. Epondolo olio, lituavela omphitilo yokulekesa inkha tuhole Huku.—Tanga Tiago 1:13-15; 1 João 5:3.

Mokueenda kuomuvo umwe, Jeova ukahi nokuyekelela oumphuki ovanthu valingila ouhamba wae wavilapo. Omokonda yatyi? Opo alekese okuti tyina ovanthu vatumina tyihena Huku katyiveetela ouwa. (Eclesiastes 7:29; 8:9)  Pahe palamba omanima 6.000 outumini wovanthu, iya otyili tyimoneka. Ovatumini vovanthu kavetyivilile okumanako ovita, noungangala, novivi nomauvela.—Tanga Jeremias 10:23; Romanos 9:17.

Tyelikalela noutumini wovanthu, outumini wa Huku wetela ouwa vana veutavela. (Isaías 48:17, 18) Apa katutu, Jeova mamaneko omautumini aeho ovanthu. Ovanthu vana vaholovona okutuminwa na Huku, ovo vala mavakakala kombanda yoohi.—Isaías 11:9.—Tanga Daniel 2:44.

Tala ovidiu yati Omokonda Yatyi Huku Ayekelelako Ononkhumbi?

Satanasi wati nawike omunthu matualako okuumbila Jeova nohole yotyotyili. Okuti uhanda okulekesa okuti Satanasi wakemba? Ove upondola! Huku noumphua-lundo wae wavela atuho omuvo, opo tulekese inkha tuapanda outumini wa Huku ine owovanthu. Onkhalelo tutyinda omuenyo wetu, mailekesa etyi tuaholovonapo.—Tanga Jó 1:8-12; Provérbios 27:11.

Tupondola okuholovona Okutuminwa na Huku, inkha tulilongesa otyili nokuendela mefendelo lielikuata Nondaka yae Ombimbiliya. (João 4:23) Tupu, tupondola okuanya okutuminwa na Satanasi, inkha tulityilika okulipaka mopulitika no movita, ngetyi Jesus alingile.—Tanga João 17:14.

Satanasi uundapesa epondolo liae opo ahongiliye ovanthu okulinga oundalelapo novivi ovikuavo. Tyina tuanya ovituwa viatyo ovio, omapanga etu nombunga, pamwe vetulinga omukuele ine okutuyala. (1 Pedro 4:3, 4) Moluotyo, tuna okuholovona. Okuti matulingi oupanga novanthu vehole Huku? Matutavela ovitumino via Huku vionondunge noluembia? Inkha tulinga ngotyo, matulekesa okuti Satanasi wakemba, etyi ati nawike malingi etyi Huku apopia.—Tanga 1 Coríntios 6:9, 10; 15:33.

Ohole Huku ena novanthu, ilekesa nawa okuti ovivi nononkhumbi mavipuko. Vana valekesa okuti vetavela ku Huku, mavakakala nomuenyo uhapu pano pohi.—Tanga João 3:16.