Huku waonganekele ovana vohongoi Abraiau avakala elongo, nokuveavela ovitumino. Oe aihana elongo olio okuti o “Isilayeli,” eveavela otyilinga tyokuamena efendelo liotyotyili, nondaka yae. (Salmo 147:19, 20) Moluotyo, ovanthu vomalongo aeho ankho vapondola okupola ouwa ko Isilayeli.​—Tanga Gênesis 22:18.

Huku waholovonene ova Isilayeli opo vakale onombangi mbae. Onkhalelo yavo kohale, ankho ilekesa okuti tyina ovanthu vetavela ovitumino via Huku tyiveetela ouwa. (Deuteronômio 4:6) Ngotyo, ovanthu ovakuavo ankho vapondola okunoñgonoka Huku yotyotyili mokonda yo va Isilayeli.​—Tanga Isaías 43:10, 12.

Mokueenda kuomuvo, Huku ayekepo okupanda ova Isilayeli, iya pelongo olio Jeova apingiyapo ewaneno lio Vakristau. (Mateus 21:43; 23:37, 38) Hono, pomphangu yo va Isilayeli, paumbila Ovakristau votyotyili onombangi mba Jeova.​—Tanga Atos 15:14, 17.

Jesus waonganekele ovalanduli vae opo vaivise nokulinga ovalongwa momalongo aeho. (Mateus 10:7, 11; 24:14; 28:19, 20) Ovilinga ovio viokuivisa vikahi nokumanuhuka pahe, konthyulilo youye uno. Hono, Jeova ukahi nokuwaneka mefendelo liotyotyili otyikando tyotete, ovanthu ovanyingi vatunda momalongo aeho. (Revelação [Apocalipse] 7:9, 10) Tupu, Ovakristau votyotyili vaonganekwa opo velipameke otyikati nokulikuatesako. Ouye auho, vena oprograma yelifwa yokulilongesa Ombimbiliya momaliongiyo avo.​—Tanga Hebreus 10:24, 25.

Mo 1870, otyikundyi tyovanthu vehehi ovalilongesi Vombimbiliya, tyahimbika okunkhindulula otyili Tyombimbiliya ankho tyavomba kohale. Ankho vanoñgonoka okuti Jesus waonganeka ewaneno lio Vakristau opo vaivise. Moluotyo, vahimbika ovilinga viokuivisa Ouhamba wa Huku ouye auho. Mo 1931, vahimbika okuihanwa okuti Onombangi mba Jeova.​—Tanga Atos 1:8; 2:1, 4; 5:42.

Pomuvo wono apostolu, omawaneno Ovakristau movilongo ovinyingi ankho vapola ouwa kehongolelo liononkhalamutwe mbo nombangi mba Jeova, ankho vaimbuka okuti Jesus Omutwe weuaneno. (Atos 16:4, 5) Tupu hono, Onombangi mba Jeova ouye auho vapola ouwa kehongolelo lio Nonkhalamutwe mbo Nombangi mba Jeova, ovakulu vokualongoka. Ovakulu ovo, vahongolela ono filiyale mbo Nombangi mba Jeova movilinga viokupitiya, nokulinga omikanda viokulongesa Ombimbiliya, nokuviavununa, momalaka alamba po 600. Ngotyo, Ononkhalamutwe ombo, mbuava epameko lio Vihonekwa, nokuhongolela omawaneno alamba po 100.000 ouye auho. Kese ewaneno, lina ovakulu valongoka vekahi komutwe. Ovakulu ovo vakuatesako nohole otyunda tya Huku.​—Tanga 1 Pedro 5:2, 3.

Onombangi mba Jeova vaongana pala okuivisa onondaka onongwa nokulinga ovalongwa. Ngetyi ankho tyilinga ono apostolu, nonthue tuivisa umbo na umbo. (Atos 20:20) Nonthue tuliava pala okulongesa Ombimbiliya ovanthu ovakuatyili vehole otyili. Mahi, Onombangi mba Jeova heonganoko vala. Onthue tumbunga yokuna Tate woluembia. Tuvakuatate no nomphange vokuesuka kese umwe na mukuavo. (2 Tessalonicenses 1:3) Ovanthu va Jeova, ombunga yokuna vali ehambu kombanda yoohi, mokonda vaonganekwa opo vahambukiswa Huku nokukuatesako vakuavo.​—Tanga Salmo 33:12; Atos 20:35.