OMALONGESO 7
Ouhamba wa Huku Oityi?
1. Ouhamba wa Huku Oityi?
Oityi tyikalesa Jesus Ohamba yaviuka?—MARCOS 1:40-42.
Ouhamba wa Huku outumini ukahi keulu. Mauya okupingako omautumini aeho, nokufuisapo ehando lia Huku, opo lilingwe keulu na pano pohi. Onondaka ombo konthele Youhamba wa Huku, onongwa. Ouhamba oo, mauya okufuisapo etyi ovanthu vesukisa, outumini omuwa.—Tanga Daniel 2:44; Mateus 6:9, 10; 24:14.
Ouhamba una okukala nohamba. Jeova waholovona Omona wae Jesus Kristu, opo akale Ohamba Youhamba Wae.—Tanga Revelação [Apocalipse] 11:15.
Tala ovidiu yati Ouhamba wa Huku Oityi?
2. Jesus Ohamba yaviuka mokonda yatyi?
Omona wa Huku Ohamba yaviuka, mokonda una oluembia, nokuapamena muetyi tyaviuka. (João 1:14) Tupu, Jesus una epondolo enene liokukuatesako ovanthu, mokonda makala keulo, mahi matumina oohi aiho. Moluotyo, etyi oe atutiliswa, walonda keulu apumphama kokulio kwa Jeova opo akevelele. (Hebreus 10:12, 13) Okuhulililako, Huku wemupa ounene opo ahimbike okutumina.—Tanga Daniel 7:13, 14.
3. Ovalie mavakatumina na Jesus?
Jesus matumina keulu notyikundyi tyovanthu vaholovonwa na Huku, vaihanwa okuti “onosandu.” (Daniel 7:27) Onosandu mbotete mbaholovonwa, ono apostolu mbekolelo mba Jesus. Alo hono Jeova utualako okuholovona ovalume novakai vekolelo opo vakale onosandu. Nga Jesus, navo vekahi nokututiliswa nolutu lwo keulu.—Tanga João 14:1-3; 1 Coríntios 15:42-44.
Ovanthu veñgapi mavaende keulu? Jesus weveihana okuti “okahambo okatutu.” (Lucas 12:32) Okuhulililako mavakatuuka 144.000. Mavakatumina oohi aiho na Jesus.—Tanga Revelação 14:1.
4. Oityi tyaendapo etyi Jesus ahimbika okutumina?
Ouhamba wa Huku wahimbika okutumina mo 1914. * Otyipuka tyotete Ohamba Jesus alinga, okutahela pohi Satanasi novilulu viae. Satanasi anumana unene, iya ahimbika okueta ononkhumbi onene kombanda yoohi. (Revelação 12:7-10, 12) Tunde opo, ononkhumbi mbovanthu mbukahi nokuliyawisa unene. Ovita, nondyala, nomauvela, novinimawe, vilinga onthele “yenyingilikilo” lilekesa okuti apa katutu Ouhamba wa Huku maukapilulula ovipuka aviho kombanda yoohi.—Tanga Lucas. 21:7, 10, 11, 31.
5. Oityi Ouhamba wa Huku ukahi nokulinga?
Novilinga viokuivisa ouye auho, Ouhamba wa Huku ukahiale nokuwaneka kumwe ovanthu ovanyingi vovilongo aviho. Ovanthu ovanyingi ovatendi, vekahi nokukala ovalongwa va Jesus. Ouhamba wa Huku maukeveamena putyina mauhanyeko ouye ou auho wovivi. Moluotyo, aveho vahanda okupola ouwa Kouhamba wa Huku, vesukisa okulilongesa okukala ovalongwa ovataveli va Jesus.—Tanga Revelação 7:9, 14, 16, 17.
Mokueenda kuomanima 1.000, Ouhamba wa Huku maukafuisapo etyi Huku ahandelele ovanthu ponthyimbi. Oohi aiho maikakala omphangu yombembwa. Okuhulililako, Jesus makakondola Ouhamba pomaoko a He. (1 Coríntios 15:24-26) Okuti ove wii omunthu umwe uhanda okupopila konthele Yohamba wa Huku?—Tanga Salmo 37:10, 11, 29.
^ pal. 6 Opo unoñgonoke nawa oñgeni omaulo Ombimbiliya apopia konthele yenima lio 1914, tala pomafo 215-218 omukanda Oityi Ombimbiliya Tyili Ilongesa?
