Tyotyili, okandyaulula aka tualinga komalongeso akolela Ombimbiliya, kapameka ohole yove mu Jeova. Ohole oyo, yesukisa okutualako okupamekwa. (1 Pedro 2:2) Ekevelelo liove liomuenyo uhapu, litei kokutualako okufuena ku Huku, mokulilongesa Ondaka yae.—Tanga João 17:3; Judas 21.

Putyina enoñgonoko liove konthele ya Huku liliyawisa, nekolelo liove malipame vali. Ekolelo malikukuatesako okuhambukiswa Huku. (Hebreus 11:1, 6) Malikuavela ondundo yokulivela nokulinga omapiluluko akolela momuenyo wove.—Tanga Atos 3:19.

Tyotyili, ove mohande okupopila vakuenyi etyi ulilongesa. Onthue atuho tuhanda okupopila ovanthu onondaka onongwa. Putyina utualako okulilongesa Ombimbiliya, monoñgonoka oñgeni moundapesa Ombimbiliya pala okupopila vakuenyi onondaka onongwa, nekolelo liove mu Jeova.—Tanga Romanos 10:13-15.

Ovanthu ovanyingi vahimbika okupopila onondaka onongwa omapanga avo ine ombunga yavo. Popia nehumbilo. Kuvepopi okuti ongeleya yavo yapenga, anthi, uvepopila konthele yomilao via Huku. Tupu, hinangela okuti ovanthu vapanda vali onkhalelo yove tyipona etyi upopia.—Tanga 2 Timóteo 2:24, 25.

Okulilongesa Ondaka ya Huku matyikukuatesako okunoñgonoka vali nawa otyili. Konyima, upondola okukala noupanga omunene na Jeova. Ukala omunthu wae mokonda unyingila Mombunga yae.—Tanga 2 Coríntios 6:18.

Upondola okuyawisa enoñgonoko liove, mokutualako okulilongesa Ondaka ya Huku. (Hebreus 5:13, 14) Ita Kombangi ya Jeova ekulongese Ombimbiliya nomukanda Oityi Ombimbiliya Tyili Ilongesa? Putyina ulilongesa vali Ondaka ya Huku, tupu nonkhalelo yove yomuenyo maikala vali nawa.—Tanga Salmo 1:1-3; 73:27, 28.

Onondaka onongwa mbutunda ku Jeova, Huku wehambu. Ove upondola okufuena kwe, mokufuena kovanthu vae. (Hebreus 10:24, 25) Inkha utualako okulinga ononkhono mbokuhambukiswa Jeova, mokamona omuenyo wotyotyili, omuenyo uhapu. Okufuena ku Huku tyotyili otyo otyipuka otyiwa upondola okulinga.—Tanga 1 Timóteo 1:11; 6:19.