OMALONGESO 6
Vokuankhia Vena Ekevelelo Patyi?
1. Ombupi Onondaka Onongwa Konthele yo Vokuankhia?
Etyi Jesus ehika ko Betania popepi no Jelusalei, ankho palambale ononthiki ononkhuana, tunde etyi epanga liae Lasalu ankhia. Jesus aende kelangalo na Marta na Maliya onomphange mbomulume wokuankhia. Konyima, ovanthu ovanyingi aveliongiya ponthele yavo. Upondola okusoka ehambu lia Marta na Maliya etyi Jesus apindulapo Lasalu?—Tanga João 11:21-24, 38-44.
Marta ankho wii onondaka onongwa konthele yo vokuankhia. Oe ankho wanoñgonoka okuti Jeova makatutilisa vokuankhia, opo vakale vali nomuenyo kombanda yoohi.—Tanga Jó 14:14, 15.
2. Vokuankhia vekahi ñgeni?
Huku wapopilile Andau okuti: “Mokonda ove uheke iya keheke oko mokondoka.”—GÊNESIS 3:19.
Ovanthu vatungwa nonthata. (Gênesis 2:7; 3:19) Onthue katuspilitu ikala molutu luopahitu. Onthue tuvanthu vopahitu, ngotyo tyina tunkhia natyike molutu luetu tyihupapo. Tyina tunkhia owongo wetu nao unkhia, iya omalusoke etu anyima. Ngotyo, etyi Lasalu atutiliswa kapopile natyike konthele yononkhia mbae, mokonda vokuankhia natyike vali vei.—Tanga Salmo 146:4; Eclesiastes 9:5, 6, 10.
Okuti Huku umonesa ovanthu ononkhumbi motupia tyina vamankhi? Mokonda Ombimbiliya ilekesa okuti vokuankhia kavei vali natyike, tyimoneka nawa okuti elongeso liotupia tuo ifelunu ounkhembi. Elongeso olio, liundula Huku. Oe uyele olusoke luokumonesa ovanthu ononkhumbi motupia.—Tanga Jeremias 7:31.
Tala ovidiu yati Vokuankhia Vekahi Ñgeni?
3. Okuti vokuankhia vapondola okupopia nonthue?
Vokuankhia kavapondola okupopia ine okutehelela. (Salmo 115:17) Mahi, kuna onoandyu mbumwe onondingavivi, mbupondola okupopia novanthu, okulikembesa ngatyina onohande mbovanthu vokuankhia. (2 Pedro 2:4) Jeova wailika okuovola okupopia no vokuankhia.—Tanga Deuteronômio 18:10, 11.
4. Ovalie mavakondolwa vali komuenyo?
Ovanthu ovanyingi vokuankhia mavakondolwa vali komuenyo kombanda yoohi. Alo umwe vana valingaile ovipuka ovivi mokonda ankho yokuhei Huku, mavakatutiliswa.—Tanga Lucas 23:43; Atos 24:15.
Vokuatutiliswa mavakalongeswa otyili konthele ya Huku, avakala nekolelo mu Jesus, mokutavela kwe. (Revelação [Apocalipse] 20:11-13) Vana vakondoka komuenyo iya avalingi ovipuka oviwa, mavakakala apeho nomuenyo kombanda yoohi.—Tanga João 5:28, 29.
5. Oityi Etutilo litulongesa konthele ya Jeova?
Huku waava ekevelelo konthele yovanthu vokuankhia, mokuatuma Omona wae opo ankhie mokonda yetu. Ngotyo, etutilo litulekesa oluembia nokankhenda ka Jeova tuhatokalele. Tyina vokuankhia vamatutila, olie haunene ove uhanda okumona?—Tanga João 3:16; Romanos 6:23.
