ONTHELE 2
Ouhamba wa Huku—Okuyandyanesa Onondaka Onongwa Ouye Auho
OKOMUHUKA monthiki yokupululukwa-po kovilinga viakaputu, ove ulipongiya pala ovilinga viokuivisa. Mahi kuahandele okuenda, mokonda ulitehelela okuti wepuila. Uhanda ñgeno upululukwa-po! Mahi ove ulikuambela konthele oyo, iya otokola okuenda. Oundapa nomphange omukulu wekolelo, iya ekoleleyo liae nohole, vikuhika komutima. Putyina muivisa otyili umbo na umbo, ohimbika okusoka okuti ovakuatate venyi no nomphange ouye auho, navo vekahi nokuivisa otyili otyo, vaundapesa omikanda onwe muundapesa, amuho mupola esilivilo kelongeso like. Tyina ukondoka keumbo ulitehelela okuti walundua. Ove uhambukwa unene, etyi uhesalele peumbo!
Hono, ovilinga viokuivisa, ovio ovilinga viakolela vali Viouhamba wa Huku. Jesus waula okuti ovilinga viokuivisa, maviliyawisa unene mokueenda kuononthiki mbonthyulilo. (Mat. 24:14) Oñgeni eulo olio likahi nokufuiswapo? Monthele ei, matulilongesa konthele yovanthu, no nonkhalelo, noviti viakolela unene movilinga viokuivisa, vikahi nokukuatesako ovanthu ovanyingi ouye auho, okuimbuka okuti Ouhamba wa Huku owotyotyili.
MONTHELE EI
OKAPITULU 6
Ovanthu Vokuivisa—Ovaundapi Veliava
Oityi tyavelele Jesus onthumbi yokuti makala novakuatesiko veliava kononthiki mbahulilila? Oñgeni molekesa okuti ukahi nokuovola tete Ouhamba oo?
OKAPITULU 7
Ononkhalelo Mbokuivisa—Vaundapesa Ononkhalelo Ambuho pala Okuvasa Ovanthu
Lilongesa konthele yononkhalelo onomphe ovanthu va Huku vehole okuundapesa opo vahikiye onondaka onongwa kovanthu ovanyingi, putyina onthyulilo iheneye.
OKAPITULU 8
Oviti pala Okuivisa—Okulinga Omikanda pala Okuivisa Ouye Auho
Oñgeni ovilinga vietu viokupitiya vilekesa okuti tukahi nokukuatesuako na Jesus? Ovipuka patyi konthele yomikanda vietu vilekesa okuti kuove Ouhamba wa Huku owotyotyili?
OKAPITULU 9
Ouwa Utundilila Kovilinga Viokuivisa—“Omapia . . . Ayela pala Okuteya”
Jesus walongesa ovalongwa vae onondonga mbakolela konthele yovilinga ovinene viokuteya via Huku. Oñgeni onondonga ombo mbakolela kuonthue hono?
