1. Otyitateka patyi hono ovanthu vena kombinga yokufenda?

 YESU wati: “Una kekahi konthele yange, ondyale yange.” (Mateus 12:30) Tukahi konthele ya Yehova ine o konthele ya Satanasi. Ovanthu ovanyingi vasoka okuti vekahi no kuumbila Huku yotyotyili. Anthi, Ombimbiliya ipopia okuti Satanasi ukahi “no kuyapula ovanthu aveho ku Huku.” Una kekahi konthele yange, ondyale yange. (Revelação 12:9) Omakui nomakui ovityita viovanthu vatavela okuti vekahi no kufenda Huku. Anthi, tyotyili vekahi nokuumbila Satanasi Eliapu! Ovanthu hono vena otyitateka otyinene tyokukoya olie mavafende. Vena yokufenda Yehova, “Huku yotyotyili,” ine o Satanasi “he younkhembi.”—Salmo 31:5; João 8:44.

2. Eliva patyi limue Satanasi aundapesa opo atyilike ovanthu okufenda Yehova?

² Okutokola okuumbila Yehova eholovono limue lionondunge, lieta okupandua na Huku. Anthi, Satanasi kahambukilua ovanthu vauumbila Huku. Uveetela ovitateka ovinene. Eliva limue aundapesa, omukuele, noundyale utundilila kuvakuetu, alo umue komapanga no kombunga yetu. Yesu walondola okuti: “Onondyale mbomunthu, ombunga yae muene.”—Mateus 10:36.

3. Inkha vamue mombunga ine omapanga ove vekulingila oundyale mokonda yokufenda Huku, molingi ñgeni?

³ Otyo inkha tyipita noove, molingi ñgeni? Ovanthu ovanyingi vetyii okuti efendelo liavo liapenga. Anthi, vakala tyalimbililua okutundamo. Ovo vasoka okuti okutunda mefendelo olio matyilekesa okuti vetupu onthilo nombunga yavo. Okuti otyo tyaviuka? Inkha ove unoñgonoka  okuti vamue mombunga yove vekahi nokusipa epangue, kumevelungula okuti epangue lilinga omapita? Okuti molipake kumue navo mokusipa epangue? Ahau, movelungula.

4. Oityi Josue kononthiki mbae apopilile ova Isilayeli kombinga yefendelo?

⁴ Josue waavelele ova Isilayeli ondundo opo vayekepo ovituwa viapenga vionongeleya mbomatutu, noviso viovakuaukulu vavo. Oe wati: “Pahe kalei nonthilo na Yehova, muumbilei nomutima auho, notyili. Yekeipo ono huku ankho ovakuaukulu venyi vaumbila nthele ina Yondongi, noko Egitu. Umbilei Yehova.” (Josué 24:14) Josue ankho wali omuviuki komaiho a Huku. Iya Yehova emuavela ononkhaneno onongua. Inkha nonthue tukala ovaviuki komaiho a Yehova, tupu nonthue metuavela ononkhaneno onongua.—2 Samuel 22:26.

5. Omokonda yatyi tuesukisila okuliyovola kovipuka aviho vioumbanda?

⁵ Okuliyovola kongeleya yomatutu, tupu tyihangununa okuti tuesukisa okuhanyaunapo kese tyipuka tyoumbanda pamue tuna. Ngovilolo, ononkhuku mboumbanda, ononela, ovinunga vioumbanda, novipuka ovikuavo vali viaama koumbanda. Okulinga ngotyo tyakolela unene, mokonda tyilekesa okuti tuayumba onthumbi yetu aiho mu Yehova.

6. Oityi Ovakristau vamue votete valingile omikanda viavo vioumbanda?

⁶ Tala etyi tyalingile Ovakristau vamue votete, puetyi vatokola okuendela mongeleya yotyotyili. Ombimbiliya yati: “Ovanthu ovanyingi ankho vokulinga oumbanda, vaeta omikanda viavo aviho vioumbanda, aveviyokela molupala luovanthu aveho.—Atos 19:19.

7. Oityi tuna yokulinga inkha onondele ine ovilulu nkhele vitumonesa emone?

⁷ Vamue vekahi nokuhimbika okuumbila Yehova pahe. Kohale pamue ankho velipakaile mounganga, mokuhakula, no movituwa ovikuavo vioumbanda. Pamue nkhele vehole okumonesua emone no vilulu ine onondele. Otyo inkha tyipita noove, ihana peulu enyina lia Yehova melikuambelo. Yehova mekuamena.—Provérbios 18:10; Tiago 4:7.

8. Oñgeni Ovakristau votyotyili vatala ovikahuku, ovilolo, no malutalatu aundapesua mefendelo liomatutu?

⁸ Vana vahanda okuumbila Yehova kavapondola okutualako okukala no vikahuku, novilolo ine omalutalatu efendelo liomatutu. Ovakristau votyotyili “vekahi nokuendela mekolelo, kavaendela movipuka vimoneka nomaiho.” (2 Coríntios 5:7) Ovakristau votyotyili vahumbila ovitumino via Huku. Ngotyo kavaundapesa ovilolo mefendelo.—Êxodo 20:4, 5.

9. Ombimbiliya yaava elondolo patyi kombinga younongo?

⁹ Ombimbiliya ipopia okuti: “Una weenda no vanongo makakala omunongo.” (Provérbios 13:20) Inkha tuhanda okukala no nondunge, tuesukisa okulipaka kumue no Nombangi mba Yehova. Ovo, vekahi nokuendela mondyila ituala komuenyo.—Mateus 7:14.

10. Oñgeni Onombangi mba Yehova vapondola okukukuatesako okuumbila Huku?

¹⁰ Tyotyili Onombangi mba Yehova vasuka novanthu. Ovilinga viavo vikuatesako ovanthu vomutima waviuka, okunoñgonoka otyili Tyombimbiliya tyituala komuenyo wahapu. Vapondola okukukuatesako, mokulilongesa nove Ombimbiliya otyali, kufete natyimue. Onombangi mba Yehova mavakumbulula omapulo ove. Mavekulekesa oñgeni upondola okuundapesa enoñgonoko Liombimbiliya momuenyo wove.—João 17:3.

11. Oñgeni omaliongiyo Ovakristau maekukuatesako?

¹¹ Omaliongiyo Ovakristau, okulingilua Monondyuo mbo maliongiyo Onombangi mba Yehova, maekukuatesako okulilongesa vali kombinga yonondyila mba Yehova. Maakapameka ehando liove liokuendela mongeleya yotyotyili. Tupu mokalongesua oñgeni upondola okukuatesako vakuenyi okulilongesa otyili Tyombimbiliya.—Hebreus 10:24, 25.

12. Oñgeni elikuambelo lipondola okukukuatesako okuumbila Huku?

¹² Putyina utualako okulilongesa vali kombinga yehando nevangelo lia Yehova, enoñgonoko liove kombinga yonondyila mba Yehova, maliliyauisa vali unene. Tupu wesukisa okuyauisa ehando liove liokulinga ovipuka  vihambukisa Huku, no kulityilika kuvina vimunumaneka. Hinangela okuti upondola okulihikiya ku Yehova nelikuambelo okumuita opo ekukuateseko okulinga etyi tyaviuka no kulityilika kovipuka viapenga.—1Coríntios 6:9, 10; Filipenses 4:6.

13. Oñgeni upondola okuhambukisua omutima wa Yehova?

¹³ Mokuenda kuomuvo, putyina wekula mo paspilitu, monoñgonoka okuti wesukisa okukala Ombangi ya Yehova yelipakula no kuambatisalua. Mokulipaka kumue novanthu va Yehova, mo kahambukisua omutima wa Yehova. (Provérbios 27:11) Mokakala pokati kovanthu vehambu, vana Huku apopia okuti: “Mandyikakala pokati kavo, no kuendaenda pokati kavo. Mandyikakala Huku yavo, iya ovo avakakala ovanthu vange.”—2Coríntios 6:16.