1, 2. Tuesukisa ekuateso opo tufende Huku notyili. Ongeleka patyi itulekesatyo?

 OÑGENI tupondola okunoñgonoka Huku? Okuti tuesukisa okuiwa omalongeso onongeleya mbatyo ambuho? Ahau, katyesukisile. Namphila tuetyilingile, katutyivili okuimbuka elongeso liotyotyili noliomatutu.

² Kuna omalusoke omanyingi kombinga ya Huku. Moluotyo tuesukisa otyipuka tyimue tyitukuateseko okunoñgonoka otyili, nounkhembi. Ngongeleka: Sokolola ñgeno ovanthu vevali vekahi movenda nokulipatana, kombinga yomulele ukahi nokuladesua. Omulandesi upopia okuti omulele una omiti vitatu. Wokulanda upopia okuti omulele omututu, utupu omiti vitatu. Oñgeni otyitateka otyo tyipondola okupunguhunua? Tyipondola okupunguhunua mokueleka omulele oo nomuti, opo vatale inkha tyili una omiti vitatu.

3. Omokonda yatyi Ombimbiliya yahonekelua?

³ Okuti kuna otyipuka tyimue tyipondola okukuatesako ovanthu kombinga yokufenda Huku notyili? Enga kuna, Ombimbiliya. Huku watuma okuhoneka Ombimbiliya opo ovanthu aveho velilongese otyili kombinga yae. Kuhole okulingua omakui nomakui ovityita vio Nombimbiliya. Ombimbiliya ikahi nokupitiyua mo 2.100 tyomalaka. Ngotyo, kese munthu upondola okutanga otyili kombinga ya Huku melaka liae muene.

4. Ombimbiliya ihangununa ovipuka patyi?

⁴ Ombimbiliya otyipuka tyimue otyiwa tuapeua na Huku. Ombimbiliya ihangununa ovipuka vina esilivilo kombinga ya Huku.  Itupopila kombinga yovanthu vakala keulu. Itunoñgonokesa omalusoke a Huku, ovituwa viae, nehando liae. Itupopila oñgeni ehole okutekula ovanthu mokuenda kuomanima. Ipopia kombinga yovipuka mavikapita komutue. Tupu ilekesa oñgeni tupondola okuvasa ondyila ituala komuenyo wahapu.

5. Ongeleka patyi ilekesa okuti Ombimbiliya ilikuata kumue netyi ovanongo vavasa hono?

⁵ Kuna omahunga omanyingi etulekesa omokonda yatyi tutavelela okuti Ombimbiliya Ondaka ya Huku. Ehunga limue, omokonda Ombimbiliya yelikuata kumue netyi ovanongo hono vanoñgonoka kombinga yoohi. Kohale ankho ovanthu mouye auho vasoka okuti oohi yaumphama kombanda yotyipuka tyimue. Ngongeleka, koutakelo wo Afilika, ovanthu ankho vatavela okuti oohi ikahi kombanda yonyoka imue onene yeliwinga ononkhata. Onyoka oyo vati ina 3.500 viononkhata kombanda yoohi, no nonkhata 3.500 pombuelo yoohi. Anthi, etyi Ombimbiliya ipopia kombinga yoohi otyili. Omuhoneki umue Wombimbiliya, 3.500 viomanima konyima wati: Huku kaumphikile oohi kombanda yotyipuka natyimue. (Jó 26:7) Hono novanongo otyo vavasa.

6. Elekeso patyi enene lilekesa okuti tyotyili Ombimbiliya yatunda ku Huku?

⁶ Elekeso enene liokuti tyotyili Ombimbiliya yatunda ku Huku, omokonda ipopia otyili kombinga yovipuka mavikapita komutue. Huku welikalela novanthu. Oe wii oityi tyikahi komutue. Tupu atyiho apopia tyotyili matyikamoneka.

7. Ovipuka patyi viapopiwa Nombimbiliya vialambale kohale?

⁷ Ovipuka ovinyingi, viapopiwa Nombimbiliya vialambale kohale. Ngongeleka, puetyi ankho kuakamba 700 viomanima, Ombimbiliya yapopia okuti Yesu makatyitilua Kombelei. Yesu tyotyili oko atyitilua. (Miqueias 5:2; Mateus 2:3-9) Ombimbiliya yayauisako okuti Yesu makatyitua nomuhikuena uhenelale pamue nomulume. Tupu yapopia okuti makapakulua no 30 onombongo mbovivela. Atyiho otyo tyeya okumoneka. Tyotyili naumue omunthu ankho upondola okupopia ovipuka ovio!—Isaías 7:14; Zacarias 11:12, 13; Mateus 1:22, 23; 27:3-5.

8. Ovipuka patyi viapopiwa Nombimbiliya vikahi nokumoneka hono? Iya ovipuka ovio vilekesatyi?

⁸ Ovipuka ovikuavo viapopiwa Nombimbiliya  vikahi nokumoneka mononthiki mbetu. Tutalei ovipuka vimue viapopiwa:

•   “Ovilongo mavikakatukila ovilongo ovikuavo [novita], iya omauhamba maakakatukila omauhamba omakuavo. Makukakala ovinimawe ovinene. Kononthele mbumue na mbumue makukakala omauvela omanene, nondyala.”—Lucas 21:10, 11.

•   Ovanthu ovanyingi kamavakatavela kovitumino.—Mateus 24:12.

•   “Kononthiki mbahulako . . . ovanthu mavakakala vokulihole ovo muene, vokuhole onombongo, vokuhetavela kovohe, . . . vokuhetyivili okulikondola omitima, ovakalavi, vehehole otyiwa, . . . vokuna omalityindailo, vokuhole vali ovitalukilo tyipona Huku.”—2 Timóteo 3:1-5.

 Ove kutavela okuti ovipuka ovio vikahi nokumoneka hono? Ovipuka aviho viapopiwa Nombimbiliya vilekesa okuti oyo yakolela unene. Ombimbiliya Ondaka Huku atuma okuhoneka.—2 Timóteo 3:16.

9, 10. Oityi tyilekesa okuti Huku kayekele ovanthu vapilulule Ombimbiliya?

⁹ Pahe sokolola, ñgeno una ondyuo yokutunga ovipuka. Ove pahe waavela ovaundapi vove ovitumino. Inkha omunthu umue ondyale yove apilulula ovitumino wevepa, molingi ñgeni? Okuti kumeviviukisa? Tupu, na Huku kayeke ovanthu vapilulule otyili tyae tyikahi Mombimbiliya.

¹⁰ Vamue ankho vokulinga ononkhono mbokupilulula omalongeso Ondaka ya Huku, kavetyivilele. Mokonda tyina tueleka Onombimbiliya tunambo hono no Nombimbiliya mbokohale, ambuho mbelifua. Etyi tyilekesa okuti Ombimbiliya kayapilululilue mokuenda kuomanima.