1. Oityi tuna yokulinga opo tuhambukisue Huku?

 OPO tukale omapanga a Huku, katupondola okulinga onthele naimue monongeleya mbomatutu. Tuna yokuendela mongeleya yotyotyili. Hono omakui nomakui ovityita viovanthu mouye auho vekahi nokuendela mongeleya yotyotyili.

2. Opi Onombangi mba Yehova mbupondola okuvasiua? Ovilinga patyi vekahi nokulinga?

² Ombimbiliya yapopia okuti: ovafendeli votyotyili “otyinyingi otyinene tyovanthu” tyikahi nokutunda “movilongo aviho, momihoko aviho, no momalaka aeho.” (Revelação 7:9) Movilongo 235, omakui nomakui ovityita Vionombangi mba Yehova, vekahi nokuundapa nombili onene, okukuatesako vakuavo. Okuvelongesa kombinga yonondyila mba Yehova novitumino viae.

3. Onombangi mba Yehova vekahi nokufenda lie? Iya velityilika komafendelo patyi?

³ Onombangi mba Yehova vaimbuka okuti Yehova oe vala watokala okufendua. Vaanya okufenda ovilolo no malutalatu avahiwa monongeleya mbomatutu. (1 João 5:21) Onombangi mba Yehova kavafende ovanthu vokuankhia. Kavalingi onthele movipito viomitambo, novipito ovikuavo viomatavelo onongeleya mbomatutu, “no malongeso ovilulu.” (1 Timóteo 4:1) Anthi, Onombangi mba Yehova vaava epameko liotyotyili kuvana vankhisa. Okuveavela ehangununo kombinga yomulao wa Huku wokuti mouye omupe Yehova makatutilisa aveho vokuankhia.—João 5:28, 29; Atos 24:15.

4. Ovanthu va Huku vatala ñgeni oumbanda?

⁴ Onombangi mba Yehova kavelipake moumbanda, no mouanga mokonda vetyii okuti ovipuka vie Liapu. Ovo kavayumbu onthumbi moumbanda opo vaamenue. Anthi, onthumbi yavo ikahi mu Yehova.—Provérbios 18:10.

5. Onombangi mba Yehova kavelipake movipuka patyi?

⁵ Yesu wapopia okuti, ovalongua vae “kavapondola okulinga onthele youye.” (João 17:16) Kononthiki mbae, Yesu waanyene okulipaka mopulitika. (João 6:15) Tupu Onombangi mba Yehova kavelipake mopulitika, no movilua viouye uno. Anthi, vafeta omalilimu, no kutavela kovitumino viotyilongo omu vakala.—João 15:19; Romanos 13:1, 7.

6. Ovaumbili va Huku valandula ovitumino patyi kombinga yotyinepo no kulihenga?

⁶ Onombangi mba Yehova vatavela kovitumino viovatumini. Ngotyo otyinepo tyavo tyilingua novatumini. (Tito 3:1) Vatavela kovitumino via Huku, kombinga yokuhanepe oluvale. (1 Timóteo 3:2) Tupu, ovaumbili va Huku kavelihenge, mokonda vapakako ovitumino via Huku momuenyo wavo.

7. Oñgeni Onombangi mba Yehova valekesa eholelo pokati kavo?

⁷ Onombangi mba Yehova vena eholelo pokati kavo. Vena ohole na Huku. Iya eholelo olio lievepaka kumue meuaneno like liovakuatate no nomphange, namphila vatunda momihoko no movilongo ovinyingi. Pomivo vioviponga, no viomasukasuka, Onombangi mba Yehova velikuatesako. Onombangi mba Yehova mbulekesa eholelo momuenyo wavo.—João 13:35.

8. Ovituwa patyi ovivi ovanthu va Huku velityilika?

⁸ Ovanthu va Yehova valinga ononkhono mbokukala ovakuatyili. Velityilika kokuvaka, kokukemba, kokulinga omaundalelapo, kokuliyepa, kounkholua, no kuvakela monondando. Onombangi mba Yehova kavavete ovakai vavo. Vamue ankho valinga ovipuka ovio, puetyi nkhele vehenekale Onombangi mba Yehova. Anthi, nekuateso lia Yehova vetyiyekapo. Pahe komaiho a Huku “vasukuka”.—1 Coríntios 6:9-11.

9. Oityi omukanda umue wapopia kombinga yonongeleya mbutiwa ombo paspilitu mo Afilika?

⁹ Onongeleya ononyingi mbupopia okuti vekahi nokuendela motyili. Pamue valinga ovipuka  vihuvisa, opo etyi vapopia tyimoneke ngotyili. Ngongeleka, kombinga yetyi tyitiwa onongeleya mbopaspilitu mo Afilika, omukanda umue wati: “Onthele onene yovilinga vilingua novimbanda yapiñganuapo [no nongeleya mbumue onomphe mbo Vakristau]. . . . Ovo vati vetyivila okupopia ovipuka mavikapita komutue, no kulinga omahuviso. Tupu vati vehole okukala no mamonekelo monondyoi, ine okuhangununa onondyoi. Movilinga viavo vaundapesa omeva akola, omulela ukola, neetue, no novela, pala okuhakula no kuvindika omauvela.”

10, 11. Omokonda yatyi hono omahuviso kaalekesila okuti ongeleya yatavelua na Huku?

¹⁰ Ovanthu vonongeleya ombo vapopia okuti omahuviso alekesa okuti ongeleya yavo ina ononkhaneno onongua mba Huku. Anthi, omahuviso kaalekesako okuti ongeleya yapandulua na Huku. Mokonda Satanasi wava epondolo kovafendeli vae opo valinge ‘ovilinga vihuvisa.’ (2 Tessalonicenses 2:9) Ombimbiliya yati Huku waavelele ovanthu epodolo liokulinga omahuviso. Ngomahuviso okupopia ovipuka mavikamoneka komutue, omahiviso okupopia momalaka elikalela, nokukala nenoñgonoko limue liakolela. Anthi, tupu yati ovipuka ovio “mavikapuako.”—1 Coríntios 13:8.

¹¹ Yesu walondola okuti: “Haaveho vati ‘Tatekulu, Tatekulu,’ mavakanyingila mouhamba wokeulu. Mukanyingila vala una ulinga ehando lia Tate yange uli keulu. Ovanyingi monthiki oyo, mavakati ‘Tatekulu, Tatekulu, katualongesile menyina liove, katuatundisile ovilulu menyina liove, nokulinga ovipuka ovinyingi vihuvisa menyina liove?’ Ame mandyivepopila okuti: Ame himui! Tundei ponthele yange, onue vokulinga ovipuka ovivi.”—Mateus 7:21-23.

12. Olie makanyingila Mouhamba wokeulu?

¹² Iya, olie makanyingila Mouhamba wokeulu? Oyouna vala ulinga ehando lia Yehova.

13. Huku uhanda ovanthu vae valinge ovilinga patyi? Iya ovalie vekahi no kuvilinga?

¹³ Hono Huku uhanda ovanthu vae valingetyi? Yesu wati: “Onondaka ombu onongua mbouhamba mambukaivisua kombanda yoohi aiho pala oumbangi wovanthu aveho.” (Mateus 24:14) Onombangi mba Yehova vekahi nokulinga ovilinga ovio nombili imue onene.

14. Ouhamba wa Huku oityi? Olie makatumina Mouhamba oo?

¹⁴ Onombangi mba Yehova mbukahi nokuivisa “kombanda yoohi aiho,” okuti Ouhamba wa Huku outumino umue wokeulu maukatumina kombanda yoohi ino aiho nouviuki. Valongesa okuti Yehova wakoya Yesu Kristu opo akale Ohamba Youhamba wae. Makaundapa no 144.000 yovatumini vakoyua pokati kovanthu kombanda yoohi.—Daniel 7:14, 18; Revelação 14:1, 4.

15. Ouhamba wa Huku maukahanyaunako tyi?

¹⁵ Onombangi mba Yehova mbulekesa ovanthu Nombimbiliya okuti Ouhamba wa Huku maukahanyaunako ouye auho wa Satanasi. Maukanyimako onongeleya mbomatutu no malongeso ambo kaavela Huku onthilo. Anthi, ekahi no kunkhimaneka Satanasi. (Revelação 18:8) Tupu maukanyimako omauhamba aeho ovanthu okuna oundyale na Huku!—Daniel 2:44.

16. Ovalie mavakakala ovatyitua tyilongo kombanda yoohi moutumino wa Kristu Yesu? Iya opi mavakakala?

¹⁶ Tupu Onombangi mba Yehova mbulongesa okuti Yesu Kristu makaetela ovanthu aveho vekahi nokulinga etyi Huku ahanda, ouwa umue uhuvisa. Ovanthu vatyo ava, ovo mavakakala kombanda yoohi ngovatyitua tyilongo. Ombimbiliya ilaa okuti: “Huku makayovola epongo liita ekuateso, una umona emone, iya nauna wehena ou umukuatesako. Makalingila okankhenda una wokuna omutima weliola, no kukayovola omapongo.”—Salmo 72:12, 13.

17. Ovalie vekahi nokuivisa Ouhamba wa Huku?

¹⁷ Kutupu vali ovanthu ovakuavo vekahi nokulinga ehando lia Huku liokuivisa onondaka onongua Mbouhamba wa Huku. Onombangi mba Yehova, ombo vala mbukahi no kunoñgonokesa Ouhamba wa Huku kombanda yoohi aiho.