Ombimbiliya onthue tuitala okuti, aiho ondaka yatunda ku Huku. Tate yetu keulu wetuavela Ombimbiliya opo itulongese. Mahi, tala onondaka onombali mbakolela mbapopilwe omanima 2.000 okualamba. Onondaka ombo mbapopilwe noandyu imwe itiwa o Gabiliyeli, “ikala ponthele ya Huku.” (Luka 1:19) Oñgeni ovipuka ankho vikahi etyi oandyu yapopia onondaka ombo?

Onondaka ombo, mbapopiwa menima 3 P.K.E. Opi oandyu Gabiliyeli yapopila ondaka yotete? O konomphunda mbo Sundeia, tyafuile popepi no Selusalei, oku ankho kukala omunakwa wa Siovaa utiwa o Sakaliya. Sakaliya nomukai wae, Elisabete, ankho vakulupale iya vetupu ovana. Pomuvo opo ankho otyikando tya Sakaliya tyokukaundapa motyilinga tyounakwa mondyuo ya Huku, ko Selusalei. Pu etyi Sakaliya ekahi mondyuo ya Huku, liwa-liwa oandyu Gabiliyeli aiya ponthele yomutala wokuyokela ombao inika nawa (oisesu).

Tyotyili, otyo tyatilisile unene owoma Sakaliya. Mahi oandyu aimutulisa omutima opo Sakaliya ahatile owoma, aiti: “Uhatile owoma Sakaliya, mokonda Huku watehelela omalikuambelo ove, iya omukai wove Elisabete mekutyitila omona omukuendye, omuluku okuti o Suau.” Oandyu Gabiliyeli aiyawisako okuti Suau “makakala omunene komaiho a Siovaa” iya “mapongiya ovanthu pala Siovaa.” — Luka 1:13-17.

Ku Sakaliya, otyipuka otyo ankho tyimoneka ngoti hatyiliko. Omokonda yatyi? Omokonda ankho, nae nomukai wae Elisabete vakulupale. Moluotyo, oandyu Gabiliyeli aiti: “Mokala otyihita-mulungu, kumapopi alo ovipuka ovio aviho vikamoneka, mokonda kuetavelele onondaka mbange.” — Luka 1:20.

Pomuvo opo, ovanthu ankho vekahi pondye avahimbika okulipula, omokonda yatyi Sakaliya akalela ehimbwe mokati. Pahe eya, mahi tyihapopi. Sakaliya ankho ulekaisa vala nomavoko, kapopi. Otyo atyilekesa okuti ankho wamona ehuviso enene mondyuo ya Huku.

Etyi amana otyilinga tyae mondyuo ya Huku, Sakaliya akondoka keumbo liae. Pakala vala katutu, Elisabete akala omulemi! Mokueenda kuonohanyi 5, putyina akevela akutule omona wae, Elisabete ankho ukala vala meumbo kokule novanthu.

Konyima oandyu Gabiliyeli aiya otyikando tya vali. Okulie ankho yeya? Yeya komuhikuena umwe ankho wahanepelweutiwa o Maliya, ankho ukala kokulio kuekumbi motyilongo tyitiwa o Galileia, mepunda-umbo lyo Nasalee. Oityi oandyu yemupopila? Yati: “Wapandua na Huku.” Oandyu Gabiliyeli aitualako okupopila Maliya okuti: “Tala! Ove mokala omulemi, okutula omona omukuendye iya omuluku okuti o Sesusi.” Oandyu aiti: “Omona oo, makala omunene, aihanwa okuti Omona Womukulami, . . . Makakala Ohamba mondyuo ya Sakoo apeho, iya Ouhamba wae kamaukapwa.” — Luka 1:30-33.

Ove wetyimona nawa okuti oandyu Gabiliyeli yakala nelao enene liokupopia onondaka ombo onombali. Putyina tutanga vali konthele ya Suau na Sesusi, matunoñgonoka nawa omokonda yatyi, onondaka ombo mbatundile keulu mbesukisila unene.