Suse na Maliya, nkhele vekahi ko Mbelei, kavenekondoke ko Nasalee. Etyi Sesusi atuula ononthiki etyinana, avemupitisa ekuendye, ngetyi Otyitumino Huku apele ova Isilayeli tyipopia. (Levítico 12:2, 3) Tupu, ngetyi ankho tyilingwa, olukembe ankho luna okulukwa enyina monthiki oyo. Ngotyo, avaluku omona wavo okuti o Sesusi, ngetyi vapopililwe noandyu Gabiliyeli.

Etyi palamba ohanyi nononthiki mbumwe, Sesusi atuula ononthiki 40. Pahe, opi ovohe ankho mavemutuala nako? Vemutuaile kondyuo ya Huku, mo Selusalei, popepi na apa ankho vekahi. Otyitumino tyipopia okuti tyina pamalambe ononthiki 40 konyima yolukembe okutyitwa, ina yomona ankho una okutuala otyiawa tyokulisukukisa, mondyuo ya Huku. — Levítico 12:4-8.

Maliya alingi ngotyo. Atuala oviila vivali opo alinge otyiawa tyae. Otyo tyitulekesa okuti Suse na Maliya ankho vahepa. Ngetyi ankho Otyitumino tyipopia, ankho ñgeno una okuaava ondyona, notyiila tyike. Mahi, inkha ina yomona utupu ondyona, ankho una okuaava omakuti evali ine onopomba onombali. Ankho ongotyo Maliya ekahi iya ngatyo aava ngotyo.

Mondyuo ya Huku, ombuale imwe aiya ku Suse na Maliya. Enyina liae o Simiau. Huku wemulekesa okuti tyina ehenenkhie, mamono Kilisitu ine Mesiya, walaelue na Siovaa. Monthiki oyo Simiau, kononkhono mba Huku aende kondyuo ya Huku, oku ankho makavasa Suse na Maliya nolukembe lwavo. Simiau akuate olukembe olo pomavoko ae.

Etyi akuata olukembe Sesusi, Simiau apandula Huku, ati: “Tatekulu, Ohamba Yavilapo, pahe ukahi nokuyeka omupika wove ankhie nombembwa ngetyi wapopile. Mokonda omaiho ange amona oñgeni ove moeta eyovo wapongiya opo limoneke kovanthu aveho, otyimimi tyipola enthiki liahika omalongo, tupu otyo enkhimano liovanthu vove ova Isilayeli.” — Luka 2:29-32.

Suse na Maliya etyi veiva otyipuka otyo avahuvu. Simiau evekanena nawa iya apopila Maliya okuti, “mokonda yomona ou, ovanthu vamwe mo Isilayeli mavakatoka, ovakuavo mavakakatuka,” iya ove moihamenwa ngatyina watiulwa nomutunga. — Luka 2:34.

Pena vali omunthu omukuavo ankho uli mondyuo ya Huku monthiki oyo. Omunthu oo omuuli ankho utiwa o Ana, una omanima 84. Ankho kakambe mondyuo ya Huku. Iya poola yatyo opo, nae ankho weya ku Suse, na Maliya no kolukembe Sesusi. Ana ahimbika okupandula Huku, apopila ovanthu aveho konthele ya Sesusi.

Soka kehambu Suse na Maliya vakalele nalio mokonda yovipuka ovio viamonekele mondyuo ya Huku! Tyotyili, ovipuka ovio aviho vialekesa nawa okuti, oo oe omona, Una Walaelwe na Huku.