Suse wapindulapo Maliya, na emupopile ondaka imwe eiva. Oandyu ya Siovaa ankho yemumonekela mondyoi, aimupopila okuti: “Pinduka-po, pola omona na ina, oende no ko Isitu, ngako ukala alo ndyikupopila okuti kondoka. Mokonda Helode maovola omona opo emuipae.” — Mateusi 2:13.

Liwa-liwa, Suse na Maliya nomona avahene, avaende kounthiki. Avaende umwe liwa-liwa, mokonda Helode wetyiimbuka okuti ovatali vononthungululu vemukemba. Wevepopilile okuti tyina muamavasi omona, endyuei mumphopile. Ngwe avehetyilingi, avatundu motyilongo avaende tyehetyipopile. Helode anumana unene. Mokonda nkhele ankho uhanda okuipaa Sesusi, atumu okuipaa ovana aveho vakala ko Mbelei, na ava ankho vakala momapunda-umbo opopepi, okupolelela ko vomanima evali okuya no kombuelo. Ankho wasoka komanima evali, mokonda yetyi apopililwe novatali vononthungululu, vatundile Koutundilo wekumbi.

Ovana ovo aveho okuipawa tyeihamene unene komutima! Onthue katutyii ovana veñgapi vaipaelwe, mahi kuakalele omitambo ine omikoti ominyingi iya ovo ina yovana avalili unene, otyo atyifuisapo eulo Liombimbiliya Jeremia, omuuli wa Huku apopile. — Jeremias 31:15.

Mokueenda kuomuvo oo, Suse nombunga yae ankho vaholama ko Isitu iya ngako nkhele vakala. Motyinthiki tyimwe, oandyu ya Siovaa aimonekela vali Suse mondyoi. Aimupopila okuti: “Pinduka-po, pola omona na ina, oende kotyilongo tyo Isilayeli, mokonda vana ankho vaovola okuipaa omona, vankhia-le.” (Mateusi 2:20) Ngotyo, Suse anoñgonoka okuti ombunga yae pahe ipondola okukondoka keumbo liavo. Otyo atyifuisapo eulo ekuavo Liombimbiliya liokuati, Omona wa Huku waihanwa ko Isitu. — Oséias 11:1.

Tyimoneka okuti, Suse ankho uhanda ombunga yae ikale ko Sundeya, tyafuile popepi no Mbelei, oku ankho vakala tyina nkhele veheneende ko Isitu. Mahi wanoñgonoka okuti omona wa Helode ondingavivi, ankho utiwa Alukelau, pahe ohamba yo ko Sundeya. Mondyoi onkhuavo, Huku alondola Suse otyitateka otyo otyinene. Ngotyo, Suse nombunga yae avalingi oungendi okuenda no koutundilo wekumbi iya avakakala mepunda-umbo lyo Nasalee, motyilongo tyo Galileia, kokule nongeleya yova Sundeu. Sesusi ekulila motyilongo otyo iya otyo atyifuisapo eulo ekuavo, liati: “Makaihanwa okuti omu Nasalee.” — Mateusi 2:23.