Sesusi wekulila ko Nasalee namphila epunda-umbo limwe etutu, lihena esilivilo. Olio epunda-umbo livasiwa motyilongo tyonomphunda tyitiwa o Ngalileya, tyikala konthele yelunga limwe enene litiwa Elunga lyo Ngalileya.

Pu etyi Sesusi atualwa ko Isitu no vohe Suse na Maliya, tyafuile ankho una omanima evali. Tyafuile pomuvo opo, ankho oe vala aike omona venae. Konyima, akutyitwa onondenge mbae, ovo Tiaku na Suse na Simau na Sunda. Suse na Maliya tupu vakalele novana ovahikuena, onomphange mba Sesusi. Ngotyo, Sesusi ankho velilandula novanthu epandu, onondenge mbae nonomphange mbae.

Tyihe-ovo vala, Sesusi ankho una vali ovanthu ovakuavo ombunga yae. Ovo Elisabete nomona wae Suau, tuvei-ale. Ankho vakala katutu kokule okuenda no kokumbili kuekumbi, mo Sundeya. Ankho ukala vali popepi no Ngalileya, o Salomee, ankho velikuai na Maliya iya ngotyo ankho o ina muhikuena ya Sesusi. Omulume wae o Sebedeu. Ngotyo, ovana vavo vevali, ovo Tiaku na Suau ankho velikuai na Sesusi. Onthue katutyii inkha Sesusi wakalele omuvo omunyingi kumwe novakuendye ovo tyina ankho vekahi nokukula, mahi vakalele omapanga omanene, etyi vakala ono apositolu mba Sesusi.

Suse ankho una okuundapa unene opo atekule ombunga yae ankho ikahi nokuliyawisa. Ankho okalupindelu upangiya omavai. Suse watekulile Sesusi ngatyina omona wae muene, moluotyo Sesusi ankho wiihanwa okuti “omona wokalupindelu.” (Mateusi 13:55) Suse walongesile Sesusi ovilinga vioukalupindelu, etyivili.  Otyo ankho ovanthu vemuihanena okuti: “Okalupindelu.” — Maluku 6:3.

Ombunga ya Suse ankho vehole unene okufenda Siovaa. Mokonda ankho vahanda okulandula nawa Otyitumino tya Huku, Suse na Maliya valongesile nawa ovana vavo konthele ya Huku ‘putyina vepumphi, no putyina vaenda mondyila, na tyina valangala-po, iya na tyina vapinduka-po.’ (Deuteronômio 6:6-9) Ko Nasalee ankho kuna ondyuo yokufendela. Onthue tuna onthumbi yokuti Suse apeho ankho wenda nombunga yae mondyuo oyo, okukafenda Huku. Konyima, Ombimbiliya yapopile okuti: “Ngetyi alinga-linga monthiki Yotyasapalo,” Sesusi aende kondyuo yokufendela. (Luka 4:16) Tupu ombunga ya Suse, ankho vena ehambu enene liokuenda apeho kondyuo ya Siovaa ko Selusalei.