Elisabete pahe uhungi kokukala nolukembe lwae. Ankho vekahi-ale na Maliya mokueenda kuonohanyi ononthatu. Pahe onthiki Maliya maende yehikapo iya mahimbika oungendi wokukondoka keumbo liavo, ko Nasalee. Tyina pamakala onohanyi epandu, nae makala nolukembe.

Pakala vala katutu etyi Maliya apita, Elisabete akutula. Avakala nehambu enene etyi omona atyitwa, Elisabete nolukembe lwae ankho vekahi nawa! Etyi Elisabete alekesa olukembe lwae kovanthu vakala navo pomaumbo, no kombunga yae, avahambukwa unene.

Otyitumino Huku apele ova Isilayeli, ankho tyipopia okuti tyina omona amatyitwa akala ononthiki etyinana, una okulupuka ekuendye iya alukwa. (Levítico 12:2, 3) Ovanthu vamwe, ankho vasoka okumuluka enyina lya Sakaliya. Mahi Elisabete, ati: “Au! Maihanwa okuti o Suau.” (Luka 1:60) Hinangela okuti oandyu Gabiliyeli yetyipopile okuti omona una okulukwa okuti o Suau.

O vomunthele yae nombunga yae, avehetavela, avati: “Mombunga yove petupu ou una enyina olio.” (Luka 1:61) Avalekaisa komavoko okupula Sakaliya, enyina patyi ahanda okuluka omona. Sakaliya eveiti okavai kamwe iya ahoneka-ko ekumbululo, ati: “Enyina liae o Suau.” — Luka 1:63.

Ngotyo, Sakaliya komahuviso, pahe etyivili okupopia. Ngetyi utyii, ankho wapata ondaka etyi ehetavelele oandyu yapopia okuti Elisabete makala nomona. Pahe, etyi Sakaliya ahimbika vali okupopia, ovo munthele yae avahuvu, avelipulu okuti: “Omona oo, makala omunthu patyi?” (Luka 1:66) Ankho vetyiete okuti Suau walukwa enyina kepondolo lya Huku.

Sakaliya alaukilwa nononkhono mba Huku, apopi okuti: “Siovaa ankhimanekwe, Huku yo Isilayeli, mokonda wakala nokankhenda novanthu vae iya eveetela eyovo. Wetuavela  omuyovoli wepondolo meumbo lya Daviti omuumbili wae.” (Luka 1:68, 69) Ou apopia okuti “omuyovoli wepondolo,” ankho upopia Tatekulu Sesusi, namphila nkhele ankho ehenetyitwe. Sakaliya wapopia okuti menyina liomona Oo, Huku “metuyovola konondyale mbetu, etuavela elao liokulinga ovilinga viae nomutima wakola, noukuatyili nouviuki komaiho ae ononthiki ambuho mbomuenyo wetu.” — Luka 1:74, 75.

Sakaliya apopi eulo konthele yomona wae, ati: “Ove, mokatiwa umuuli wo Mukulami, tyetyi mokapita komutwe wa Siovaa opo upongiye onondyila mbae, nokunoñgonokesa ovanthu vae eyovo neevelo liononkhali mbavo, mokonda yokankhenda ka Huku yetu. Okankhenda oko katunda keulu, makakala ngotyitei tyiliaima tyina ekumbi litunda, pala okumimikila vana vekahi menthiki na vana vekahi mokahi kononkhia, nokuviukisa onomphai mbetu mondyila yombembwa.” (Luka 1:76-79) Eulo olio lipameka unene ngatyi!

Pomuvo opo, Maliya ankho nkhele kenenepwe iya ehiki keumbo liavo ko Nasalee. Oñgeni ovanthu mavakala tyina vamanoñgonoka okuti omulemi?