Maliya pahe ankho una eimo lionohanyi ononkhuana. Hinangela okuti, onohanyi mbo tete mbeimo liae, ombombu akala keumbo lya Elisabete etyi ekevetalela-po ko Sundeya. Mahi pahe, Maliya wakondoka keumbo liavo, ko Nasalee. Ovanthu aveho ankho mavetyimono okuti omulemi. Nkhele soka, oñgeni Maliya akala tyina asoka okuti ovanthu mavetyinoñgonoka!

Ankho otyitateka otyinene mokonda Maliya ankho omphunga ya Suse omuhongi womavai iya ankho vakevelela okulinepa. Iya ngwe utyii okuti, ngetyi tyipopia Otyitumino Huku aavelele ova Isilayeli, omukai tyina ahandwa-le nomulume umwe, inkha ulala nomulume omukuavo, wiipawa nomamanya. (Deuteronômio 22:23, 24) Iya namphila Maliya ankho hamunthu ulinga ovivi, tyafuile tyemupuiyile unene okusoka oñgeni mapopila Suse okuti omulemi, mokonda ankho ketyii oityi malingwa.

Maliya ankho wakala onohanyi ononthatu kokule, otyo tyilekesa okuti Suse ankho wemuivaluka, uhanda velimone-po. Etyi velivasa, tyipondola Maliya wemupopila oñgeni ekahi, alingi atyiho opo ahangunune nawa okuti wakala omulemi kononkhono mba Huku. Mahi, no ngotyo ankho katyapepukile ku Suse okunoñgonoka otyipuka otyo, etyitavela.

Suse ankho utyii okuti Maliya omuhikuena wonondunge, una ovituwa oviwa. Ankho umuhole unene. Mahi, namphila Maliya apopia oñgeni akala omulemi Suse ankho wati hamwe, Maliya wapewa eimo nomulume omukuavo. Mokonda Suse ankho kahandele Maliya aipawe nomamanya ine okumupenyesisa, atokola okumuhenga monkhalelo iheivala kovanthu. Pomuvo opo, tyina ankho omuhikuena ena omphunga, utalwa ngatyina anepwa-le iya okumuhenga una okueta omukanda wokulihenga.

 Suse nkhele ankho ukahi nokusoka unene otyipuka otyo, atokola okukalangala-po. Oandyu ya Siovaa aiya kwe mondyoi, aiti: “Uhatile owoma wokutuala omukai wove Maliya keumbo, mokonda wakala omulemi kononkhono mba Huku. Makutula omona omukuendye, iya ove omuluku okuti o Sesusi, mokonda makayovola ovanthu vae mononkhali mbavo.” — Mateusi 1:20, 21.

Puetyi Suse apindukapo, ahambukwa unene mokonda pahe wetyinoñgonoka nawa! Ahasete vali, alingi ngetyi oandyu yapopia. Atuala Maliya keumbo liae. Otyipuka otyo ankho pahe tyamoneka kovanthu okuti Maliya na Suse velinepa. Mahi, Suse ahalala na Maliya tyina nkhele ehenekutule Sesusi.

Etyi pakala onohanyi mbumwe, Suse kumwe na Maliya ankho una eimo liekula unene, ankho vena okulinga oungendi okutunda keumbo liavo ko Nasalee. Opi ankho mavaende nako, ngwe Maliya eimo liae liehika pononthiki mbokukutula?