Mokonda Sesusi ankho utupu onkhali, kakalele unene novitateka ngovanthu ine kasukalalele unene. Mahi no ngotyo, ankho ukala unene nokankhenda novanthu. Ankho wafwapo opo evekuateseko, alo umwe alingi ovipuka ankho vimoneka ngatyina vihesukisile. Okankhenda ankho kemulunda okukuatesako ovanthu. Tala onongeleka ombo Mokapitulu 32, 37, 57, 99.

Ovanthu vomati aeho, ovana novakulu, ankho vetupu owoma wokuenda ku Sesusi, mokonda ankho kelilekesa kovanthu ngatyina apeho ena vala ovilinga, ine welipakako. Ovanthu ankho vetyimona okuti Sesusi wesuka umwe navo, ngotyo okukala nae ankho vetyihole. Opo utyitale, tanga Okapitulu 25, 27, 95.

Sesusi apeho ankho upopila Tate yae ovipuka vikahi momutima wae melikuambelo, tyilinge wike, tyilinge ukahi novafendi vakuavo. Ankho ulikuambela ovikando ovinyingi, kelikuambela vala pokulia. Ankho ulinga omalikuambelo okupandula Tate yae, nokumuhilivika, nokumuita ehongolelo pokulinga omatokolo akolela unene. Tala onongeleka mbukahi Mokapitulu 24, 34, 91, 122, 123.

Pamwe ankho, alo umwe putyina Sesusi ankho esukisa okupululukwa-po ine okuombapo, ankho uliava opo akuateseko vakuavo. Ankho utupu otyituwa tyokuti tete ame. Wetuavela ongeleka ongwa tupondola okulandulila popepi. Tala oñgeni etyilingile Mokapitulu 19, 41, 52.

Sesusi ankho ketyipopi vala momulungu okuti tyesukisa okulievela oviponyo, mahi wetyilekesile etyi aevela ovalongwa vae novanthu ovakuavo. Sokolola konongeleka ombo Mokapitulu 26, 40, 64, 85, 131.

Ovihonekwa ankho vipopia okuti ova Sundeu ovanyingi kamavetavela Mesiya, tupu ankho vipopia okuti onondyale mbae mavemuipaa. Moluotyo, Sesusi ankho upondola okuhaundapa nombili mokukuatesako ovanthu. Mahi hatyo-ko alingile. Waundapele nombili mokuyandyanesa efendelo liotyotyili. Wasapo ongeleka ongwa yokukala nombili ovalanduli vae aveho, vena okulandula putyina vamoneswa ononkhumbi nokuyalwa. Tala Mokapitulu 16, 72, 103.

Sesusi ankho omunthu umwe omunene vali ku vakuavo aveho pano pohi mononkhalelo ononyingi, ankho wii ovipuka ovinyingi, tupu ankho omunongo. Mokonda ankho utupu onkhali, ankho una ounongo wokulinga ovipuka vihevilwa nomunthu nawike. Mahi no ngotyo, aundapela vakuavo nomutima weliola. Upondola okutyivasa Mokapitulu 10, 62, 66, 94, 116.

Putyina ono apositolu mbae novanthu ovakuavo ankho valinga etyi tyapenga, na tyina vahaendelele muetyi evelongesa, Sesusi ankho utualako okukala noumphua-lundo. Noumphua-lundo, uwana okuvelongesa oityi ankho vesukisa okulinga opo vafuene ku Siovaa. Sokolola konongeleka mbulekesa okuti Sesusi wapua-elundo Mokapitulu 74, 98, 118, 135.