Pahe ankho pena ononthiki ononthatu, tunde etyi Natanaele akala umwe povalongwa vo tete va Sesusi. Sesusi kumwe novalongwa vae, vekahi kokulio kwo Ngalileya, otyilongo tyavo. Ankho vekahi nokuenda kepunda-umbo lyo Kanaa, oku Natanaele atyitilwa. O Kanaa otyilongo tyikala konomphunda mbo kokulio kwo Nasalee, kuna Sesusi ekulila. Sesusi novalongwa vae ankho vakongwa kotyipito tyotyinepo ko Kanaa.

Me ya Sesusi nae ankho weya kotyipito. Mokonda Maliya ankho omapanga na vana vokuanepa, nae ankho una otyilinga tyokuvekuatesako okutambula nawa ovaenda ovanyingi veya. Moluotyo, liwa-liwa amono okuti ankho pena etyi tyakamba, apopila Sesusi okuti: “Vetupu ovinyu.” — Suau 2:3.

Ngotyo, Maliya ankho ukahi nokupopila Sesusi evekuateseko mokonda vetupu ovinyu. Mahi, Sesusi apopi etyi tyilekesa okuti ketavelele, ati: “Iya pahe onthue matulingi ñgeni?” (Suau 2:4) Mokonda Sesusi ankho Ohamba yavialekwa na Huku, ankho ulinga ovilinga atumwa na Tate yae keulu, katumwa nombunga ine omapanga ae. Maliya, nounongo, ayekela otyitateka pomavoko a Sesusi, apopila vala vokuava okuti: “Lingei etyi amemupopila.” — Suau 2:5.

Ankho muna omilindi epandu viomaande, kese wike utyinda onolitulu 40. Sesusi apopila vokuava okuti: “Yulisei omilindi omaande.” Konyima, evepopila okuti: “Polei-mo katutu amutuaila omuhongoleli wotyipito.” — Suau 2:7, 8.

Omuhongoleli wotyipito eimakela ahuvu mokonda ovinyu ankho yapepa unene, mahi ankho ketyii okuti yalingwa kehuviso. Aihana wokuanepa, emupopila okuti: “Ovanthu aveho vatetekela okuava ovinyu yokuapepa, pahe tyina ovanthu vamakolwa avaave ina ihapepele. Ove wapaka nawa ovinyu yokuapepa alo pahetyino.” — Suau 2:10.

Olio ehuviso lyo tete Sesusi alinga. Etyi ovalongwa vae ovape vamona ehuviso liae olio, ekolelo liavo mwe alipame. Konyima, Sesusi, na me yae, no nondenge mbae avaende kepunda-umbo lyo Kafalanau, kokulio kuekumbi, popepi Nelunga lyo Ngalileya.