Etyi ankho ekahi mo Selusalei motyipito tyo Pasikwa menima 30 P.K., Sesusi walingile omahuviso omanyingi. Mokonda yotyo, ovanthu ovanyingi avakala nekolelo mwe. Nikondemu, omu Faliseu ankho ulinga onthele Mombonge Onene yova Sundeu, wahuvile unene. Mokonda ankho uhanda okunoñgonoka vali ovipuka, akatalelapo Sesusi kounthiki, tyafuile walinga ngotyo mokonda yowoma wo nonkhalamutwe ononkhuavo mbova Sundeu, okuti hamwe mavemupopi omapita inkha vemumona.

Nikondemu apopila Sesusi okuti: “Mulongesi, tutyii okuti umulongesi watumwa na Huku, mokonda kutupu nawike upondola okulinga omahuviso ngaa ove ulinga inkha Huku kekahi nae.” Sesusi apopila Nikondemu okuti opo omunthu anyingile Mouhamba wa Huku una ‘okutyitwa tuvali.’ — Suau 3:2, 3.

Mahi oñgeni omunthu apondola okutyitwa tuvali? Nikondemu apulu okuti: “Okuti upondola okukondoka otyivali meimo lya ina atyitwa vali, tyitavela?” — Suau 3:4.

Au, otyo hatyoko tyihangununa okutyitwa tuvali. Sesusi ahangununa okuti: “Inkha omunthu katyitwa nomeva, no kononkhono mba Huku, kapondola okunyingila Mouhamba wa Huku.” (Suau 3:5) Etyi Sesusi ambatisalwa, iya ononkhono mba Huku ambumulaukila, ongatyina atyitwa “nomeva, no kononkhono mba Huku.” Tupu, akuivala ondaka keulu yati: “Ou Omona wange ndyihole, una ame napanda.” (Mateusi 3:16, 17) Ngotyo, Huku walekesa okuti Sesusi wakala omona wae nekevelelo liokukakala vali oandyu keulu, Mouhamba wa Huku. Konyima, mo Pendekosite yenima 33 P.K., ovanthu ovakuavo vambatisalwa, navo ankho mavakauyulilwa ononkhono mba Huku, avakala ovana va Huku nekevelelo liokuenda keulu. — Ovilinga 2:1-4.

Nikondemu ankho tyemupuiya okunoñgonoka etyi Sesusi ekahi nokumulongesa konthele Youhamba. Ngotyo, mokonda ankho Sesusi Omona wa Huku pano pohi, emupopila vali konthele yotyilinga tyae tyakolela. Sesusi apopi okuti: “Iya ngetyi Moisesi atulikile onyoka puetyi eli mehoko, ongotyo Omona womulume makatulikwa, opo aveho vemutavela vakamone omuenyo wahapu.” — Suau 3:14, 15.

Kohale, ova Isilayeli vana ankho vanumatwa nononyoka mboulio, ankho vena okutala konyoka yotyivela opo vahupe. (Números 21:9) Tyelifwa notyo, ovanthu aveho vesukisa okukala nekolelo Momona wa Huku opo vayovolwe mononkhia, avakamona omuenyo wahapu. Opo alekese vali nawa ohole ya Siovaa konthele yotyo, Sesusi apopila Nikondemu okuti: “Mokonda Huku una unene oluembia nouye, waava Omona wae wongunga, opo kese omunthu ukala nekolelo mwe ahakahanyue-ko, mahi akakale nomuenyo wahapu.” (Suau 3:16) Ngotyo, pahe ankho palamba onohanyi epandu tunde etyi ahimbika ovilinga viae mo Selusalei, Sesusi alekesa nawa okuti oe ondyila opo ovanthu aveho vayovoke.

Sesusi apopila Nikondemu okuti: “Huku katumine Omona wae mouye, opo akoyese ouye.” Otyo tyilekesa okuti Sesusi katuminwe pano pohi opo akoyese ovanthu monkhalelo yapenga, okuhitisa ovanthu aveho opo vahanyue-ko. Mahi, ngetyi Sesusi apopia, watuminwe opo “ayovole ouye.” — Suau 3:17.

Nikondemu waovola Sesusi kounthiki mokonda ankho una owoma. Ngotyo, Sesusi amanuhula etompho liavo nonondaka ombu, mbati: “Pahe makoyeswa mokonda yetyi: otyitei [o Sesusi, wetyilekesa nomuenyo wae nondongeso yae] tyeya mouye, mahi ovanthu vahumba vali enthiki tyipona otyitei, mokonda ovilinga viavo ovioundingavivi. Una ulinga ovipuka ovivi, uyele otyitei, keya motyitei tyetyi ovipuka alinga kamavitavelwa. Mahi una ulinga etyi tyaviuka, uya motyitei opo ovilinga viae vimoneka nawa, mokonda etyi alinga tyelikuata nehando lya Huku.” — Suau 3:19-21.

Pahe ankho tyitei komu Faliseu oo Nikondemu, omulongesi mo Isilayeli, okusokolola nawa ku etyi eiva konthele yotyilinga tya Sesusi mehando lya Huku.