Mokonda ankho uhole unene ono apositolu mbae, Sesusi ankho ukahi nokuvepongiya mokonda maende keulu. Atale keulu, elikuambela ku Tate yae, ati: “Nkhimaneka omona wove, opo omona wove nae ekunkhimaneke, ngetyi wemupa outumini wokutumina ovanthu aveho, opo aavele omuenyo wahapu aveho vana wemuavela.” —Suau 17:1, 2.

Tyimoneka nawa okuti Sesusi wetyimona okuti okunkhimaneka Huku tyina esilivilo enene. Mahi, ekevelelo liomuenyo wahapu apopia lipameka unene! Tyetyi Sesusi wapewa “outumini wokutumina ovanthu aveho,” upondola okukuatesako ovanthu aveho mokonda yotyilikutila tyeyovo. Mahi ha aveho mavayambwa. Omokonda yatyi? Omokonda otyilikutila tyeyovo ankho Sesusi maave matyikuatesako vala vana valinga etyi apopia monondaka ombu: “Opo vakamone omuenyo wahapu, vena okunoñgonoka ove Huku wike wotyotyili, nokunoñgonoka una ove watuma, Sesusi Kilisitu.” — Suau 17:3.

Omunthu una okunoñgonoka nawa He, Nomona, nokukala noupanga omuwa navo. Una okutala ovipuka ngetyi ngwe vevitala. Una okulinga ononkhono mbokuhetekela ovituwa viavo monkhalelo atekula vakuavo. Tupu una okunoñgonoka okuti okunkhimaneka Huku tyina vali esilivilo tyipona okukala nomuenyo wahapu. Pahe Sesusi apopi vali konthele yotyo.

Ati: “Ame nekunkhimaneka kombanda yohi, mokonda namana okulinga ovilinga wanthuma. Tate, pahe nkhimanekele ponthele yove, nomunkhima nali nao, etyi ankho kuhenekale ouye.” (Suau 17:4, 5) Sesusi ankho ukahi nokuita na akale vali nomunkhima ali nao keulu tyina amatutiliswa.

Mahi, Sesusi ankho kalimbilwe etyi alinga movilinga viae. Welikuambela okuti: “Ame nanoñgonokesa enyina liove kovanthu wapola mouye, ovemphe. Ankho ovove, mahi wevempha, iya vetavela ondaka yove.” (Suau 17:6) Sesusi movilinga viae ankho kapopila vala ovanthu okuti enyina lya Huku o Siovaa. Wakuatesileko ono apositolu mbae okunoñgonoka etyi enyina olio lilekesa — ovituwa vya Huku nonkhalelo atekula ovanthu.

Ono apositolu vanoñgonokele Siovaa, notyilinga Tyomona wae, novipuka Sesusi alongesa. Nomutima weliola, Sesusi apopi okuti: “Etyi ame nevepopila onondaka mbove, vembutavela iya pahe vanoñgonoka umwe okuti tyili-tyili ndyimutumwa wove, avetavela okuti ove wanthuma.” — Suau 17:8.

Konyima Sesusi apopi omonkhalelo patyi ovalanduli vae velikalela novanthu vomouye, ati: “Ame ndyiveitila-ko, hiitila-ko ouye, mahi ndyiitila-ko vana wampha, mokonda ovove . . . Tate Musukuki, veyunga mokonda yenyina liove, lina ove wampha, opo navo vakale newaneko, ngetyi onthue tuna ewaneko. . . . Neveamena, nawike puvo wavomba-po, pavomba vala omona wehanyauno,” utiwa Sunda Isikaliote, ankho mapakula Sesusi. — Suau 17:9-12.

Sesusi atualako okulikuambela ati: “Ouye uveyele.” “Ame hikuiiti opo uvepole mouye, mahi ndyikuita opo uveyunge, mokonda yondingavivi. Kavalingi onthele youye, ngetyi ame nahalingi onthele youye.” (Suau 17:14-16) Ono apositolu novalongwa ovakuavo ankho vekahi mouye, pokati kovanthu vatuminwa na Satanasi, mahi ankho vena okutualako tyeliyapuka nao novivi viao. Oñgeni ankho mavetyilingi?

Ankho vena okutualako tyasukuka, avaumbila Huku mokuendela motyili tyivasiwa Movihonekwa vyo Hembeleu, notyili Sesusi ankho evelongesa. Sesusi elikuambela, ati: “Vesukukisa notyili; ondaka yove otyili.” (Suau 17:17) Mokueenda kuomuvo, ono apositolu ankho mavahoneka omikanda vilinga onthele “yotyili” tyipondola okukuatesako ovanthu okukala tyasukuka.

Mahi ankho makumoneka ovanthu ovakuavo mavetavela “otyili.” Tupu Sesusi elikuambela ati: “Hiitila-ko vala ava [vana ankho vekahi-po], mahi tupu na vana vekahi nokukala nekolelo mwa ame mokonda yondaka yavo.” Oityi Sesusi eveitilako? Waita okuti: “Opo aveho vakale newaneko, ngetyi ove Tate, una ewaneko na ame iya ame ndyina ewaneko no ove, opo navo vakale newaneko no onthue, opo ouye utavele okuti ove wanthuma.” (Suau 17:20, 21) Sesusi na Tate yae ha munthu wike. Vena ewaneko mokonda velitavela movipuka aviho valinga. Sesusi waita opo ovalanduli vae navo vakale newaneko ngolio.

Sesusi wapopilile Petulu nono apositolu ononkhuavo okuti ankho maende, ekevepongiyile omphangu keulu. (Suau 14:2, 3) Pahe Sesusi apopi vali konthele yotyo melikuambelo ati: “Tate, nahanda ava wampha vakakale na ame apa mandyikakala, opo vamone omunkhima wampha, mokonda ove unthyole tunde etyi kuhenekale ouye.” (Suau 17:24) Ngotyo, walekesa okuti tyina nkhele Andau na Eva vehenekale novana, Huku ankho uhole Omona wae wongunga, una wakala Sesusi Kilisitu.

Sesusi amanuhula okulikuambela, apopi vali konthele yenyina lya Tate yae, nohole Huku ena nono apositolu mbae novanthu ovakuavo vetavela “otyili,” ati: “Ame nevenoñgonokesa enyina liove, iya mandyitualako okulinoñgonokesa, opo ohole ove una na ame ikale muvo iya ame andyikala newaneko navo.” — Suau 17:26.