Komphunda Yomindyambi Sesusi wapopile onthengele-popia yovamphembela ekwi no yonotalendu. Oñgeni ankho mamanuhula okukumbulula epulo liono apositolu mbae konthele yenyingilikilo liokuya kwae no lionthyulilo youye? Wamanuhula nonthengele-popia imwe yonongi novinkhombo.

Sesusi wahimbika okupopia etyi matyiende-po, ati: “Tyina Omona womulume ameya menkhimano liae, kumwe no noandyu ambuho, mapumphama kotyipundi tyae tyoutumini nomunkhima.” (Mateusi 25:31) Sesusi etyiyandyulula nawa okuti wapopiwa monthengele-popia oyo, oe. Ovikando ovinyingi ankho muene uliihana-le okuti, “Omona womulume.” — Mateusi 8:20; 9:6; 20:18, 28.

Onalupi onthengele-popia oyo ankho maifuisuapo? Oputyina Sesusi “ameya menkhimano liae” kumwe no noandyu ambuho, apumphama “kotyipundi tyae tyoutumini nomunkhima.” Ankho wetyipopia-le okuti: ‘Omona womulume meya komakaka o keulu nepondolo nomunkhima omunene’ kumwe no noandyu mbae. Onalupi otyo ankho matyilingwa? Matyilingwa “liwa-liwa konyima yononthiki mbononkhumbi” ononene. (Mateusi 24:29-31; Maluku 13:26, 27; Luka 21:27) Ngotyo, onthengele-popia oyo ankho maifuisuapo komutwe wandyila tyina Sesusi ameya menkhimano liae. Oityi makalinga?

Sesusi wahangununa okuti: “Tyina Omona womulume ameya . . . , omalongo aeho makakongololelwa komutwe wae, iya akayapula ovanthu pokati, ngatyina omunthita ayapula onongi kovinkhombo. Iya makapaka onongi kokulio kwae, mahi ovinkhombo ekevipaka kokumbili kwae.” — Mateusi 25:31-33.

Sesusi apopi konthele yonongi mbapakwa konthele yapandwa, ati: “Konyima, Ohamba maikapopila vana vekahi kokulio kuayo okuti: ‘Endyuei, onwe muayambwa na Tate yange, piñganei Ouhamba wafuiikilwa onwe tunde ponthyimbi youye.’” (Mateusi 25:34) Omokonda yatyi onongi mbapandelwa Nohamba?

Ohamba yahangununa okuti: “Nakalele nondyala, onwe amumphe tyokulia, nakalele nohunga onwe amumphe tyokunwa. Nakalele ongendi, onwe amunthambula nawa. Nakalele muhoyo onwe amumbaleka. Navelele onwe amuya okumphahula. Nali mokaleya onwe amuya okunthala.” Etyi ovanthu ovo vokukahi ngonongi, “ovaviuki” vapula omonkhalelo patyi valinga ovipuka ovio oviwa, evekumbulula okuti: “Aviho mualingila wike ponondenge mbange ava ovatutu, muevilingila ame.” (Mateusi 25:35, 36, 40, 46) Ovipuka ovio ankho kavevilingilile keulu, mokonda kutupu ou uvela, ine ou una ondyala. Ovipuka ovio vevilingila onondenge mba Kilisitu pano pohi.

Iya vokukahi ngovinkhombo, vapakwa kokumbili, mavalingwa-tyi? Sesusi ati: “Konyima [Ohamba] maikapopila vana vekahi kokumbili kwae okuti: ‘Tundei ponthele yange, onwe vokuahinganwa, endei motupia tuhanyimi, tuanthiakanenwa Eliapu no noandyu mbalio. Mokonda nakalele nondyala, mahi onwe kamuamphele natyike tyokulia, nakalele nohunga mahi onwe kamuamphele natyike tyokunwa. Nakalele ongendi, mahi onwe kamuanthambulile nawa, nakalele muhoyo mahi onwe kamuambalekele, navelele, andyikala mokaleya mahi onwe kamueile okunthala.’” (Mateusi 25:41-43) Vokukahi ngovinkhombo vatokala ekoyeso olio, mokonda kavatekulile nokankhenda onondenge mba Kilisitu.

Ono apositolu avanoñgonoka okuti pekoyeso, okutalwa ngongi tyieta omuenyo wahapu, ngotyinkhombo tyieta ehanyauno lya apeho. Sesusi evepopila okuti: “Ngotyo, [Ohamba mekevepopila] okuti: ‘Ame tyotyili ndyimupopila okuti: Mokonda, etyi muhalingilile wike povatutu ava, ame muhetyilingilile.’ Iya ava mavakaya kononkhia mba apeho, mahi ovaviuki mavakaya komuenyo wahapu.” — Mateusi 25:45, 46.

Ekumbululo Sesusi aavelele ono apositolu lievesokesile unene, iya otyo atyivekuatesako okutala nawa ovituwa viavo nevi valinga.