Etyi atunda mo Selikoo, Sesusi aende ko Betania. Ankho vena okuinduka omphunda, avaende onokilometulu 20 mondyila imwe yapenga unene. Lasalu nonomphange mbae vevali ankho vakala pokalongo kamwe okatutu ko Betania, paendwa onokilometulu 3 okutunda ko Selusalei, mombuelo Yomphunda Yomindyambi okuenda no koutundilo.

Ova Sundeu ovanyingi ankho vehika-le mo Selusalei mokonda mavalingi Opasikwa. Ankho veya liwa “opo velisukukise ngetyi ankho tyilingwa,” mokonda hamwe vakuata kovivimbi ine hamwe kotyipuka tyimwe tyivesilisa. (Suau 11:55; Números 9:6-10) Vamwe ankho vehika liwa, aveliongiya mondyuo yokufendela. Ankho velipula inkha Sesusi meya ko Pasikwa. — Suau 11:56.

Ankho vasoka ovipuka vielikalela konthele ya Sesusi. Ononkhalamutwe mbumwe mbonongeleya ankho vahanda okumukuata opo vemuiipae. Ngotyo, avapopila ovanthu okuti tyina vameivi apa Sesusi ekahi, vevepopile “opo vemukuate.” (Suau 11:57) Ononkhalamutwe ombo, vahandele-ale okumuipaa etyi atutilisa Lasalu. (Suau 11:49-53) Moluotyo, ovanthu vamwe ankho vasoka okuti Sesusi kameya povanthu.

Sesusi ehiki mo Betania Mutano, etyi ankho nkhele “kuakamba ononthiki epandu opo Opasikwa ihimbike.” (Suau 12:1) Onthiki onkhuavo (Tyasapalo, 8 ya Nisan) ankho ihimbika putyina ekumbi linyingila. Ngotyo, ngwe ankho wehika etyi Otyasapalo tyihenehike. Ankho kapondola okutunda ko Selikoo Motyasapalo — tyihimbika tyina ekumbi linyingila Mutano alo Tyasapalo tyina linyingila — mokonda ankho tyailikwa novitumino viova Sundeu. Sesusi tyafuile waile keumbo lya Lasalu, ngetyi alinga-lingale.

Simau ankho ukala ko Betania, akongo Sesusi novalongwa vae, nomapanga ae okukutikinyamo Lasalu, opo vakalie keumbo liae Tyasapalo kongulohi. Simau ankho vemuti o “wotyilundu,” tyafuile omokonda wali nouvela wotyilundu ahakulwa na Sesusi. Malata alekesa okuti uundapa unene, alingila atyiho ovaenda. Maliya alingi nawa Sesusi, mahi otyo atyieta ovitateka.

Maliya waikula okapopo ine okanthenda, “komeya litulu yomulela wo nalundu uhahonyene notyipuka natyike, wanika nawa.” (Suau 12:3) Omulela oo ankho ulanda onombongo ononyingi, mbutuuka (onondenaliu 300) mbufetwa omunthu waundapa enima! Maliya atili omulela momutwe wa Sesusi no konomphai mbae iya asekuna-ko nonohuki mbae. Omuniko watyo auliyandyana mondyuo aiho.

Ovalongwa avanumana iya avapulu okuti: “Omokonda yatyi omulela ou unika nawa wapeselelwa ñgaa?” (Maluku 14:4) Sunda Isikaliote ehetyihande, ati: “Omokonda yatyi omulela ou uhalandesililwe onondenaliu 300 iya ambupewa ovahepi?” (Suau 12:5) Sunda ankho kesukile-ale novanthu vahepa. Ankho uhole-ale okuvaka monombongo mbovalongwa ankho apaka nawa.

Sesusi aamena Maliya ati: “Omokonda yatyi mupopila ngotyo omukai ou? Wandinga otyipuka tyikahi nawa. Onwe apeho mamukala novahepi, mahi kamamukala na ame apeho. Omulela ou unika nawa atila kolutu luange, wetyilinga opo elupongiye lukapakwe. Tyotyili ame ndyimupopila okuti, mouye auho pana mapakaiviswa onondaka onongwa, etyi tyalinga omukai ou tupu matyikapopiwa opo ahinangelwe.” — Mateusi 26:10-13.

Ankho pahe wakala onthiki notyihupe mo Betania iya ovanthu ankho vetyiiva okuti Sesusi uli mo Betania. Ova Sundeu ankho veya meumbo lya Simau, ‘ankho kavaendelele vala okutala Sesusi, mahi tupu opo vatale Lasalu una [Sesusi] atutilisa.’ (Suau 12:9) Ovanene-nakwa avasoko okuveipaa aveho, na Sesusi na Lasalu. Ononkhalamutwe ombo mbonongeleya ankho vasoka okuti ovanthu ovanyingi ankho vekahi nokuyumba onthumbi mu Sesusi, mokonda ya Lasalu atutilisa. Ankho ovakalavi unene!