Ankho pahe lietaka, Omutano 14 ya Nisan. Tyina ekumbi linyingila, Otyasapalo 15 ya Nisan matyihimbika. Sesusi wankhia-le, mahi ovifuanga ankho viapapelwa kumwe nae, nkhele ankho vina omuenyo. Ngetyi ankho Ovitumino vipopia, ovivimbi “kavipondola okukala otyinthiki atyiho momuti,” mahi ankho vina okukapakwa “monthiki oyo.” — Deuteronômio 21:22, 23.

Tupu, Mutano komakumbi, ankho utiwa omuvo Wokulipongiya, mokonda ovanthu ankho vapongiya okulia, avamanuhula okulinga ovipuka ovikuavo vihapondola okukevela alo Otyasapalo tyilamba. Tyina ekumbi linyingila, Otyasapalo otyinene ine “tyakolela unene” ankho matyihimbika. (Suau 19:31) Otyasapalo otyo ankho otyinene mokonda viakala ovityasapalo vivali monthiki ike. Tyimwe 15 ya Nisan, onthiki yotete yononthiki epandu-vali Mbotyipito Tyonombolo Mbahapakelwe Onkhiso, ankho iihanwa okuti Otyasapalo. (Levítico 23:5, 6) Otyikuavo Otyasapalo tyosimanu iya otyikando otyo viahimbikila kumwe monthiki ike.

Moluotyo, ova Sundeu avaiti Pilatu akanyaukise ononkhia mba Sesusi novifuanga apapelwa kumwe navio. Metyilingi ñgeni? Ankho una okutuma okuvetyoka ovikalo. Ngotyo, ankho kamavetyivili okufima mokonda vetupu ovikalo vikuatesako olutu pokufima. Omafualali aeya, aatyoko-ko ovikalo viovifuanga aviho vivali. Mahi mokonda Sesusi ankho wankhia-le, avehemutyoko vali ovikalo. Otyo atyifuisapo eulo likahi mo Salmo 34:20 liati: “Upaka nawa omankhipa ae aeho. Nalike pomankhipa ae liateyua.”

Opo omafualali akale nonthumbi yokuti tyili Sesusi wankhia umwe, limwe alimutiula neonga ponthele, konthele yomutima wae. “Liwa-liwa apatundu ohonde nomeva.” (Suau 19:34) Otyo atyifuisapo etyi ovihonekwa viapopia okuti: “Mavakatala ku una vatoma.” — Zacarias 12:10.

Suse wo kepunda-umbo lyo ko Alimateya, “omulume umwe omuhona,” ankho ulingwa onthilo Mombonge yova Sundeu, nae ankho opo ekahi tyina Sesusi aipawa. (Mateusi 27:57) Ankho wiiwe okuti, “omulume umwe ankho ondalawa, omuviuki,” iya ankho “ukevela Ouhamba wa Huku.” Ankho o “umwe povalongwa va Sesusi mahi ankho uliholeka mokonda yowoma nova Sundeu,” moluotyo kakuatesileko vombonge okukoyesa Sesusi. (Luka 23:50; Maluku 15:43; Suau 19:38) Suse akala nomutima wakola, aiti ku Pilatu olutu lwa Sesusi. Pilatu nkhele apulu kefualali inkha Sesusi wankhia, alimupopila okuti wankhia. Pahe Pilatu etavela etyi Suse aita.

Suse alande otyinyanga tyolinyu otyiwa tyasukuka, apolo olutu lwa Sesusi momuti. Suse awingila olutu motyinyanga otyo, okulupongiya opo lukapakwe. Nikondemu, ‘omulume una weile kounthiki ku Sesusi otyikando tyotete,’ nae evekuatesako. (Suau 19:39) Aeta onokilu 33 mbonombao, omirra yahonya nomandombo. Olutu lwa Sesusi aluwingilwa movinyanga viapakwa onombao ombo, ngetyi ova Sundeu ankho valinga tyina vakapaka otyivimbi.

Suse ankho una eendo likahi popepi, liatembwa monkhanda, muhenepakwe nawike, ngamo vapaka olutu lwa Sesusi. Konyima avakulungutisila-po emanya enene pombundi yeendo olio. Otyo vetyilinga liwa tyina Otyasapalo tyihenehimbike. Maliya Mandalena na Maliya ina ya Tiaku Omututu, tyipondola navo vakuatesileko okupongiya olutu lwa Sesusi. Pahe avakahatekela keumbo “okukafuiika onombao nomulela unika nawa,” opo vakawaveke olutu lwa Sesusi tyina Otyasapalo tyamalambe. — Luka 23:56.

Onthiki yalandula-ko, Tyasapalo, ovanene-nakwa nova Faliseu avaende ku Pilatu avati: “Tuahinangela okuti puetyi onkhembi ina ankho ina omuenyo ankho ipopia okuti: ‘Monthiki ya tatu mandyitutiliswa.’ Moluotyo, tuma ovanthu vayunge pelangalo alo monthiki ya tatu, opo ovalongwa vae veheye okumuvaka-mo, avapopila ovanthu okuti: ‘Wapindulua-po pokati ko vokuankhia!’ Iya omatutu oo maalingi vali omanene tyipona o tete.” Pilatu evepopila okuti: “Ovolei omakakunye. Endei, kayungei-po ngetyi muhanda.” — Mateusi 27:63-65.

Tyalumingu kombimba, Maliya Mandalena, na Maliya ina ya Tiaku, novakai ovakuavo avatyindi onombao opo vakapake kolutu lwa Sesusi. Ankho vekahi nokulipula okuti: “Olie meketupolela emanya pombundi yelangalo?” (Maluku 16:3) Mahi ankho kuaenda otyinimawe. Oandyu ya Huku ankho emanya kombundi yeendo yelipola-ko, ovayungi ankho vapita-le iya meendo ankho mutupu natyike!