Ovakai vatumphulukile unene etyi vavasa meendo otyivimbi katyimo! Maliya Mandalena ahateka, aende ku ‘Simau Petulu no komulongwa omukuavo, una ankho Sesusi ehole unene,’ apositolu Suau. (Suau 20:2) Mahi ovakai ovakuavo avamono oandyu imwe peendo. Iya mokati keendo ankho muna oandyu onkhuavo ‘yavala omuvalo utuela.’ — Maluku 16:5.

Oandyu imwe aivepopila okuti: “Muhatilei owoma, mokonda ame ndyityii okuti mukahi nokuovola Sesusi una wapapelelwe momuti. Muno kemo, wapindulwa-po ngetyi apopile. Endyuei mutale apa ankho alangekwa.” Konyima aiti: “Endei liwa kapopilei ovalongwa vae okuti wapindulwa-po pokati ko vokuankhia, ukahi nokuenda komutwe wenyi okuenda no ko Ngalileya, oko mamukemumonena.” (Mateusi 28:5-7) Ovakai ovo, ankho vateketa tupu ankho vahambukwa unene, avaende nokuhateka okukapopila ovalongwa. — Maluku 16:8.

Pahe Maliya avasi Petulu na Suau. Ankho waponwa unene, nokufuima ketyivili, ati: “Tatekulu melangalo vemupola-mo, katutyii opi vekemupaka.” (Suau 20:2) Petulu na Suau avahateka avaende-ko. Suau ahateka vali unene, atetekela okuhika peendo. Atale mokati, amono ovinyanga mahi ahanyingila-mo.

Etyi Petulu ehika-po, anyingila mokati keendo. Amono ovinyanga violinyu, notyinyanga vawingile komutwe wa Sesusi. Suau nae anyingila, pahe etavela etyi Maliya evepopila. Nawike puvo ankho wanoñgonoka okuti Sesusi watutiliswa, namphila ankho evepopilile-tyo. (Mateusi 16:21) Avakondoka keumbo tyanguanguana. Maliya nae ankho wakondoka keendo iya ngapo esala.

Mahi pomuvo opo ovakai ovakuavo, ankho vekahi nokuenda opo vakapopile ovalongwa okuti Sesusi watutiliswa. Tyina vahateka opo veketyipopie, Sesusi evevasi, ati: “Okameniei!” Ovakai ovo “avaikila konongolo ponomphai mbae.” Sesusi evepopila okuti: “Muhatilei owoma! Endei kapopilei ovalanduli vange opo vaye ko Ngalileya, oko mavakamonena.” — Mateusi 28:9, 10.

Kombimba, etyi kuaenda otyinimawe, onoandyu ambumonekela ovayungi, “avateketa, avehetyivili okupikita.” Pahe etyi vakala nawa, avanyingila mepunda-umbo, “avakapopila ovanene-nakwa ovipuka aviho viaenda-po.” Ovanene-nakwa avelipakela-mo novakulu vova Sundeu. Avatokola okufeta ovayungi opo vehetyipopie, avati: Popiei vala okuti: “Ovalongwa vae veile okumuvaka-mo kounthiki pu etyi onthue tulele.” — Mateusi 28:4, 11, 13.

Omafualali o Loma ankho apondola okuipawa inkha apewa otyilinga tyokuyunga aalala, moluotyo ovanene-nakwa avevepopila okuti: ‘Inkha omutumini utyiiva [okuti ankho mulele], onthue matumupopila etyi tyaenda-po, onwe muhesukei.’ (Mateusi 28:14) Omafualali aetavela okufetwa, aalingi ngetyi ovanene-nakwa veepopila. Moluotyo, omatutu okuti olutu lwa Sesusi luavakwa, ailiyandyana mo va Sundeu.

Maliya Mandalena nkhele ankho ukahi peendo ulila. Atale mokati, amono onoandyu onombali mbavala omivalo vituela. Imwe ipumphi apa Sesusi ankho atuala omutwe, onkhuavo okovikalo. Ambumupulu okuti: “Ulila-tyi?” Maliya ati: “Vatyinda-po Tatekulu yange, iya ame hii opi vekemupaka.” Etyi Maliya apiluluka, amono vali omunthu umwe. Omunthu oo apulu Maliya etyi onoandyu mbemupula-le, okuti: “Ulila-tyi?” Ayawisako okuti: “Olie ukahi nokuovola?” Maliya asoko okuti hamwe omulimi, ati: “Tatekulu, inkha ove wemupola-mo, mphopile opi wemupaka, ndyikemupole-po.” — Suau 20:13-15.

Mahi Maliya ankho ukahi nokupopia na Sesusi watutiliswa, kemuimbukile. Sesusi emuihana ati: “Maliya!” Pahe aimbuka ondaka yae, anoñgonoka okuti o Sesusi. Nehambu Maliya ati: “Raboni!” (tyihangununa okuti “Mulongesi!”) Mahi mokonda wasoka okuti hamwe maende keulu, emukuate. Moluotyo, Sesusi emupopila okuti: “Pahe ndyeke, mokonda ame nkhele hineende ku Tate. Mahi, enda konondenge mbange, iya ovepopila okuti: ‘Ame ndyikahi nokuenda ku Tate yange tupu Tate yenyi, ku Huku yange tupu Huku yenyi.’” — Suau 20:16, 17.

Maliya ahateka, aende apa ono apositolu ankho vekahi. Evepopila etyi ovakai ovakuavo ankho vevepopile-ale ati: “Ame namona Tatekulu!” (Suau 20:18) Mahi ovipuka ovio vapopia, ono apositolu “avevitale ngatyina ovioutyova.” — Luka 24:11.