Motyinthiki tyahulilila akala nono apositolu mbae, Sesusi wakohele onomphai mbavo opo evelongese okuliola omutima. Otyo ankho tyaviuka mokonda yatyi? Omokonda yeyembelo liapenga ankho vena. Namphila ankho vaumbila Huku, mahi nkhele ankho vasukalala nokukala ovanene vali. (Maluku 9:33, 34; 10:35-37) Eyembelo olio avelilekesa vali motyinthiki otyo.

Ono apositolu avahimbika “okuyaya poyavo konthele yolie omunene vali pokati kavo.” (Luka 22:24) Tyipondola Sesusi welitehelele omapita etyi evemona vali vatañguna. Iya alingi-tyi?

Sesusi kevekandukilile mokonda yotyituwa tyavo, netyi ankho vekahi nokulinga, mahi noumphua-lundo evekuatesako okusoka, ati: “Onohamba mbomalongo mbokupomba ovanthu iya vana vatumina vaihanwa okuti Vokulinga Oviwa. Mahi onwe kamupondola okukala ngotyo. . . . Olie omunene ku vakuavo, oyouna upumphi komesa ine oyouna ukahi nokuava?” Konyima Sesusi evehinangelesa ongeleka yae, ati: “Mahi ame ndyikahi pokati kenyi ngou ukahi nokumuundapela.” — Luka 22:25-27.

Namphila ankho valinga oviponyo, ono apositolu valambelele movitateka ovinyingi na Sesusi. Ngotyo, Sesusi evepopila okuti: “Ame ndyilinga omphango no onwe, ngetyi Tate alinga na ame omphango youhamba.” (Luka 22:29) Ovalume ovo, ankho ovalanduli ovakuatyili va Sesusi. Sesusi evepopila okuti mokonda yomphango ankho alinga navo, mavakatumina nae Mouhamba wa Huku.

Namphila ono apositolu ankho vena ekevelelo olio ewa, nkhele ankho ovakuankhali. Sesusi evepopila okuti: “Simau, Simau, Satanasi waita opo amuho musiswe ngotiliku.” (Luka 22:31) Tupu evelondola okuti: “Onwe amuho otyinthiki etyi mamunthyi-po, mokonda yovipuka mavipiti na ame. Mokonda tyahonekwa okuti: ‘Ame mandyiipaa omunthita, iya onongi ambulityandyana.’” — Mateusi 26:31; Zacarias 13:7.

Petulu ankho weliyumba onthumbi akumbulula okuti: “Namphila vakuetu aveho mavekusi-po mokonda yovipuka mavipiti no ove, ame himekusi-po nalumwe!” (Mateusi 26:33) Sesusi emupopila okuti tyina nkhele ekuandambolo lihenepopie tuvali motyinthiki otyo, Petulu ankho mapopi okuti hikwii. Sesusi ayawisako okuti: “Ame ndyikahi nokukulingila-ko unene omalikuambelo, opo ekolelo liove lihatepuluke. Iya ove tyina wamakondoka pameka ovakuatate vove.” (Luka 22:32) Mahi, Petulu apopi tyeliyumba onthumbi ati: “Alo umwe inkha tyesukisa mandyinkhi no ove, himapopi okuti hikwii.” (Mateusi 26:35) Ovalongwa ovakuavo tupu ngatyo vapopia.

Sesusi apopila ovalongwa vae okuti: “Himakala vali no onwe ehimbwe. Mamundyovola, mahi ngetyi napopila ova Sundeu, etyi nati ‘Oku ndyenda onwe kamupondola okuenda-ko,’ no onwe otyo ndyimupopila.” Ayawisako okuti: “Ame ndyimupa otyitumino otyipe, tyokuti kalei nohole pokati kenyi, ngetyi ame nakala nohole no onwe, no onwe kalei nohole pokati kenyi. Moluotyo, ovanthu aveho mavanoñgonoka okuti muvalongwa vange inkha mukala nohole pokati kenyi.” — Suau 13:33-35.

Etyi Petulu eiva okuti Sesusi ankho kamakala vali navo ehimbwe, apulu okuti: “Tatekulu, opi moende?” Sesusi akumbulula okuti: “Oku mandyeende, ove kupondola okundandula pahetyino, mahi mondandula vala haa.” Petulu anguanguana, apulu okuti: “Tatekulu, ame hipondola okukulandula pahetyino mokonda yatyi? Ame mandyiave omuenyo wange mokonda yove.” — Suau 13:36, 37.

Sesusi pahe apopi etyi atumine ono apositolu mbae okukaivisa ko Ngalileya avahatyindi onombongo, nii osaku yokulia. (Mateusi 10:5, 9, 10) Evepulu okuti: “Muna etyi muakambele?” Avati: “Au!” Mahi, oityi ankho vena okulinga kononthiki mbo komutwe? Sesusi wevepopila okuti: “Ou una otyipapo tyonombongo etyityinde, nou una osaku yokulia, iya ou uhena omutunga alandese omuvalo wae alande wike. Mokonda ame ndyimupopila okuti etyi tyahonekwa tyina okufuisuapo mu ame tyokuti: ‘Wavalulilwa kumwe no vokutomba ovitumino.’ Mokonda otyo tyikahi nokufuiswapo mu ame.” — Luka 22:35-37.

Sesusi ankho ukahi nokupopia omuvo mapapelwa momuti, pokati konondingavivi. Konyima yotyo, ovalanduli vae ankho mavamoneswa unene ononkhumbi. Ankho vasoka okuti velipongiya-le avati: “Tatekulu, tala! pena omitunga vivali.” Evekumbulula okuti: “Vituuka.” (Luka 22:38) Nomitunga ovio vivali vatyinda, Sesusi ankho mevelongesa otyipuka otyikuavo tyakolela.