Etyi nkhele ankho ekahi Komphunda Yomindyambi nono apositolu mbae vekuana, Sesusi evepopila onthengele-popia onkhuavo. Ononthiki mbumwe mbokualamba, etyi ankho ekahi mo Selikoo, wapopile onthengele-popia yonomina opo alekese okuti Ouhamba mauya vala komutwe wandyila. Pahe apopi onthengele-popia yelifwa no oyo. Ankho nayo ikumbulula epulo konthele yokuya kwae nonthyulilo youye. Yalekesa vali unene okuti ovalongwa vae vena okukala nombili movilinga vapewa.

Sesusi ahimbika, ati: “Tupu Ouhamba wo keulu, upondola okuelekwa nomulume umwe, malingi oungendi, mahi aihana ovaundapi, opo evehile omalumono ae.” (Mateusi 25:14) Mokonda Sesusi welielekele-ale nomulume walinga oungendi “opo akavialekwe kouhamba,” ono apositolu ankho vapondola okuimbuka liwa okuti “omulume” oo, o Sesusi. — Luka 19:12.

Etyi nkhele omulume wo monthengele-popia eheneende, atepaulila ovapika vae omalumono ae. Mokueenda kuovilinga viae momanima etatu notyihupe, Sesusi ankho wesuka vali nokuivisa onondaka onongwa Mbouhamba wa Huku, alongesa ovalongwa vae okulinga ovilinga ovio. Pahe ankho maende, nonthumbi yokuti mavatualako okulinga ovilinga evelongesa. — Mateusi 10:7; Luka 10:1, 8, 9; tyieleka na Suau 4:38; 14:12.

Monthengele-popia, oñgeni omulume atepaulile omalumono ae? Sesusi wati: “Umwe emuavela onotalendu ononthano, omukuavo emuavela onombali iya omukuavo ike, weveavela kese wike etyi evila okulinga, iya alingi oungendi.” (Mateusi 25:15) Oityi ovapika ovo ankho mavalingi ovipuka vapewa? Okuti ankho mavakala nombili, aveviundapesa ngetyi omuhona wavo ahanda?

Sesusi apopila ono apositolu mbae okuti: “Liwa-liwa wokuatambula onotalendu ononthano aende, akalinga ovitanda iya amono-mo vali onotalendu ononthano. Tupu wokuatambula onombali amono-mo vali onombali. Mahi una wokuatambula vala ike, waya akaheya pohi iya aihila-po onombongo mbomuhona wae.” (Mateusi 25:16-18) Oityi ankho matyimoneka-po tyina omuhona amakondoka?

Sesusi atualako, ati: “Etyi palamba omuvo omunyingi, omuhona wovapika ovo eya, evepulu etyi valinga no nombongo mbae.” (Mateusi 25:19) Ovapika vevali votete, valingile “kese wike etyi evila okulinga.” Ovapika ovo vakalele nombili, avalingi ononkhono, avayawisa kovipuka ankho vapewa. Wokuatambulile onotalendu ononthano ayawisako vali ononthano, wonombali ayawisako vali onombali. (Pomuvo opo, omunthu ankho una okuundapa omanima 19 opo afetwe otalendu ike.) Omuhona apandula ovapika ovo vevali, ati: “Walinga nawa, mupika omukuatyili, nokuayumbwa onthumbi! Waundapa noukuatyili movipuka vihehi. Mandyikuavela vali ovipuka  ovinyingi. Hambukilwa kumwe nomuhona wove.” — Mateusi 25:21.

Mahi omupika wokuatambulile otalendu ike ankho welikalela. Wati: “Muhona, ame ndyikwii okuti umulume upuilisa, uteya pana uhakunine nokuongiya apa uhatyopelele. Moluotyo, natila owoma, iya andyikaholeka otalendu yove pohi. Oyei neikondola.” (Mateusi 25:24, 25) Omupika oo, alo umwe kapakele onombongo kombango opo ayawise komalumono omuhona wae. Ngotyo, etyi alinga katyelikuatele netyi ankho omuhona wae ahanda.

Ankho tyaviuka omuhona wae okumuihana okuti “mupika ondingavivi nokuna ondende.” Avemupolo etyi ankho ena, avetyiavela omupika ankho uhanda okuundapa nombili. Omuhona apopi okuti: “Omunthu wokuna, makapewa vali akakala notyinyingi. Mahi, una uhena, alo etyi ena meketyipolwa.” —Mateusi 25:26, 29.

Ovalongwa va Sesusi ankho valongeswa ovipuka ovinyingi vena okusokolola, alo umwe nongeleka oyo. Ankho vapondola okunoñgonoka okuti etyi Sesusi ekahi nokuveavela — elao enene liokulinga ovalongwa — elao liakolela unene. Iya Sesusi ankho ukevelela vafuisepo nombili ovilinga ovio. Sesusi ankho kasoko okuti aveho vena okulinga otyipuka tyike movilinga viokuivisa eveavela. Ngetyi apopia monthengele-popia, ‘kese wike ulinga etyi evila.’ Otyo katyilekesa okuti Sesusi mahambukilwa omunthu ‘una ondende,’ uhalingi atyiho opo ayawise komalumono Omuhona wae.

Tyafuile ono apositolu vahambukilwe, etyi veiva onondaka ombo: “Omunthu wokuna, makapewa vali”!