Etyi Sesusi ambatisalwa, liwa-liwa atumbukilwa nondyale imwe ankho ihanda okumuyondya, puetyi nkhele ehenehimbike ovilinga viae. Ondyale oyo, Eliapu, liaovolele okuyondya Sesusi ovikando ovinyingi. Konyima, Sesusi apopi konthele yondingavivi oyo, ati: “Omutumini wouye uno ukahi nokuya, mahi utupu epondolo liokundinga na tyike.” — Suau 14:30.

Memonekelo, apositolu Suau wamuene etyi matyimonekela ‘enyoka enene, enyoka lyo konthuko, litiwa Eliapu Satanasi.’ Ondyale oyo onene yovanthu aveho ankho maitaatwa keulu, ‘aikala nonyengo onene, mokonda ityii okuti ina vala omuvo wehehi.’ (Eholololo 12:9, 12) Ovakilisitau vena ehunga ewa liokutavela okuti vekahi ‘momuvo oo uhehi,’ nokuti apa katutu “enyoka enene, onyoka yo konthuko” maiyumbwa metoto liaya kohi, aihevili vali okulinga natyike momanima 1000 Sesusi makatumina Mouhamba wa Huku. — Eholololo 20:1, 2.

Mokueenda kuomuvo oo, oñgeni eumbo lietu, ohi maikakala? Ovalie mavakakala-mo, iya oñgeni mavakakala? Sesusi wakumbulula omapulo oo. Monthengele-popia yae yonongi novinkhombo, walekesa oityi matyikamonekela ovaviuki vekahi ngonongi, valinga nawa onondenge mba Sesusi nokuvekuatesako. Tupu walekesa nawa oityi matyikamonekela vana vahalingi ovipuka ovio, vokukahi ngovinkhombo. Sesusi wati: “Ava [ovinkhombo] mavakaya kononkhia mba apeho, mahi ovaviuki [onongi] mavakaya komuenyo wahapu.” — Mateusi 25:46.

Otyo tyitukuatesako okunoñgonoka etyi Sesusi apopilile omulume otyifuanga ankho wapapelwa ponthele yae. Sesusi kapopilile omulume oo okuti makakala Mouhamba wo keulu, ngetyi alaa ono apositolu mbae ovakuatyili. Mahi, Sesusi wemupopila okuti: “Ove mokakala na ame Momphangu Yombembwa.” (Luka 23:43) Ngotyo, omulume oo wapewa ekevelelo liokukakala Momphangu Yombembwa, omphangu imwe ongwa unene. Hono, vana valekesa okuti vekahi ngonongi, vana “mavakaya komuenyo wahapu,” navo mavakakala Momphangu oyo Yombembwa.

Otyo tyelikuata netyi apositolu Suau apopia konthele yo ñgeni ovipuka mavikakala pano pohi. Wati: “Ekaka lya Huku, likahi pokati kovanthu iya Huku makakala navo, ngwe avakakala ovanthu vae. Iya Huku akakala navo. Huku makasekuna ononkhuka momaiho avo, ononkhia kamambukakala-ko vali, nii okuliyava, nii okulila nii omaluihamo kavikakala-ko vali. Ovipuka vyo kohale vialamba-le.” — Eholololo 21:3, 4.

Opo omulume una otyifuanga akakale nomuenyo Momphangu Yombembwa, una okukapindulwa-po kononkhia. Mahi hae vala aike matutiliswa. Sesusi wetyipopia nawa etyi ati: “Makuya oola aveho vana vekahi momalangalo mehinangelo lya Huku, mavekeiva ondaka yae, avatundu-mo, vana valinga ovipuka oviwa, avatutila opo vakale nomuenyo, mahi vana valinga ovipuka ovivi, avatutila opo vakoyeswe.” — Suau 5:28, 29.

Iya ono apositolu ovakuatyili, novanthu ovakuavo vehehi vana mavakakala na Sesusi keulu, mavakalinga-tyi? Ombimbiliya ipopia okuti: “Mavakakala ovanakwa va Huku na Kilisitu, avakakala onohamba iya avakatumina na Kilisitu omanima 1.000.” (Eholololo 20:6) Vana mavakatumina na Kilisitu keulu, ovalume novakai vakalele pano pohi. Ngotyo, mokonda vakalele pano pohi, mavakakala ovatumini vokankhenda, vanoñgonoka nawa ovitateka viovanthu pano pohi. — Eholololo 5:10.

Mokonda yotyilikutila tyae, Sesusi makapola-ko ovitateka aviho viatuka konkhali. Sesusi na vana mavakatumina navo, mavakuatesako ovanthu avakala tyihena onkhali. Mavakakala nomuenyo Huku evehandelele ponthyimbi, pu etyi apopilile ovo Andau na Eva vakale novana ovanyingi, avayulisa ohi. Alo umwe ononkhia, mbatuka konkhali ya Andau, kamambukakala-ko vali!

Ngotyo, Sesusi makafuisapo atyiho Siovaa emutuma. Konthyulilo Youtumini wae Womanima Ovityita Ekwi, Sesusi makapakula Ouhamba, novanthu aveho vehena vali onkhali ku Tate yae. Otyo tyilekesa okuti Sesusi weliola omutima iya apositolu Paulu wati: “Tyina ovipuka aviho viamapakwa mombuelo yonomphai mbae, pahe Omona nae ukakala mombuelo ya Una wapaka ovipuka aviho mombuelo yae, opo Huku akale ovipuka aviho ku aveho.” — 1 Ova Kolindu 15:28.

Tyotyili, Sesusi una otyilinga tyakolela mokufuisapo ovipuka Huku ahanda. Iya putyina ovipuka ovio vitualako okufuisuapo, Sesusi makatualako okukala etyi apopia okuti: “Ame, ame ondyila, ame otyili, ame omuenyo.” — Suau 14:6.