Motyasikunda, onthiki 10 ya Nisan, Sesusi ankho ukahi mondyuo ya Huku nokupopia ononkhia mbae ankho mbuli popepi. Sesusi ankho wasukalala noñgeni otyo ankho matyikalesa enyina lya Huku, ati: “Tate nkhimaneka enyina liove.” Iya keulu akutundu ondaka, aiti: “Ame nelinkhimaneka-le, iya mandyilinkhimaneka vali.” — Suau 12:27, 28.

Ovanthu ankho vekahi popepi avanguanguana. Vamwe ankho vasoka okuti veiva omutitimo. Ovakuavo avati: “Oandyu yapopia nae.” (Suau 12:29) Mahi, ankho ondaka veiva oya Siovaa! Iya otyo ankho hatyikando tyotete ovanthu veiva ondaka ya Huku upopia konthele ya Sesusi.

Ankho palamba omanima etatu notyihupe tunde etyi Suau Batisita ambatisala Sesusi, eivi etyi Huku apopia konthele ya Sesusi okuti: “Ou Omona wange ndyihole, una ame napanda.” Iya konyima yo Pasikwa menima 32 P.K., Tiaku, na Suau, na Petulu vamuene etyi Sesusi apilululwa. Ovalume ovo vetatu aveivi etyi Huku apopia okuti: “Ou Omona wange, onthyolwe, una ame napanda, mutavelei.” (Mateusi 3:17; 17:5) Mahi pahe, otyikando etyi tyatatu, Siovaa wapopia monkhalelo ovanthu ovanyingi vapondola okumuiva!

Sesusi ati: “Ondaka oyo kayeivalele mokonda yange, mahi omokonda yenyi.” (Suau 12:30) Otyo ankho otyilekeso tyokuti Sesusi tyotyili Omona wa Huku, o Mesiya walaelwe.

Onkhalelo Sesusi atyindile omuenyo wae yalekesa oñgeni ovanthu vena okutyinda omuenyo, tupu yalekesa okuti Satanasi Eliapu, omutumini wouye, watokala okuipawa. Sesusi ati: “Pahe ouye uno ukahi nokukoyeswa, iya omutumini wao mapolwa-ko.” Ononkhia mba Sesusi ankho mbukahi popepi kambulekesa okuti mafindwa, mahi mbulekesa okuti oe mafindi. Ñgeni ngotyo? Sesusi wahangununa okuti: “Tyina namatulikwa momuti, mandyikokela ovanthu vatyo aveho ku ame.” (Suau 12:31, 32) Nononkhia mbae momuti wemone, Sesusi ankho makokela ovanthu kwe, aikula ondyila ituala komuenyo wahapu.

Ovaunyingi avakumbulula Sesusi etyi apopia konthele ‘yokutulikwa momuti,’ avati: “Ovitumino viati Kilisitu utualako apeho. Oñgeni ove uti Omona womulume una okutulikwa? Omona watyo oo womulume olie?” (Suau 12:34) Namphila ovanthu vamuene ovipuka ovinyingi, alo umwe veivile ondaka ya Huku, ovanyingi puvo kavetavelele okuti Sesusi tyotyili oe Omona womulume, Mesiya walaelwe.

Ngetyi ankho alinga-le, Sesusi apopi okuti oe ‘otyimimi.’ (Suau 8:12; 9:5) Alondola ovanthu okuti: “Otyimimi mamukala vali natyo katutu. Endei putyina nkhele muna otyimimi, opo enthiki lihemufinde . . . Putyina muna otyimimi, kalei nekolelo motyimimi, opo mukale ovana votyimimi.” (Suau 12:35, 36) Konyima, Sesusi atundu-po, mokonda onthiki 10 ya Nisan ankho hayoko maipawa. Onthiki yae ‘yokutulikwa’ ankho o po Pasikwa yo 14 ya Nisan — etyi ankho mapapelwa momuti. — Ova Galata 3:13.

Okutala kovilinga Sesusi alinga konyima, tyimoneka nawa okuti ova Sundeu okuhakala nekolelo mu Sesusi tyafuisapo eulo. Isaiya waulile okuti omaiho ovanthu kamaakamona-po iya omitima viavo mavikatena opo vahapiluluke iya avavelulwa. (Isaías 6:10; Suau 12:40) Ova Sundeu ovanyingi vaanyenene tyawina ovipuka ankho vilekesa okuti Sesusi oe Omuyovoli wavo walaelwe, ondyila yomuenyo.

Nikondemu, na Suse yo ko Alimateia, novatumini ovakuavo, ankho ‘vena ekolelo’ mu Sesusi. Mahi okuti ankho mavalekesa ekolelo olio kounyingi, ine ankho maveliholeka mokonda yowoma wokutaatua mongeleya ine mokonda ‘yokuahumba vali omunkhima wovanthu?’ — Suau 12:42, 43.

Sesusi ahangununa oityi tyakutikinya okukala nekolelo mwe, ati: “Una ukala nekolelo mu ame, kakala vala nekolelo mu ame, mahi no mu una wanthuma. Iya una weete ame tupu weete Una wanthuma.” Otyili Huku atumine Sesusi alongese ovanthu, tyina Sesusi ankho atualako okuivisa, tyakolela unene, moluotyo apopi okuti: “Una uhesukile na ame, ehetavela etyi ame ndyipopia pena ou memukoyesa. Etyi ame ndyipopia otyo matyimukoyesa monthiki yahulilila.” — Suau 12:44, 45, 48.

Sesusi amanuhula okupopia, ati: “Ame hapopile etyi nahanda, mahi Tate wokuanthuma oe wandongesa etyi ndyina okupopia netyi ndyina okulongesa. Iya ame ndyityii okuti ovitumino viae vihangununa omuenyo wahapu.” (Suau 12:49, 50) Sesusi ankho utyii okuti kuakamba vala katutu opo amomese ohonde yae, pokulinga otyilikutila tyiyovola omienyo viovanthu aveho vena ekolelo mwe. — Ova Loma 5:8, 9.