Ankho pahe kukahi nokutya iya Petulu aanye Sesusi otyikando tyatatu. Ovatumini Vombonge onene, avamane ekoyeso liavo, avaende. Mutano komuhuka aveliongiya vali, mokutala ankho vahanda okulilekesa ngatyina etyi vakoyesa Sesusi kounthiki, movitumino tyaviuka. Sesusi atualwa vali kuvo.

Avemupopila vali okuti: “Inkha ove Kilisitu, tupopile.” Sesusi evekumbulula ati: “Alo umwe inkha ndyimupopila, kamamutavela. Tyihe-otyo vala, inkha ndyimupula kamamukumbulula.” Nomutima wakola Sesusi evelekesa nawa okuti oe umwe omona womulume, ngetyi tyipopia Daniel 7:13. Evepopila okuti: “Okutuka hono, Omona womulume makapumphama kokulio kwa Huku kuepondolo.” — Luka 22:67-69; Mateusi 26:63.

Ngwe avatualako okupula avati: “Muaina ove Umona wa Huku?” Sesusi ati: “Muene onwe mukahi nokutyipopia.” Mokonda yonondaka ombo apopia, avati Sesusi una okuipawa, wapopia omapita Huku. Avapulu okuti: “Omokonda yatyi tuesukisila vali onombangi?” (Luka 22:70, 71; Maluku 14:64) Moluotyo avakutu Sesusi, avemutuala ku Posiu Pilatu, Omutumini wo Loma.

Tyipondola Sunda ankho utyiete tyina Sesusi atualwa ku Pilatu. Etyi anoñgonoka okuti Sesusi maipawa, akala omapita mokonda yetyi alinga. Mahi asoko vala okukondola onombongo mbopalata 30, ahaovola okukondoka ku Huku nomutima auho opo aevelwe. Sunda apopila ovanene-nakwa ati: “Nalinga onkhali etyi nayondya omunthu omuviuki.” Avemupopila onondaka mbulekesa okuti kavesukile, avati: “Onthue tuesuka natyo? Otyo otyove!” — Mateusi 27:4.

Onombongo 30 mbopalata Sunda ekembuyumba mondyuo ya Huku, ekeliyendya, otyo atyiyawisa konkhali yae. Mahi tyafuile etyi ahetekela okuliyendya, ompha yomuti omu akutila ongoi aitipuka. Atokela kombanda yonkhanda, anianguka. — Ovilinga 1:17, 18.

Komuhuka-huka Sesusi atualwa keumbo lya Posiu Pilatu. Mahi etyi ova Sundeu vemutuala avahanyingila meumbo. Ankho vasoka okuti okukala kumwe novanthu veheva Sundeu matyivesilisa. Inkha valingile ngotyo, opo ñgeno kavakalele potyipito tyonthiki 15 ya Nisan, onthiki yotete Yotyipito Tyonombolo Mbehena Onkhiso, ankho tyilinga onthele yomuvo wo Pasikwa.

Pilatu alupuka kondye, evepulu okuti: “Oityi tyapenga omulume ou alinga?” Avati: “Inkha omulume ou handingavivi-ko, ñgeno katuemuetele kuove.” Pilatu elitehelela okuti vekahi nokumukuluminya, evepopila okuti: “Mutyindei-po onwe muene amukemukoyesa novitumino vienyi.” Ova Sundeu avalekesa okuti ankho vahanda okumuipaa, etyi vati: “Onthue tutupu otyitumino tyokuipaa omunthu.” — Suau 18:29-31.

Inkha vaipaele Sesusi pomuvo wo Pasikwa, mokonda ankho pena ovanthu ovanyingi ñgeno tyaeta omalwei. Mahi inkha vemutuala kova Loma avemutendeleya okuti watyitukilapo ovatumini, ova Loma ankho mavetyivili okumuipaa. Ngotyo ova Sundeu ankho kamavavelwa onombei novanthu.

Ononkhalamutwe mbonongeleya avahapopila Pilatu okuti Sesusi wapakulilwa kononkhia mokonda yokuapopia omapita Huku. Avemutendeleya ovipuka vielikalela okuti: “Tuavasa omulume ou [1] ukahi nokuhindila ovanthu vetu vatyitukilepo omutumini, [2] opo vahafete elilimu ku Sesale, tupu [3] wati oe o Kilisitu ohamba.” — Luka 23:2.

Mokonda Pilatu ankho oe omutimini wova Loma, ankho una ehunga liokusukalala etyi eiva okuti Sesusi ukahi nokupopia okuti ohamba. Ngotyo anyingila meumbo, aihana Sesusi iya emupulu okuti: “Ove Hamba yova Sundeu?” Monondaka ononkhuavo, wapula okuti: ‘Ove waanya ovitumino, pahe ulipopia muene ove okuti uhamba, okutyitukilapo Sesale?’ Mokutala Sesusi ankho wahanda anoñgonoke ovipuka aviho Pilatu apopilwa, emupulu okuti: “Wapula ngotyo mokonda utyii ine ovakuenyi vekupopila-tyo?” — Suau 18:33, 34.

Pilatu alekesa ngatyina ehei natyike konthele ya Sesusi, pahe uhanda okutyinoñgonoka, ati: “Okuti ame ndyimu Sundeu? Ovelongo liove muene novanene-nakwa vekueeta ku ame. Oityi walinga?” — Suau 18:35.

Etyi akumbulula Pilatu, Sesusi apopi unene konthele Youhamba wae iya otyo atyihuvisa unene Pilatu.