Sesusi ankho wakala omuvo umwe motyilongo tyitiwa Peleya, ‘okuyauka ondongi Solondau.’ (Suau 10:40) Pahe ankho wenda no ko Selusalei.

Sesusi ankho kekahi aike. Ankho ukahi nokueenda novalongwa vae, ‘novanthu ovanyingi,’ okukutikinya-mo ovatanthi vomalilimu no vokulinga nonkhali. (Luka 14:25; 15:1) Ova Faliseu novahoneki vovitumino, vokupopia omapita etyi Sesusi alongesa netyi alinga, tupu ankho opo vekahi. Ankho vena ovipuka ovinyingi vesukisa okusoka vina veiva monongeleka mba Sesusi konthele yongi yavombele, nomona wavombele, nomulume omuhona na Lasalu. — Luka 15:2; 16:14.

Sesusi pahe esuku vali unene novalongwa vae, mokutala ankho nkhele ukahi nokusoka kovanthu vemuyele, vemupopia omapita nokumulinga omukuele. Apopi otyipuka alongesile-ale ko Ngalileya.

Mongeleka, Sesusi ati: “Makukala apeho ovipuka vilingisa ovanthu onkhali. Mahi una uvietako ngongo yae! . . . Litalei nawa. Inkha omukuatate wove ulinga onkhali, muviyula, inkha ulivela mueevela. Alo umwe inkha ukulinga otyiponyo ovikando epandu-vali monthiki, akondoka kuove ovikando epandu-vali, ati: ‘Nelivela,’ una okumuevela.” (Luka 17:1-4) Onondaka mbahulilila tyafuile mbahinangelesile Petulu epulo alingile konthele yokuevela ovikando epandu-vali. — Mateusi 18:21.

Okuti ovalongwa ankho mavaendela monondaka mba Sesusi? Etyi vapopila Sesusi okuti, “Tuavele vali ekolelo,” ngwe evepopila okuti: “Inkha muakalele nekolelo lilifwe poñgima yo mostarda, mupondola okupopila omuti oo okuti, ‘Tukuka-po okelituika melunga!’ iya aumutavela.” (Luka 17:5, 6) Alo umwe nekolelo lihehi, ankho vapondola okulinga ovipuka ovinyingi.

Sesusi atualako okulongesa esilivilo liokuliola omutima, nokulitala monkhalelo yapola pokati, apopila ono apositolu okuti: “Olie pu onwe una omupika wae wakalimisile ine wakalisile, tyina eya umupopila okuti, ‘Omako kanyauka, pumphama komesa ulie’? Kemupopila okuti: ‘Lula-mo ovikutu ovio ovale ovikuavo unthelekele okulia kuange kuondalelo, ondyetela okulia alo ndyimana okulia andyinu, pahe konyima, no ove oli, onu’? Okuti mapandula omupika mokonda walinga etyi emutuma? Tupu, no onwe tyina muamalingi ovipuka aviho muatumwa popiei okuti: ‘Tuvapika vahasilivila. Tualinga etyi ankho tuna okulinga.’” — Luka 17:7-10.

Kese muumbili wa Huku wesukisa okunoñgonoka esilivilo liokupaka ovilinga vya Huku pomphangu yo tete. Tupu, kese umwe una okuhinangela elao ena liokuumbila Huku ngomunthu womeumbo liae.

Tyipondola etyi amana okupopia, opo omunthu umwe watumwa na Maliya na Malata ehika. Ovakai ovo ankho onomphange mba Lasalu, ankho vakala mo Betania yo Sundeya. Omunthu oo, ati: “Tatekulu, una uhole unene wavela.” — Suau 11:1-3.

Namphila apopilwa okuti epanga liae Lasalu wavela unene, Sesusi ahakala tyihalingi natyike mokonda yokueihamenwa. Mahi, ati: “Onthyulilo youvela oo hanonkhia-ko, mahi omunkhima wa Huku, opo Omona wa Huku ankhimanekwe.” Akala opo ononthiki onombali iya konyima apopila ovalongwa vae okuti: “Tuendei vali ko Sundeya.” Avaanye, avati: “Mulongesi, hanonthiki ombu ova Sundeya vahandele okukutyopa nomamanya, nkhele oko wenda vali?” — Suau 11:4, 7, 8.

Sesusi evekumbulula ati: “Otyitenya katyina onoola 12? Inkha umwe weenda komutenya, kelipunduka, mokonda weete otyimimi tyouye ou. Mahi inkha umwe weenda kounthiki, melipunduka mokonda uli menthiki.” (Suau 11:9, 10) Tyipondola Sesusi ankho ukahi nokupopia okuti omuvo Huku anaka pala ovilinga viae nkhele ankho kaunepwe. Tyina omuvo oo uhenehike-po, Sesusi ankho wesukisa okuundapesa nawa omuvo wae uhehi wahupapo.

Sesusi ayawisako ati: “Epanga lietu Lasalu ulele, mahi ame mandyende-ko opo ndyikemupahule-po.” Ovalongwa avasoko okuti hamwe Lasalu ankho ukahi umwe nokupululukwa-po iya waponwa, avati: “Tatekulu, inkha ulele makala nawa.” Sesusi evepopila umwe nawa ati: “Lasalu wanyima . . . Mahi tuendei apa eli.” — Suau 11:11-15.

Mokonda Tomee ankho utyii okuti Sesusi upondola okukaipaelwa ko Sundeya iya uhanda okumukuatesako, apopila ovalongwa vakuavo okuti: “No onthue tuendei, tukankhie nae.” — Suau 11:16.