Sesusi nkhele ankho ukahi mo Samaliya ine o mo Ngalileya. Iya ova Faliseu avemupulu konthele yokuya Kuouhamba, una ankho vakevela okuti mauya nomunkhima omunene. Mahi, Sesusi evepopila okuti: “Ouhamba wa Huku kamauya monkhalelo imoneka komaiho. Ovanthu kamavapopi okuti: ‘Talei oyou!’ ine ‘Oyouna!’ Mokonda Ouhamba wa Huku uli pokati kenyi.” — Luka 17:20, 21.

Vamwe tyipondola vasokele okuti Sesusi ankho ukahi nokupopia okuti Ouhamba wa Huku uli momitima viovaumbili va Huku. Mahi, ha ngotyo-ko, mokonda Ouhamba ankho kaukahi momitima viova Faliseu, Sesusi ankho ekahi nokupopia navo. Ankho ukahi pokati kavo mokonda Ohamba Youhamba wa Huku, Sesusi, ankho ukahi pokati kavo. — Mateusi 21:5.

Tyafuile etyi ova Faliseu vapita, Sesusi apopila vali ovalongwa vae ovipuka ovikuavo konthele yokuya Kuouhamba. Konthele yomuvo ankho matumina Mouhamba, evelondola okuti: “Makuya ononthiki mamuhande okumona ike pononthiki mbo Mona womulume, mahi kamamuimono.” (Luka 17:22) Sesusi ankho ukahi nokupopia okuti Omona womulume makatumina Mouhamba komutwe wandyila. Tyina nkhele omuvo oo uhenehike-po, tyafuile ovalongwa vamwe ankho vewovola unene, mahi ankho mavatualako okukevelela alo omuvo Huku anaka opo Omona womulume eye.

Sesusi atualako okupopia okuti: “Ovanthu mavekemupopila okuti: ‘Talei oyouna!’ ine ‘Talei oyou!’ Muhayei-ko nii muhevelandulei. Mokonda ngetyi omuliakulo uliaima okutunda nthele imwe yeulu alo konthele onkhuavo yeulu, ongotyo Omona womulume makakala monthiki yae.” (Luka 17:23, 24) Oityi ankho matyikuatesako ovalongwa va Sesusi okuhayondyua no vo mesiya vomatutu? Sesusi wati, okuya kwa Mesiya yotyotyili ankho makukakala ngomuliakulo uliaima, aumonekela kokule. Otyilekeso tyokuti Sesusi wahimbika okutumina Mouhamba, ankho matyimoneka nawa kovanthu aveho vokutala nawa.

Konyima, Sesusi apopi ovipuka viamonekele kohale opo alekese ovituwa viovanthu mokueenda kuomuvo oo, ati: “Ngetyi tyaendele kononthiki mba Noe, otyo matyikakala pononthiki mbo Mona womulume . . . Tupu, ngetyi tyaendele kononthiki mba Lote: Ovanthu ankho valia, vanwa, valanda, valandesa, vatuika, vatunga onondyuo. Mahi monthiki Lote atunda mo Sondoma, keulu akuloko otupia noisofele atuhanye-ko ovanthu aveho. Ongotyo matyikakala monthiki Omona womulume mamoneka.” — Luka 17:26-30.

Sesusi ankho kekahi nokupopia okuti ovanthu vo pononthiki mba Noe no vo pononthiki mba Lote, vahanyenueko mokonda yokulia, nokunwa, nokulanda, nokulandesa, nokutuika, nokutunga onondyuo. Noe na Lote no nombunga mbavo navo ankho valinga ovipuka ovio. Mahi ovanthu ovakuavo pononthiki mbavo ankho valinga vala ovipuka ovio, avehesuku netyi Huku ahanda, avatombo etyi ankho tyikahi nokumoneka momuvo wavo. Moluotyo, Sesusi ankho ukahi nokulondola ovalongwa vae opo vesuke nehando lya Huku, iya avalingi ononkhono mbokulinga ehando olio. Tupu ankho ukahi nokuvelekesa oityi vena okulinga opo vahupiswe tyina Huku amaeta ehanyauno komutwe wandyila.

Ovalongwa ankho mavesukisa okulityilika okutalulwa novipuka vyo mouye “vikahi konyima.” Sesusi ati: “Monthiki yatyo oyo, omunthu una ukahi kombanda yondyuo, mahi ovipuka viae vikahi mokati kondyuo, ahatuluke opo ekevipole-mo, tupu omunthu ukahi kepia ahakondoke kovipuka vikahi konyima. Hinangelei omukai wa Lote.” (Luka 17:31, 32) Omukai wa Lote watyitukile otyimbumba tyomongwa.

Sesusi atualako okuhangununina ovalongwa vae oñgeni ovipuka mavikakala tyina Omona womulume amakala Ohamba, ati: “Motyinthiki otyo ovanthu vevali vekahi koula wike; umwe makatyindwa-po, mahi omukuavo makasiwa-po.” (Luka 17:34) Ngotyo, vamwe mavakahupiswa, mahi ovakuavo mavakasiwa-po, avapumbwa omuenyo.

Ovalongwa avapulu okuti: “Opi Tatekulu?” Sesusi akumbulula ati: “Apa olutu lukahi, ononkhombe opo mambukeliongiya.” (Luka 17:37) Ankho vamwe mavakala ngononkhombe mbumona etyi tyikahi kokule. Ovalongwa ovo mavekelihonyeka kumwe na Kilisitu yotyotyili, Omona womulume. Pomuvo opo, Sesusi makaavela ovalongwa vae otyili tyiyovola omuenyo wa vana vena ekolelo.