Tyafuile Sesusi wapopia ongeleka yongi yavombele, nombongo yotyivela yavombele pu etyi nkhele ankho ekahi mo Peleya, koutundilo Wondongi Solondau. Onongeleka ombo onombali mbutulongesa okuti tuesukisa okuhambukwa tyina omunthu wokulinga ononkhali amelivele, akondoka ku Huku. Ova Faliseu novahoneki vovitumino ankho vapopia omapita Sesusi mokonda yokutambula nawa ovanthu ngovo. Mahi okuti pena etyi velilongesila konongeleka onombali mba Sesusi? Okuti vanoñgonoka oñgeni Tate yavo keulu elitehelela konthele yovanthu velivela? Sesusi aave ongeleka ihika komutima opo atoneke vali otyipuka otyo tyakolela.

Mongeleka oyo mupopiwa he umwe una ovana vevali iya omututu watyo oe upopiwa vali unene. Ova Faliseu novahoneki vovitumino, novanthu ovakuavo ankho vekahi nokutehelela Sesusi, ankho vena okulilongesila ku etyi tyapopiwa konthele yomona omututu watyo. Mahi katupondola okutomba etyi Sesusi apopia konthele ya he nomona omukulu watyo, mokonda onkhalelo vakala, nayo itulongesa. Ngotyo, soka konthele yovalume ovo vetatu mongeleka oyo Sesusi apopia.

Sesusi ahimbika okuti: “Omulume umwe ankho una ovana vevali. Iya omututu watyo apopila he okuti: ‘Tate, pomalumono ove mpholele-po epingo liange.’ Moluotyo, he evetepulila epingo liavo.” (Luka 15:11, 12) Tala okuti omututu watyo kaitile epingo liae, mokonda tate yae wanyima. Tate yae nkhele ankho una omuenyo. Mahi no ngotyo, omona ankho uhanda epingo liae poola oyo opo muene elitumine, alingi etyi muene ahanda. Iya oityi alinga?

Sesusi ahangununa okuti: “Etyi palamba ononthiki mbehehi, omona omututu watyo aonganeka ovipuka viae aviho, aende kotyilongo tyimwe kokule, iya oko ngako akapeselela olumono lwae mokonda ankho watyinda omuenyo wasila.” (Luka 15:13) Omona oo aende kotyilongo otyikuavo, mokonda ankho kahandele okutualako okukala momphangu yapama meumbo liavo, na tate yae utekula ovana vae nokuveavela etyi vesukisa. Oko ngako akapesela epingo liae aliho mokutyinda omuenyo wasila womaundalelapo. Konyima, akala novitateka ovinene, ngetyi Sesusi apopia.

Wati: “Etyi apesela olumono lwae aluho, motyilongo otyo atyiho amukala ondyala imwe onene, ahimbika okumona ononkhumbi, nondyala. Alo umwe akalingilila komunthu umwe wotyilongo otyo, iya omunthu oo emutumu monohika mbae akalise ovingulu. Ankho petupu nawike umuavela okulia. Alo umwe ankho uhanda okulia kuovingulu.” — Luka 15:14-16.

Movitumino vya Huku ovingulu ankho ovinyama viasila, mahi no ngotyo omona oo ankho una okuundapa okulisa ovingulu. Ankho waliwa unene nondyala, ahande okulia kuliwa vala novinyama, okulia kuovingulu ankho ekahi nokulisa. Mokonda omona oo ankho ukahi movitateka iya wahulilwa, “ahimbika okusoka nawa.” Oityi alinga? Elipopila okuti: “Ovaundapi va tate vena okulia okunyingi, ame otyo ndyikahi nokunkhia nondyala ngetyi! Mandyiende ku tate andyimupopila okuti: ‘Tate, nalinga onkhali ku Huku keulu no kuove. Hatokalele vali undyihane okuti mona wange. Nthale vala nga umwe povaundapi vove.’” Ngotyo, akatuka aende ku he. — Luka 15:17-20.

Oñgeni he ankho makala? Okuti ankho manumana nomona wae, emukandukila mokonda yowova wae wokuatunda meumbo? Okuti he kamesuku nae, tupu kamemuliepesa? Inkha ove, ñgeno walinga ñgeni? Oityi ñgeno walinga inkha wali omona wove?

Sesusi wapopia oñgeni he akala netyi alinga, wati: “Putyina [omona] nkhele ekahi kokule, he emumono, akala nokankhenda, ahateka emuhumbakana iya noluembia emupe ombesu.” (Luka 15:20) Namphila he eivile okuti omona wae ankho utyinda omuenyo wasila, mahi atambula nawa omona wae wakondoka. Okuti ononkhalamutwe mbova Sundeu, vokuti veii Siovaa tupu vemufenda, mavaimbuka mongeleka oyo oñgeni Tate yetu keulu elitehelela tyina ovanthu vokulinga onkhali velivela?Okuti ankho mavaimbuka okuti na Sesusi ulitehelela nga he, otyo atambulila ovanthu ovo?

Tyipondola he yomona oo, wemutala kotyipala etyimono okuti welivela. Tupu, etyi he woluembia aliepesa omona wae, tyakuatesileko omona oo okupopia ononkhali mbae. Sesusi wati: “Pahe omona emupopila okuti: ‘Tate, nalinga onkhali ku Huku keulu no ku ove. Hatokalele vali undyihane okuti mona wange.’” — Luka 15:21.

He apopila ovapika vae okuti: “Kuluminyei! Etei omuvalo omule, omuvalo omuwa watyo muvalekei, tupu muvalekei onela nononkhaku konomphai mbae. Tupu etei ongombe yokuanina, iipaei na tulinge otyipito tulie, mokonda omona wange ou ankho wankhia, mahi pahe una vali omuenyo, ankho wavomba pahe wamoneka.” Moluotyo, “avahambukwa unene.” — Luka 15:22-24.

Pomuvo opo, omona omukulu watyo ankho uli kepia. Sesusi apopi konthele yae ati: “Pokukondoka tyina ati kondye yeumbo, eivi vekahi nokuiimba otyo vanyana. Aihana umwe povaundapi iya emupulu okuti: Oityi otyo ndyiivite? Omuundapi emupopila okuti: ‘Ondenge yove weya, pahe tate yove waipaa ongombe yokuanina, mokonda omona wae weya ukahi nawa.’ Mahi omona oo, anumana unene, ehetavela okunyingila meumbo. Ngotyo, tate yae alupuka kondye, emukengelela opo anyingile. Apopila tate yae okuti: ‘Tala! Nekuundapela omanima omanyingi, nalumwe naanyene otyitumino tyove, mahi nalumwe wamphele otyinkhombo opo ndyilinge otyipito nomapanga ange. Mahi omona wove oo wapesela omalumono ove nomakunga, wati vala hikee omuipaela ongombe yokuanina.’” — Luka 15:25-30.

Ovalie ankho vekahi ngomona omukulu watyo, vapopia omapita Sesusi mokonda ankho una okankhenda nesuko novanthu vahankhimanene no vokulinga ononkhali? Ovahoneki vovitumino nova Faliseu. Sesusi wapopile ongeleka oyo mokonda vemupopia omapita etyi atambula vokulinga ononkhali. Ngotyo, kese munthu upopia omapita Huku, mokonda yokankhenda ena novanthu, wesukisa okulilongesila kongeleka ya Sesusi.

Sesusi amanuhula ongeleka yae mokupopia etyi he yovana ovo, apopila omona wae omukulu watyo, ati: “Mona wange, ove apeho ukala ponthele yange iya ovipuka viange aviho oviove. Mahi onthue tualinga otyipito iya tuahambukwa, mokonda ondenge yove ankho wankhia, mahi pahe una vali omuenyo, ankho wavomba pahe wamoneka.” — Luka 15:31, 32.

Sesusi kapopile etyi omona omukulu watyo alingile konyima. Mahi, konyima yononkhia netutilo lya Sesusi, “ovanakwa ovanyingi avahimbika okukala nekolelo.” (Ovilinga 6:7) Tyafuile ankho pakutikinya vamwe veivile ongeleka ihika komitima Sesusi apopile konthele yomona wavombele. Navo ankho vapondola okuimbuka onkhalelo yavo ihekahi nawa, avelivele iya avakondoka ku Huku.

Okuhimbikila onthiki oyo, ovalongwa va Sesusi ankho vapondola okulilongesila kongeleka oyo ongwa ovipuka viakolela. Otyipuka tyo tete tulilongesila-ko okuti, otyiwa okutualako okukala pokati kovanthu va Huku, pana tutekulilwa na Tate yetu keulu utuhole, utuavela etyi tuesukisa, atuhatundu-po opo tukaovole okulinga omahando etu muene “kotyilongo tyimwe kokule.”

Otyipuka otyikuavo tulilongesila-ko, okuti inkha umwe pu onthue uyapuka mondyila ya Huku, wesukisa okukondoka ku Tate yetu nomutima weliola, opo apandwe vali nae.

Tupu, tupondola okulilongesa otyipuka otyikuavo konkhalelo he aevela omona wae emutambula nawa, netyi omona omukulu watyo, apaka onkhongo, ahaliepesa ondenge yae. Tyotyili, ovaumbili va Huku vahanda okuevela avatambula nawa omunthu walingile onkhali, elivele nomutima auho iya akondoka ‘meumbo lya Tate.’ Tuhambukwei tyina omukuatate wetu ‘ankho wankhia, akala vali nomuenyo,’ ‘ankho wavomba pahe amoneka.’