Ongeleka yomona omupeseli Sesusi apopia, tyafuile yalekesile ovatanthi velilimu, novahoneki vovitumino nova Faliseu ankho vekahi nokumutehelela, okuti Huku uhanda okuevela vana valinga ononkhali avelivele. (Luka 15:1-7, 11) Pahe Sesusi apopi novalongwa vae. Apopi ongeleka onkhuavo, yomulume umwe omuhona weiva okuti omuundapi wae kekahi nokuundapa nawa.

Sesusi apopi okuti omuundapi oo ankho wahungwa okuti kekahi nokuundapesa nawa omalumono omuhona wae. Moluotyo, omuhona apopi okuti memutaata movilinga. Omuundapi elipulu okuti: “Oityi mandyilingi, tyina omuhona wange amampholo otyilinga tyange? Ame ndyitupu ononkhono mbokulima, okukaita osimola matyinkhundisa.” Etyi asoka oñgeni makakala kononthiki mbo komutwe, atokola okuti: “Etyi mandyilingi ndyityii, opo tyina omuhona wange amampholo otyilinga tyange, ovanthu avakanthambula momaumbo avo.” Aihana aveho vena onongele mbomuhona wae, apulu kese wike okuti: “Otyiñgapi walevala omuhona wange?” — Luka 16:3-5.

Omunthu wo tete ati: “Nemulevala onolitulu 2.200 mbomulela.” Omunthu oo tyafuile ankho una epia enene liomiti viaava omulela ine hamwe ankho ulandesa omulela. Omuundapi emupopila okuti: “Tambula omukanda wongele yove, pumphama honeka-po liwa onolitulu 1.100.” — Luka 16:6.

Omuundapi oo apulu vali omunthu omukuavo okuti: “Iya ove, otyiñgapi walevala?” Akumbulula okuti: “Onosaku 100 mbotiliku.” Omuundapi emupopila okuti: “Tambula omukanda wongele yove, honeka-po 80.” Ankho watepulula-ko onosaku 20. — Luka 16:7.

Omuundapi nkhele ankho omutumini womalumono omuhona wae, ngotyo ankho upondola okutepulula ku etyi vakuavo valevala omuhona wae. Etyi atepulula onongele ombo, ankho ukahi nokulinga omapanga apondola okumukuatesako tyina amataatwa movilinga.

Etyi palamba omuvo umwe, omuhona wae eivi etyi omuundapi oo alinga. Namphila etyi alinga ankho tyapesela onombongo mbomuhona, mahi omuhona ahuvu nomuundapi iya emupande mokonda “namphila hamuviuki,” “etyi alinga tyilekesa okuti omunongo.” Sesusi ayawisako okuti: “Ovanthu vouye uno ovanongo vali tyipona ovana votyitei monkhalelo vatekula ovanthu vomuvo wavo.” — Luka 16:8.

Sesusi ankho kekahi nokulunda ovanthu valandule ongeleka yomuundapi oo, ine okuvelunda okuvakela monondando. Oityi ankho ahanda okulongesa? Walondola ovalongwa vae okuti: “Ovolei omapanga nomalumono ahaviukile, tyina omalumono oo amapu, opo vekemutambule monomphangu mbahapu.” (Luka 16:9) Walongesa okuti tyesukisa okukala nonondunge nokulinga ovipuka nounongo. Ovaumbili va Huku, “ovana votyitei,” vesukisa okuundapesa omalumono avo nounongo, okusoka komutwe, komuenyo wahapu.

O Siovaa Huku vala Nomona wae, vapondola okutambula omunthu Mouhamba wo keulu ine Momphangu Yombembwa pano pohi moutumini Wouhamba oo. Tuesukisa okulinga oupanga omunene navo mokuundapesa omalumono etu opo tukuateseko ovilinga Viouhamba wa Huku. Ngotyo, matutualako nomuenyo omuwa tyina oolu, nopalata, nomalumono omakuavo amapu-ko.

Tupu Sesusi wapopia okuti ovanthu ovakuatyili kokuundapesa omalumono avo, novipuka viavo, tupu mavakakala ovakuatyili pokuundapesa ovipuka viakolela vali. Sesusi wati: “Ngotyo, inkha kamukala ovakuatyili tyina muundapesa omalumono ahaviukile, olie memuavela olumono luotyotyili [ovilinga Viouhamba wa Huku]?” — Luka 16:11.

Sesusi ankho ukahi nokulekesa ovalongwa vae okuti vesukisa okulinga ononkhono ononene, inkha vahanda okukatambulwa “monomphangu mbahapu.” Omunthu kapondola okukala omuumbili wotyotyili wa Huku putyina nkhele omupika womalumono ahaviukile. Sesusi amanuhula okupopia, ati: “Petupu omuundapi upondola okukala omupika wovahona vevali, mokonda mayale-po wike, ahumbu-po omukuavo, ine mahulu ku wike ayeke-po omukuavo. Onwe kamupondola okukala ovapika va Huku no Vomalumono.” — Luka 16:9, 13.