Sesusi nkhele ankho ukahi nokulinga oungendi akuate mo Peleya, okuenda ko Selusalei. Omulume umwe omuhona eya pwe, aikila konongolo. Omulume oo ankho o “umwe povatumini,” tyafuile ankho onkhalamutwe yondyuo yokufendela ine o umwe po Vombonge onene yova Sundeu. Omulume oo apulu okuti: “Mulongesi Omuwa, oityi ndyina okulinga opo ndyikamone omuenyo wahapu?” — Luka 8:41; 18:18; 24:20.

Sesusi emukumbulula ati: “Omokonda yatyi undyihanena okuti muwa? Kutupu omunthu na wike omuwa, omuwa o Huku vala.” Tyafuile omukuendye oo wemuihana okuti “muwa” mokonda olio enyina liomunkhima ankho ononkhalamutwe mbova Sundeu vaihanwa. Namphila Sesusi ankho tyili omulongesi omuwa, mahi apopila omulume oo okuti o Huku vala watokala okutiwa “Omuwa.”

Sesusi emulondola okuti: “Inkha uhanda okukamona omuenyo wahapu, tualako okulandula ovitumino.” Moluotyo, omukuendye oo apulu okuti: “Ovipi?” Sesusi apopi ovitumino vitano Povitumino Ekwi — konthele yokuipaa, noumbalehi, nokuvaka, nokupopia omatutu, nokuhumba ovo he. Konyima, apopi otyitumino tyakolela vali, ati: “Kala nohole na munthele yove ngetyi ulihole ove muene.” — Mateusi 19:17-19.

Omulume akumbulula okuti: “Ndyikahi-ale nokulinga ovipuka ovio aviho; oityi vali nakambesa?” (Mateusi 19:20) Tyafuile ankho usoka okuti kekahi nokulinga otyipuka tyimwe otyiwa, otyipuka tyihuvisa matyimuavela omuenyo wahapu. Sesusi amono oukuatyili wae, ‘akala noluembia nae.’ (Maluku 10:21) Mahi, omulume oo ankho una otyitateka tyimwe.

Mokonda omulume oo ankho wakakatela momalumono ae, Sesusi emupopila okuti: “Wakambesa okulinga otyipuka tyike. Enda kalandese ovipuka aviho una, onombongo mbatyo ombuaavela ovahepi, opo ukakale nolumono keulu. Konyima oya okala omulongwa wange.” Omulume oo ankho upondola okuavela onombongo mbae ovahepi vahapondola okumukondolela, akala omulongwa wa Sesusi. Tyafuile Sesusi atale nokankhenda tyina omulume akatuka, aende nokuanumana. Okukakatela ‘momalumono omanyingi’ ankho ena, tyemutyilika okutala kolumono luotyotyili. (Maluku 10:21, 22) Sesusi ati: “Matyikepuiya unene ngatyi ku vana vokuna onombongo okunyingila Mouhamba wa Huku!” — Luka 18:24.

Ovalongwa avahuvu nonondaka ombo netyi Sesusi apopia okuti: “Tyotyili, tyapepuka vali ekamelu okukuata meyulu lionguya yokunyika, tyipona omunthu omuhona okunyingila Mouhamba wa Huku.” Otyo atyilundu ovalongwa okupula okuti: “Opo naina olie upondola okuyovolwa?” Ovalongwa tyafuile ankho vasoka okuti tyepuiya unene, nawike upondola okuyovolwa. Sesusi evetale, akumbulula okuti: “Ovipuka vihevilwa novanthu, Huku uvivila.” — Luka 18:25-27.

Petulu apopi okuti ngwe valinga etokolo lielikalela no liomulume omuhona, ati: “Tala! Onthue tuasa-po ovipuka vietu aviho atukulandula. Oityi matukapewa?” Sesusi alekesa oityi etokolo liavo valinga liaviuka, maliveetela, ati: “Tyina ovipuka aviho Huku amevilingi ovipe iya Omona womulume apumphama kotyipundi tyae tyoutumini, onwe vokukahi nokundandula mamukapumphama kovipundi 12 vioutumini, amukoyesa omihoko 12 vyo Isilayeli.” — Mateusi 19:27, 28.

Tyimoneka nawa okuti Sesusi ankho ukahi nokusoka komutwe, tyina ovipuka pano pohi viamalingwa vali ovipe ngetyi tyali mo Endene. Petulu novalongwa ovakuavo mavakayambwa, mokukatumina na Sesusi Momphangu Yombembwa pano pohi. Ondyambi oyo ongwa unene ngatyi, tyesukisa umwe okulinga ononkhono ononene!

Mahi ankho kavakevela vala okukayambwa komutwe wandyila. Ovalongwa vae ankho vekahi-ale nokuyambwa pomuvo opo. Sesusi wati: ‘Una wasa-po eumbo liae, ine omukai wae ine onondenge mbae novakulu vae, ine ovohe ine ovana, mokonda Youhamba wa Huku, makatambula vali ovipuka ovinyingi mouye uno iya mouye omupe mauya, akamona omuenyo wahapu.’ — Luka 18:29, 30.

Kese apa ovalongwa vae vaya, vapondola okukala noupanga omuwa novakuatate vavo, oupanga wapama vali tyipona una vena nombunga yavo. Mahi, tyimoneka okuti omukuendye una omutumini wapumbua ouwa oo, nondyambi yomuenyo Mouhamba wa Huku keulu.

Sesusi ayawisa-ko, ati: “Mahi ovanyingi vatetekela mavekesaililwa iya vokuesaililwa mavakala ovatete.” (Mateusi 19:30) Oityi ankho ahanda okupopia?

Omutumini oo omuhona ankho o umwe po ‘vokuatetekela,’ mokonda ankho onkhalamutwe yova Sundeu. Mokonda ankho ulandula ovitumino vya Huku, ankho una vali omphitilo tupu ankho una okulinga vali ononkhono. Mahi ankho ukahi nokupaka omalumono pomphangu yo tete momuenyo wae. Mahi, ovanthu vahankhimanene vanoñgonokele okuti etyi Sesusi ekahi nokulongesa otyili, iya otyili otyo ondyila ituala komuenyo. Ovanthu ovo ankho ‘ovokuesaililwa,’ pahe vekahi nokukala “ovatete.” Ngotyo, vapondola okukevelela okukapumphama povipundi vioutumini keulu na Sesusi, avakatumina Momphangu Yombembwa pano pohi.