Sesusi wahetekela ononkhalelo ononyingi opo akuateseko ovanthu okukala noupanga omuwa na Huku. Etyi apopia novanthu ankho vekahi kondye yeumbo liomu Faliseu, akala vali nomphitilo onkhuavo.

Ovanthu vamwe avemupopila otyitateka tyimwe tyaenda-po. Vapopia konthele “yova Ngalileya vamwe ankho [Omutumini wo Loma Posiu] Pilatu aipaa etyi vakalinga ovilikutila.” (Luka 13:1) Oityi ankho vahanda okupopia?

Tyipondola ova Ngalileya ovo, ovovana vaipaelwe etyi ova Sundeu ovanyingi vapopia omapita Pilatu mokonda wapola onombongo mbo mondyuo ya Huku, atungisa nambo omukungu ankho utuala omaande mo Selusalei. Tyipondola ankho Pilatu velipakela-mo novatumini vo mondyuo ya Huku opo apole-mo onombongo ombo. Vokuapopia otyitateka otyo, tyafuile ankho vasoka okuti hamwe ovanthu ovo vokuankhia, ankho valinga ononkhali. Sesusi ehetyitavela.

Evepulu okuti: “Onwe musoka okuti ova Ngalileya ovo ankho valinga vali ononkhali tyipona ova Ngalileya ovakuavo etyi vaipawa ngotyo?” Evepopila okuti hatyoko. Mahi apopi otyitateka otyo opo alondole ova Sundeu, eveti: “Ame ndyimupopila okuti, au; no onwe inkha kamulivele mamuhanyua-ko ngavo.” (Luka 13:2, 3) Sesusi apopi vali otyitateka otyikuavo ankho tyamoneka pononthiki opo, tyafuile pokutunga omukungu oo.

Apulu okuti: “Ovanthu vana 18 vatokelelwe notyimato tyo ko Siloe atyiveipaa, onwe musoka okuti ankho valinga vali ononkhali tyipona ovanthu ovakuavo vakala mo Selusalei?” (Luka 13:4) Ovanthu tyafwa ankho vasoka okuti ovanthu vokuankhila opo ankho vena etyi valinga tyapenga. Tupu Sesusi ehetyitavela. Ankho utyii okuti otyo tyimoneka vala mokonda “omuvo novitateka viuhulukila ovanthu aveho.” (Eclesiastes 9:11) Ovanthu ovo ñgeno ankho velilongesila kovitateka ovio. Sesusi evepopila okuti: “Inkha kamulivele mamuhanyua-ko ngavo.” (Luka 13:5) Mahi omokonda yatyi apopila unene onondonga ombo?

Otyo ankho tyelikuata nomuvo akala nokulinga ovilinga viae iya apopi ongeleka yelikuata notyo, ati: “Omulume umwe ankho una omukuyu mepia liae liomivinyu, akatala-ko ovinyango, mahi ahavasi-ko natyike. Apopila omuundapi womepia omo okuti: ‘Palamba omanima etatu ndyiya okutala ovinyango komuti ou otyo nahavasi-ko natyike. Utyoka-po! Omokonda yatyi ukalela vala mepia uhaimi?’ Omuundapi emukumbulula okuti: ‘Tatekulu, uyekela-po vali enima like, mandyiheye-po andyipake-po ombumbi. Inkha wiima, opo tyikahi nawa, mahi inkha kawiimi ha upondola okuutyoka-po.’” — Luka 13:6-9.

Sesusi ankho wakala omanima alamba pu etatu, nokuovola okukuatesako ova Sundeu vapameke ekolelo liavo. Mahi, kavehi vakalele ovalanduli vae, vana ankho vapondola okutalwa ngatyina ovinyango viononkhono Sesusi alinga. Pahe menima liakuana movilinga viae, alingi vali ononkhono ononene. Otyo ankho tyikahi ngatyina aheya, apake vali ombumbi pomukuyu wova Sundeu, mokuivisa nokulongesa mo Sundeya no mo Peleya. Mahi ononkhono alinga ambueta-tyi? Kavehi ova Sundeu vetavelele. Otyinyingi kavelivelele iya pahe mavahanyaunwa-ko.

Otyituwa otyo tyokuhetavela, atyimoneka vali Motyasapalo, etyi palamba ononthiki mbumwe. Sesusi ankho ukahi nokulongesa mondyuo yokufendela. Amono omukai umwe ankho welipeta omuongo mokueenda kuomanima 18, mokonda yotyilulu ankho tyimumonesa ononkhumbi. Sesusi akala nokankhenda nae, emupopila okuti: “Waveluka kouvela wove.” (Luka 13:12) Sesusi emupake omavoko ae iya liwa-liwa atalama nawa, ahimbika okunkhimaneka Huku.

Onkhalamutwe yondyuo yokufendela ainumana, aiti: “Kuna ononthiki epandu mbokuundapa; ngotyo endyuei amuhakulwa mononthiki ombo, muheyei Motyasapalo.” (Luka 13:14) Onkhalamutwe oyo, ankho kaikahi nokuanya epondolo lya Sesusi liokuhakula, mahi ankho ikahi nokuviyula ovanthu veya okuhakulwa monthiki Yotyasapalo! Sesusi evepopila onondaka mbayandyuluka, ati: “Vomaandambeyo, onwe kamukutulula kese umwe ongombe yae ine otyimbulu tyae Motyasapalo eketyiavela omaande? Iya omukai ou omona wa Ambalaiau wakutwa na Satanasi momanima 18, katyitavela okumuyovola mononkhuto ombo monthiki Yotyasapalo?” — Luka 13:15, 16.

Onondyale mbae ambukala tyakunda, mahi ovaunyingi avahambukwa okutala ovipuka vihuvisa Sesusi ankho alinga. Konyima, Sesusi awane vali onongeleka onombali apopile-ale konthele Youhamba, etyi ankho alongesila mowato Melunga lyo Ngalileya. — Mateusi 13:31-33; Luka 13:18-21.