Sesusi wahangununa okuti “votyunda otyitutu” ovo vala mavakapewa omphangu Mouhamba wo keulu. (Luka 12:32) Mahi, okutambula ondyambi oyo ongwa katyipondola okutalwa vala ngatyina otyipuka tyihena esilivilo. Sesusi alekesa okuti tyakolela unene omunthu okukala novituwa oviwa opo akakale Mouhamba wa Huku.

Tupu, Sesusi alondola ovalongwa vae opo evevase tyelipongiya tyina akondoka. Wati: “Valei amulipongiya, amukala novikandiyelo vienyi viatema. Kalei ngovalume vakevela omuhona wavo utunda kotyipito tyotyinepo, opo tyina amehiki iya atotola kepito avemuikula liwa-liwa. Ovapika vana vavasiwa nomuhona wavo vekahi nokuyunga vena ehambu!” — Luka 12:35-37.

Ankho katyipuiya ovalongwa okunoñgonoka otyituwa Sesusi ankho ekahi nokupopia. Ovapika apopia ankho velipongiya, otyo vakevelela omuhona wavo. Sesusi ati: “Tyilinge [omuhona] uya koola ya vali [okupolelela koola 21 alo mokati kovinthiki], ine okoola ya tatu [okupolelela mokati kovinthiki alo koola 3 kombimba], inkha uvevasa velipongiya, vena ehambu!” — Luka 12:38.

Elondolo olio ankho kalilekesa vala okuti ovapika ine ovaundapi vena okuundapa nombili. Otyo tyimoneka monkhalelo Sesusi, Omona womulume, elikutikinya monthengele-popia. Wapopila ovalongwa vae okuti: “No onwe kalei tyelipongiya, mokonda Omona womulume meya moola onwe ankho muhasoko.” (Luka 12:40) Moluotyo, ankho nthiki imwe komutwe wandyila, Sesusi meya. Iya ankho uhanda ovalanduli vae, haunene “votyunda otyitutu,” vakale tyelipongiya.

Petulu ahande okunoñgonoka nawa etyi Sesusi ahanda okupopia, apulu okuti: “Tatekulu, onthengele-popia oyo weipopila vala onthue, ine aveho?” Sesusi akumbulula epulo lya Petulu, nonthengele-popia yelikuata no yotete, ati: “Olie tyili-tyili omupika omukuatyili, nokualunguka, una omuhona wae mapake komutwe wa vakuavo opo atualeko okuveavela okulia momuvo wanakwa? Omupika oo una ehambu inkha omuhona wae umuvasa ukahi nokulinga otyilinga otyo! Tyotyili ame ndyimupopila okuti, omuhona wae memuavela otyilinga tyokuyunga omalumono ae aeho.” — Luka 12:41-44.

Monthengele-popia yotete, “omuhona” Omona womulume, o Sesusi. ‘Momupika omukuatyili’ muakutikinya ovalume “votyunda otyitutu,” vana mavakapewa Ouhamba. (Luka 12:32) Sesusi ankho ukahi nokupopia okuti ovanthu vamwe votyikundyi otyo mavakaavela “vakuavo” “okulia momuvo wanakwa.” Ngotyo, Petulu novalongwa ovakuavo Sesusi ankho ekahi nokulongesa nokuvekuatesako vakale noupanga omuwa na Huku, ankho vapondola okusoka okuti makukeya omuvo umwe Omona womulume meya. Iya pomuvo oo, ankho makukala epongiyo liokuavela okulia ovalanduli va Sesusi, ‘ovaundapi vomeumbo’ Vomuhona, opo vakale noupanga omuwa na Huku.

Sesusi apopi vali monkhalelo onkhuavo opo atoneke omokonda yatyi ovalongwa vae vesukisila okulunguka, nokuviukisa ovituwa viavo. Wapopia ngotyo mokonda ankho vapondola okutalukwa, alo umwe avayale ovakuatate vavo, wati: “Mahi inkha omupika oo usoka okuti: ‘Omuhona wange ukahi nokuseta,’ iya ahimbika okuveta ovaundapi ovakuendye novahikuena, otyo alia nokunwa akolwa, omuhona womupika oo meya monthiki ahakevela no moola imwe ehei. Iya mekemumonesa ononkhumbi ononene, ekemupaka kumwe no vokuhena ekolelo.” —Luka 12:45, 46.

Sesusi wati weya “okuyakesa otupia pano pohi.” Walinga ngotyo, etyi apopia onondaka mbueta oundyale omunene pokati kovanthu, nonthyulilo yomalongeso omatutu noviso viavo. Alo umwe mbuyapaula ovanthu ankho vena okulikuata okapandi, “he mayale omona, omona mayale he, ina mayale omona wae omuhikuena iya omona omuhikuena mayale ina, inaivi mayale omukuekai iya omukuekai mayale inaivi.” — Luka 12:49, 53.

Sesusi wapopilile onondaka ombo haunene ovalongwa vae. Konyima, Sesusi apopila ovaunyingi. Ovanthu ovanyingi ankho kavetavela okuti Sesusi o Mesiya, moluotyo, evepopila okuti: “Onwe tyina mumona ekaka koutakelo likahi nokuya mupopia okuti ‘makuya omphepo onene,’ aiya umwe. Tupu tyina mumona omphepo itunda monomphati mbekumbi, onwe mupopia okuti: ‘Omutenya mautokota unene,’ autokota umwe. Vomaandambeyo, onwe mutyivila okuimbuka oñgeni ohi neulu vikahi, mahi omokonda yatyi muhevilila okuimbuka etyi tyikahi nokumoneka momuvo uno?” (Luka 12:54-56) Tyimoneka nawa okuti ankho kavelipongiyile.