Monthiki yahulililako Yotyipito Tyomakaka, onthiki ya pandu-vali, Sesusi ankho ukahi nokulongesa mondyuo ya Huku ponthele ‘yovikasa viokupaka onombongo.’ (Suau 8:20; Luka 21:1) Tyafuile ankho Omepata Liovakai, muna ankho ovanthu valingila oviawa viavo.

Kounthiki mokueenda kuotyipito, omphangu oyo yondyuo ya Huku, ankho muna otyimimi otyinene. Ankho muna ovikandiyelo vikuana ovinene, kese kandiyelo ankho kena ovilindo vikuana vieyula omulela. Otyimimi tyovikandiyelo ovio ankho tyihika kokule unene. Sesusi pahe apopi etyi tyafuile tyahinangelesile ovateheleli vae otyipuka otyo, etyi ati: “Ame ndyityimimi tyouye. Una undandula kamaendela menthiki, mahi makakala notyimimi tyomuenyo.” — Suau 8:12.

Ova Faliseu avehetavela etyi Sesusi apopia, avati: “Ove waava oumbangi konthele yove muene, oumbangi wove ha wotyotyili-ko.” Sesusi akumbulula okuti: “Alo umwe inkha ndyiava oumbangi konthele yange, oumbangi wange owotyotyili, mokonda ame oku natunda ndyikwii iya oku ndyenda nako ndyikwii. Mahi onwe oku natunda kamwii-ko tupu oku ndyenda nako kamwii-ko.” Ayawisako okuti: “Movitumino vienyi muene muahonekwa okuti: ‘Oumbangi wovanthu vevali owotyotyili.’ Ame ndyiava oumbangi konthele yange muene, na Tate wanthuma waava oumbangi konthele yange.” — Suau 8:13-18.

Ova Faliseu avehetavela onondaka ombo, avemupulu okuti: “Tate yove ulipi?” Sesusi akumbulula okuti: “Onwe kamundyi tupu kamwii Tate. Inkha muanoñgonokele ame, tupu ñgeno muanoñgonoka Tate.” (Suau 8:19) Namphila ova Faliseu ankho vahanda okuipaa Sesusi, mahi nawike wemukuatele.

Sesusi apopi vali etyi apopile-ale, ati: “Ame ndyikahi nokuenda, iya onwe mamunthaindya, mahi mamunkhila mononkhali mbenyi. Oku ame ndyenda, onwe kamupondola okuenda-ko.” Ova Sundeu avahanoñgonoka etyi Sesusi apopia, avahimbika okulipula okuti: “Okuti hamwe mekeliipaa? Mokonda wati ‘Oku ndyenda onwe kamupondola okuya-ko.’” Kavanoñgonokele etyi Sesusi ankho ahanda okupopia, mokonda ankho kavei oku atunda. Sesusi evehangununina okuti: “Onwe mu va pano pohi, ame ndyi wo keulu. Onwe mu vomouye uno, ame hi womouye uno-ko.” — Suau 8:21-23.

Sesusi ankho ukahi nokupopia konthele yomuenyo wae keulu, netyi akala o Mesiya walaelwe ine o Kilisitu, una ononkhalamutwe mbonongeleya ankho vena okuimbuka. Mahi, avemulingi omutomba, avemupulu okuti: “Ove, ovelie?” — Suau 8:25.

Mokonda ankho vemuanya tupu vemuyele, Sesusi evekumbulula okuti: “Oityi ndyipuilila okupopia no onwe, tyina muhekahi nokunoñgonoka?” Mahi no ngotyo, apopi konthele ya Tate yae, ahangununa omokonda yatyi ova Sundeu ankho vesukisila okutehelela Omona, ati: “Una wanthuma owotyotyili, iya ovipuka neiva kwe ndyikahi nokuvipopia mouye.” — Suau 8:25, 26.

Konyima, Sesusi alekesa okuti una onthumbi mu Tate yae, onthumbi ova Sundeu vehena, ati: “Tyina muamatulika Omona womulume momuti, mamutyinoñgonoka okuti ame yatyo, iya hilingi natyike kehando liange muene; mahi ndyipopia ovipuka Tate andongesa. Iya Una wanthuma ukahi na ame; kandyekele vala ngotyo andyike, mokonda ame apeho ndyilinga ovipuka vimuhambukiswa.” — Suau 8:28, 29.

Ova Sundeu vamwe avakala nekolelo mu Sesusi, ngwe evepopila okuti: “Inkha mutualako okukala mondaka yange, opo tyotyili muvalongwa vange. Iya mamunoñgonoka otyili, iya otyili matyimuyovola.” — Suau 8:31, 32.

Vamwe, otyipuka otyo apopia tyokuyovoka, avehetyinoñgonoka. Avapulu okuti: “Onthue tuatuka mu Ambalaiau, katunekale ovapika vomunthu nawike. Oñgeni ove uti: ‘Onwe mamuyovoka’?” Ova Sundeu ankho vetyii okuti, kohale vakalele ovapika vovilongo ovikuavo, mahi no ngotyo avehetavela okuihanwa okuti ovapika. Mahi, Sesusi apopi okuti nkhele ankho ovapika, ati: “Tyotyili ame ndyimupopila okuti, kese munthu ulinga onkhali, omupika wonkhali.” — Suau 8:33, 34.

Okuhetavela okuti ovapika vonkhali ankho tyipaka ova Sundeu motyiponga. Sesusi ahangununa okuti: “Omupika katualako okukala meumbo alo-loo, mahi omona utualako okukala-mo alo-loo.” (Suau 8:35) Omupika ankho utupu epingo iya ankho upondola okutaatwa. Omona oe vala ankho utualako okukala meumbo “alo-loo,” ukala-mo omuenyo wae auho.

Ngotyo, otyili konthele Yomona tyiyovola ovanthu konkhali ituala kononkhia, avayovoka alo-loo. Sesusi ati: “Inkha Omona umuyovola, mamuyovoka umwe tyili.” — Suau 8:36.